Sahil Kərimli: “Azərbaycanın öz ərazi bütövlüyünü və suverenliyini bərpa etməsini və bununla da Cənubi Qafqazda yeni reallıqlar yaratmasını həzm edə bilmirlər”
Bir sıra Qərbi Avropa ölkələri “stəkanda fırtına yaratmağa” yaman maraq göstərirlər. Xüsusən də özlərinə, öz ərazilərinə aid olmayan prosesləri müzakirə etməyə, özü də tamamilə həllini tapmış, qapanmış məsələləri “diriltməyə” meyl edirlər.
Erməni diaspor və lobbi təşkilatlarının təsiri altında olan bəzi ölkələrin parlamentləri hələ də “Dağlıq Qarabağ” oyunu oynamaqda maraqlı görsənir. Halbuki, bu Qarabağ münaqişəsi deyilən problem artıq başa çatıb. Amma bəzi ölkələr bu reallığı həzm edə bilmir, sönmüş ocağın külü ilə oynayırlar. Belə ölkələrdən biri də İsveçrədir.
Erməni mediası yazır ki, martın 18-də İsveçrə parlamentinin yuxarı palatası Kantonlar Şurasında “Dağlıq Qarabağ” “münaqişəsinin sülh yolu ilə həllinə” həsr olunmuş müzakirələr keçiriləcək.
Bu barədə İsveçrə parlamentinin rəsmi saytında bildirilir.
Qeyd edək ki, 2024-cü ilin oktyabrında İsveçrə Parlamentinin Milli Şurasının (parlamentin aşağı palatası) Beynəlxalq Əlaqələr Komitəsi ölkə hökumətini “Dağlıq Qarabağ” “münaqişəsi” ilə bağlı beynəlxalq sülh konfransı təşkil etməyə çağıran müvafiq qətnamə qəbul etmişdi.
Bunlar iddia edirlər ki, guya məqsədləri “beynəlxalq aktorların nəzarəti və ya iştirakı altında erməni əhalisinin təhlükəsiz və kollektiv şəkildə geri qayıtması ilə bağlı Azərbaycan nümayəndələri ilə “Dağlıq Qarabağ” erməniləri arasında dialoqu təşviq etmək”dir.
Bu əsassız qətnamələri qəbul edən İsveç parlamenti niyəsə etiraf etmək istəmir ki, erməniləri heç kim Qarabağdan çıxarmayıb, onlar özləri könüllü şəkildə Azərbaycan ərazisini tərk ediblər və bu məsələdə də Azərbaycan dövlətinin heç bir məsuliyyəti yoxdur. Onlar etiraf etmək istəmirlər ki, Azərbaycan dövləti ermənilərə Qarabağı tərk etməmələri ilə bağlı çağırışlar edib, onlara Azərbaycan vətəndaşlığını qəbul edib yaşamlarını davam etdirməyi təklif edib, amma onlar heç bir təzyiqə məruz qalmadan çıxıb gediblər. Yəni sivil ermənilərə heç kim gözün üstə qaşın var deməyib, onlar bu yolu özləri könüllü seçiblər və gediblər. İkinci bir tərəfdən, İsveç parlamenti dalbadal qətnamələr qəbul etməklə, hansısa “sülh konfransı” çağırmaqla öz məkrli niyyətlərinə nail ola bilməz. Erməniləri Qarabağa qaytarıb-qaytarmamaq Azərbaycan dövlətinin daxili işidir, buna hansısa bir dövlətin qarışmaq hüququ, haqqı yoxdur.
“İsveçrə parlamentinin atdığı bu yanlış addımlar qərəzli siyasətin göstəricisidir, açıq-aşkar düşmənçilikdir”
Məsələ ilə bağlı “Bakı-Xəbər”ə danışan siyasi ekspert Sahil Kərimli bildirdi ki, təkcə İsveçrə yox, Avropanın bəzi bədnam ölkələri və onların yaramaz parlamentləri də Azərbaycana qarşı bu cür qərəzli mövqeyini uzun müddətdir davam etdirir: “Bunun da bir çox səbəbləri var. Əsas səbəblərdən biri odur ki, Azərbaycan heç zaman xarici təzyiqlər və təhdidlər qarşısında geri çəkilməyib, əksinə, bu təzyiqlərə daim haqlı olaraq adekvat cavab verib. Çünki bu qərəzli və düşmənçilik mövqeyinin təməlində həm də Azərbaycanın müstəqil, milli maraqlara söykənən siyasət yürütməsi dayanıb. Avropanın və Qərbin bir çox qərəzli dairələrinin Azərbaycana qarşı bu cür ədalətsiz mövqe nümayiş etdirməsinin kökündə həm də Azərbaycanın 44 günlük Vətən müharibəsindəki tarixi və şanlı qələbəsi dayanır. Çünki həmin dairələr Azərbaycanın öz ərazi bütövlüyünü və suverenliyini bərpa etməsini və bununla da Cənubi Qafqazda yeni reallıqlar yaratmasını həzm edə bilmirlər. Bu reallıqları qəbul edə bilmədiklərinə görə də Azərbaycana qarşı bu cür qərəzli mövqe nümayiş etirirlər”.
S.Kərimli bildirdi ki, İsçevrə paralamentinin bu addımları iflasa uğrayacaq və onların hər hansı bir cəhdi alınmayacaq: “İsveçrə parlamentinin atdığı bu yanlış addımlar qərəzli siyasətin göstəricisdir, açıq-aşkar düşmənçilikdir. Bütün bunlar isə növbəti uğursuz cəhddən başqa bir şey deyil”.
S.Kərimlinin fikrincə, eyni zamanda Ermənistanın müdafiə edilməsi, işğalçı, terrorçu, separatçı mahiyyətli bir ölkənin bu qədər dəstəklənməsi də həmin dəstək verən qüvvələrin, dairələrin, xüsusən də İsveçrə parlamentinin iç üzünü, simasızlığını bir daha ortaya qoyur. Biz bur daha aydın görürük ki, bu gün dünyada beynəlxalq hüquq yox, bəzi yaramaz ölkələrin ambisiyalarından irəli gələn qərəzli siyasət yürüdülür. Daha doğrusu, beynəlxalq hüquq işləmədiyi üçün bu cür siyasət yeridilir. Ona görə də, ölkəmizə qarşı bu cür yanlış yanaşmalar Azərbaycan ictimaiyyətində, Azərbaycan xalqında böyük hiddət doğurur. Təbiidir ki, biz eyni zamanda bu cür qərəzli siyasətə öyrəşmişik. Çünki bu uzun illərdir davam edir. Həmin dairələr öz layiqli cavablarını bütün sferalarda daim alıblar, bundan sonra da belə olacaq” - deyə S.Kərimli vurğuladı.
İradə SARIYEVA
