Qabil Hüseynli: "Belə olan təqdirdə xarici qüvvələrin ölkəmizin daxili işlərinə qarışmaq imkanları məhdudlaşacaq"
Prezident İlham Əliyevin Sərəncamı ilə Azərbaycanda növbədənkənar prezident seçkiləri elan edilib.
Qərara görə, Mərkəzi Seçki Komissiyası növbədənkənar Azərbaycan Respublikası Prezidenti seçkilərinin 2024-cü il fevralın 7-nə təyin olunmasını və ölkənin Seçki Məcəlləsində müəyyən edilmiş qaydada keçirilməsini təmin etməlidir.
Azərbaycan xalqı gələn il fevralın 7-də, əvvəlki seçkilərdə olduğu kimi, yenə tarixi seçimini edəcək - sabitliyə, əminamanlığa, bütövlüyə səs verəcək. 2024-cü il fevral seçkiləri hətta Azərbaycanın yüz illik tarixinə düşəcək bir seçki olacaq, çünki artıq işğaldan azad olunmuş bütün torpaqlarda - Xankəndi, Şuşa, Laçın, Kəlbəcər, Xocalı, Cəbrayıl, Zəngilan və s. ərazilərdə Azərbaycan Bayrağı dalğalanır.
Prezident seçkilərinin 2024-cü il fevralın 7-də keçirilməsinin elan edilməsi həm də beynəlxalq ictimaiyyətə verilən mesajdır. Dünya ilk dəfə postsovet məkanında torpaqlarını işğaldan azad edən ilk dövlətin bütün ərazilərində seçki keçirəcəyini görəcək. BMT-nin müvafiq sənədləri ilə təsbit olunmuş ərazilərdə seçki keçirilməsi bir tarixdir.
Azərbaycanın belə addım atması daha çox hansı amillərlə bağlıdır?
Politoloq Qabil Hüseynli "Bakı-Xəbər"ə açıqlamasında bildirdi ki, bizim ölkə başçısı risqli addımları sevir: " Belə gedişləri etməyə onu obyektiv səbəblər vadar edir. Hazırda Azərbaycan Prezidenti reytinqinin ən yüksək nöqtəsindədir. Belə reytinqlə seçkiyə getmək onun rəqibləri üzərində aşkar qələbə çalmasına səbəb olacaq. Bununla yanaşı, 2024-cü ildə bir sıra ölkələrdə: ABŞ, Rusiyada prezident, İranda isə parlament seçkiləri olacaq. Beynəlxalq aləmin təmsilçisi olan bir çox ölkələrin başı seçkilərə qarışmış olacaq. Belə olan təqdirdə xarici qüvvələrin ölkənin daxili işlərinə qarışmaq imkanları məhdudlaşacaq. Biz rahat şəkildə öz seçkimizi keçirə biləcəyik. Əli Kərimli kimi adamlar deyir ki, İlham Əliyev niyə cəmiyyətlə məşvərət etmədən bu qərarı verib. Çox cılız yanaşmadır. Bu adamlar bilmir ki, belə qərarı vermək birbaşa Prezidentin səlahiyyəti daxilindədir? Konstitusiyanın 108-ci maddəsinə əsasən Prezidentə bu hüquq verilir. Bundan əvvəlki prezident seçkiləri də növbədənkənar olmuşdu. Hazırda fəaliyyətdə olan parlament də növbədənkənar seçilib. Əgər bu adamlar seçkidə iştirakdan qorxurlarsa, özlərinə başqa bəhanə tapsınlar, ya da zəif olduqlarını açıq etiraf etsinlər".
Birmənalı şəkildə deyə bilərik ki, bu, Azərbaycanın bütün tarixi boyu baş tutacaq ən qürurverici seçki kimi tarixə düşəcək. Çünki üç il bundan əvvəl Müzəffər Ali Baş Komandan İlham Əliyevin rəhbərliyi ilə Azərbaycan Ordusu 44 gün ərzində Qarabağı və ətraf rayonları erməni işğalından azad etdi. Bu ilin sentyabrının 19-20-də isə uğurlu antiterror əməliyyatları ilə Azərbaycan beynəlxalq qanunlarla təsbit olunmuş ərazilərində suverenliyini, ərazi bütövlüyünü tam bərpa etdi. Beynəlxalq vasitəçilərin uzun illər edə bilmədiklərini və yaxud etmək istəmədiklərini Azərbaycan özü reallığa çevirdi.
Məhəmmədəli QƏRİBLİ
