Hüseyn İbrahimov: “Onların əsl xain məqsədi məsələni süni şəkildə beynəlxalq hüquq müstəvisinə daşımaqdır”
Ermənistanın xarici işlər naziri Ararat Mirzoyan BMT İnsan Hüquqları Şurasının Cenevrədə keçirilən sessiyasında çıxış edərkən rəsmi Bakının Ermənistanın ərazi bütövlüyünü tanımaq istəməməsindən də şikayətlənib:
“Bir il əvvəl bəyanatımda Ermənistanın qarşılaşdığı çətinliklərə geniş istinad etmişdim. Təəssüf ki, ölkəmizin böyük səylərinə baxmayaraq, həmin çətinliklərin əksəriyyəti hələ də həll olunmamış qalır. 1991-ci il Alma-Ata Bəyannaməsi əsasında qarşılıqlı olaraq ərazi bütövlüyünün tanınmasına baxmayaraq, şərq qonşumuzdan gələn bəyanatlar Ermənistanın ərazi bütövlüyünü sual altına almaqda davam edir. Bundan əlavə, hazırda 23 erməni şəxsə qarşı saxta məhkəmə prosesləri aparılır. Onlar Azərbaycanda əsassız olaraq saxlanılır və bu məhkəmələr ədalətli hüquqi prosedur standartlarına hörmətsizlik nümayiş etdirir”.
Mirzoyanın sözlərinə görə, bir il əvvəl BMT-nin İnsan Hüquqları üzrə Ali Komissarlığı Şuraya məlumat vermişdi ki, OHCHR Dağlıq Qarabağdan olan 115 mindən çox etnik erməninin vəziyyəti ilə bağlı məlumat toplamaq üçün Ermənistana iki qrup göndərəcək: “Biz inanırıq ki, bu missiyanın nəticələri barışıq işinə mühüm töhfə olacaq”.
Mirzoyanın Qarabağ ermənilərinin vəziyyətini öyrənmək üçün BMT-nin İnsan Hüquqları üzrə Ali Komissarlığından Ermənistana iki qrup göndərilməsini istəməsi erməni tərəfin yeni oyunlarından xəbər verir. Maraqlıdır, BMT-nin İnsan Hüquqları üzrə Ali Komissarlığı bu erməni oyunlarına uyacaqmı, uymalıdırmı? Erməni tərəfin bu planının arxasında nə dayanır?
“BMT Azərbaycanı məcbur etsin ki, Qarabağ erməniləri ilə bağlı üzərinə hansısa öhdəlik götürsün”
Sözügedən məsələyə aydınlıq gətirən İdarəçilik Akademiyasının müəllimi, sosioloq Hüseyn İbrahimov “Bakı-Xəbər”ə açıqlamasında bildirdi ki, ermənilərin bu istəyinin arxasında məkrli niyyət dayanır: “Əvvəla, Ermənistan yaxşı bilir ki, Azərbaycanın Qarabağda separatizmə son qoyandan və ərazi bütövlüyünü tam təmin edəndən sonra bütün dünya bunu dəstəklədi. Mirzoyan yaxşı bilir ki, separatçıların planları suya düşdü. İndi “115 min erməninin vəziyyətini” gündəmə gətirməklə istəyirlər ki, BMT-nin İnsan Hüquqları üzrə Ali Komissarlığı Azərbaycanı pisləsin. Ermənistan istəyir ki, “Qarabağ ermənilərinin hüquqlarının pozulması” adı altında Azərbaycana qarşı beynəlxalq müstəvidə sistemli təzyiqlər olsun, hansısa qərarlar qəbul edilsin. BMT Azərbaycanı məcbur etsin ki, Qarabağ erməniləri ilə bağlı üzərinə hansısa öhdəlik götürsün. Onların əsl xain məqsədi budur. Məsələni süni şəkildə beynəlxalq hüquq müstəvisinə daşısınlar. Düşünmürəm ki, onların bu planı baş tutsun. BMT-nin İnsan Hüquqları üzrə Ali Komissarlığının onların tələbini qəbul edəcəyi real görünmür. Çünki Azərbaycan Qarabağ ermənilərini oradan zorla çıxarmayıb, əmlakını qəsb etməyib. Onlar öz xoşu ilə Qarabağı tərk ediblər. Digər tərəfdən, Qarabağ ermənilərinin hüquqlarından dəm vuran Mirzoyan unutmasın ki, indiki Ermənistandan yüz minlərlə azərbaycanlı qovulub. Yaxşı olardı ki, Ermənistan onların geri qayıtmasına şərait yaratsın”.
Vidadi ORDAHALLI
