Məhəmməd Əsədullazadə: “Rusiya faktiki olaraq qonşularına münasibətdə qeyri-dost siyasət həyata keçirir.
Azərbaycan Rusiya Federasiyası ilə müttəfiqliyin vacibliyini anlayır və Moskva gələcək addımlarında Bakının bunu rəhbər tutacağını gözləyir. Bunu Rusiya xarici işlər nazirinin müavini Mixail Qaluzin deyib.
O, Bakıda "Rus Evi" və "Sputnik Azərbaycan"ın bağlanması fonunda ölkələr arasında münasibətlərə dair sualı belə cavablandırıb: “Əminəm ki, rəsmi Bakı Rusiya ilə Azərbaycan arasında müttəfiqlik münasibətlərinin əhəmiyyətini anlayır. Ümid etmək istərdim ki, azərbaycanlı tərəfdaşlarımız gələcək addımlarında münasibətlərimizin bütün spektrinə aid olan məsələlərdə liderlərimizin razılaşmalarının yerinə yetirilməsinin müstəsna əhəmiyyətini rəhbər tutacaqlar”.
Maraqlıdır, Qaluzinin bu örtülü mesajlarının arxasında nə dayanır?
“Qaluzinin bu fikrini bir növ Azərbaycana qarşı təhdid mesajı kimi qiymətləndirirəm”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Azərbaycan təkcə "Sputnik Azərbaycan"ın fəaliyyətini dayandırmayıb: “Amerikanın Səsi”, BBC-nin də fəaliyyətini dayandırıb. Yəni sözügedən informasiya vasitələrinə də eyni yanaşma sərgiləyib. Deməyim odur ki, Rusiya müttəfiqlikdən danışırsa, AZAL təyyarəsinin vurulması ilə bağlı rəsmi üzr istəsin. Hələ ki, biz Rusiyadan bunu görmürük. Rusiya buna görə məsuliyyəti öz üzərinə götürüb təzminat ödəmir. Rusiya televiziyaları Azərbaycana qarşı təbliğat aparırlar. Bununla Rusiya öz hibrid yanaşmasını davam etdirir. Deməyim odur ki, müttəfiqlik münasibətlərini Azərbaycan yox, Rusiya özü pozur. Yaxşı olardı ki, Qaluzin bizə dolayı mesaj vermək əvəzinə, bu amilə diqqət etsin. Rusiya faktiki olaraq qonşularına münasibətdə qeyri-dost siyasət həyata keçirir. Ona görə də Qaluzinin bu fikrini bir növ Azərbaycana qarşı təhdid mesajı kimi qiymətləndirirəm. Rusiya hansı müttəfiqlikdən danışır? Rusiya lazım gələndə 22 fevral 2022-ci ildə imzalanan Moskva Bəyannaməsini gündəmə gətirir, lazım gəlməyəndə bunu görməzdən gəlir. Ona görə də hesab edirəm ki, bu məsələdə Rusiya qərəzlidir və yalnız öz maraqları konteksində məsələlərə yanaşır. Bu baxımdan hesab edirəm ki, Azərbaycan öz siyasətini davam etdirməlidir və bu kimi təhdid məzmunlu açıqlamalara əhəmiyyət verməməlidir. Moskvanın istəyi odur ki, Azərbaycan geri addım atsın. Halbuki, bütün problemlər Rusiyadan qaynaqlanır”.
Vidadi ORDAHALLI
