İsmayıl Tanrıverdi: “Bütün bunlar bir daha sübut edir ki, ermənilər tarixi saxtalaşıdırmaqdan əl çəkmək istəmirlər, onlara aid olmayan xəritədən də öz çirkin məqsədləri üçün istifadə etmək istəyirlər”
Ermənilər yenə qondarma xəritə oyunları ilə məşğul olurlar. İndiyə qədər ortaya xaricdə çap müxtəlif xəritələr atıb özlərinin Cənubi Qafqazda “yerli xalq” olduqlarını sübut etmək istəyirlər. Təbii ki, o xəritələrin heç birində bu ərazilərin onlara məxsusluğu göstərilmir. Buna baxmayaraq, yenə də öz əməllərindən qalmırlar.
Ermənistan mediası yazır ki, Avetik Poqosyan adlı erməni əsilli isveçrəli iş adamı İrəvan Tarix Muzeyinə 200 il əvvəl çap olunmuş dünyanın atlas xəritəsini hədiyyə edib.
Yazırlar ki, yaxın gələcəkdə bu “eksklüziv nüsxə” İrəvan Tarix Muzeyinin daimi sərgisində nümayiş olunacaq.
Xəritənin “müşakirəsi”nin videomaterialında görsənir ki, bunlar nəyisə müzakirə edirlər, İrəvanın, Naxçıvanın adlarını çəkirlər.
Bu xəritədə ermənilərin mənafeyi nöqteyi-nəzərindən nə var ki, bunu xüsusi şəkildə Ermənistanın Tarix Muzeyinə qoyublar?
“Guya bu xəritədə XVII əsrdə “Ermənistanın olduğu” göstərilib (?)”
Bakı Dövlət Universitetinin Erməni Araşdırmaları və Təlim Mərkəzinin direktoru, ermənişünas İsmayıl Tanrıverdi “Bakı-Xəbər”ə şərhində bildirdi ki, ermənilərin iddiasına görə, dünyanın atlas xəritəsində guya Ermənistan adlı dövlətin olduğu göstərilib. “Ermənilər deyirlər ki, guya bu xəritəni hansısa bir fransız hazırlayıb, sonra o İsveçrədə çap olunub, orda İrəvanın qədim şəhər olduğu göstərilir. İddia edirlər ki, bu, yeni “geosiyasi yenilikdir”. Burda İrəvanın adının o vaxt da olduğu deyirlər, XVII əsrdən danışırlar. Xəritənin 1816-cı və 1819-cu illərdə tərtib olunduğunu bildirirlər. Guya bu xəritədə XVII əsrdə “Ermənistanın olduğu” göstərilib (?). Belə cəfəng şeylərdən danışıblar”-deyə İ.Tanrıverdi bildirdi.
İ.Tanrıverdinin sözlərinə görə, xəritə ilə yaxından tanış olub və bu, növbəti erməni saxtakarlığıdır. “Bu, növbəti erməni saxtakarlığından başqa bir şey deyil. Bu xəritəni Avetik Poqosyan adlı bir erməni İsveçrədən tapıb gətirib. Yazılana görə, 1816-cı ildə bu xəritə Fransada ( ermənilər gah İsveçrə deyirlər, gah Fransa-İ.S) çap olunub. Özləri də deyirlər ki, guya yüz nüsxə çap olunub, amma indiyə qədər 7 ədəd “orjinalı” qalıb. Ruben Qaliçyan adlı bir erməni professor da bu xəritənin “orijinal” olduğunu təsdiq edib. Guya bu xəritə Ermənistanın və İrəvanın dünyanın “ən qədim dövləti və şəhəri olduğu sübut edən unuikal bir faktdır”. Təbii ki, bu belə deyil, bu növbəti erməni yalanıdır. Çünki xəritədəki Armenia indiki Ermənistan ərazisində deyil, Şərqi Anadolu ərazisində göstərilib, İrəvanın da “Armenia” yazısından nə qədər aralı olduğu əks olunub. Onlar Naxçıvanın, Ərzurumun adını çəkirlər. Ermənilər bütün Şərqi Anadolunun keçmişdə “Ermənistan” olduğunu “təsdiq etməyə” çalışırlar, bu isə tamamilə saxtakarlıqdır. Bu saxtakarlıqlarını öz alimləri ifşa edir. Məsələn, Ukraynada yaşayan erməni əsilli tarixçi Filip Ekozyants da təsdiq edir ki, “Armenia” sadəcə coğrafi addır, “Armenia” sözünün indiki Ermənistan dövlətinə heç bir aidiyyəti yoxdur. Yeri gəlmişkən, bu yaxınlarda Ermənistanın adı ilə bağlı erməni tarixçilərinin arasında bir mübahisə düşdü. Bir qisim tarixçi təklif etmişdi ki, gəlin, Hayastan sözünü tamamilə götürüb onu Armenia sözü ilə əvəzləyək, “çünki bizim Armenia adlı dövlətimiz olub”, amma razılığa gələ bilmədilər, erməni alimlərinin əkəsriyyəti bu təklifin əleyhinə çıxdı “biz Hayastan deyək, qoy başqaları Armenia desinlər, elə bunun özü sübutdur”-dedilər.
Bu xəritədə söhbət 1816-cı ildən gedir. Halbuki, həmin ərazilər 1812-ci ildən sonra Rusiyanın tərkibində olub. Bilirsiz ki, o dövrdə də Ermənistan yox idi və heç vaxt ayrıca bir dövlət şəklində olmayıb. Deyirlər ki, guya “xəritəşünas” Adrian Hibert Brya bu xəritəni təşkil edib, bu xəritəni ermənilər “istisna unikal xəritə” kimi qəbul edirlər. Bütün dünyaya sübut etmək istəyirlər ki, guya bu, “Ermənistanın keçmiş tarixini bir daha göstərir”.
Bir də ermənilər Mesrop Maştoç adına qədim Əlyazmalar və Araşdırmalar İnstitutunda bu xəritənin yenidən çap olunması və bütün dünyaya yayılması üçün hərəkətə keçiblər. Bu xəritənin isə İrəvan Tarix Muzeyində qorunub saxlanılmasını təşkil ediblər. Ermənistanda olan məktəblərdə və universitetlərdə bu xəritədən tədris vəsaiti kimi istifadə etmək istəyirlər.
Fikir verirsizsə, xəritədə Araz çayı Araz yazılıb, ermənilər isə ona “Araks” deyirlər. O xəritədə ermənilərin istifadə etdiyi sözlərin heç biri qeyd olunmayıb. Bəhanə gətirirlər ki, sözlər fransız dilində yazılıb, fransızcadan erməni dilinə tərcümə edəndə yenə o sözlər qalıb.
Bütün bunlar bir daha sübut edir ki, ermənilər tarixi saxtalaşıdırmaqdan əl çəkmək istəmirlər, onlara aid olmayan xəritədən də öz çirkin məqsədləri üçün istifadə etmək istəyirlər” - deyə İ.Tanverdi bildirdi.
İradə SARIYEVA
