Bakıdakı "Maydonoz Dönər" şəbəkələri adi iş günlərindən birini yaşayır və Turkiyədəki əməliyyatdan xəbərləri yoxdur
Türkiyə mediasınin yaydığı məlumata görə, ölkədə "Maydonoz Dönər" restoranlar şəbəkəsinə qarşı genişmiqyaslı əməliyyat keçirilib. "Kıskaç-40" adlı əməliyyat çərçivəsində 31 vilayətdə aparılan əməliyyatlarda, 10-u dövlət qulluqçusu olmaqla, 353 şübhəli şəxs qismində saxlanılıb.
Türkiyədə hüquq-mühafizə orqanları tərəfindən aparılan araşdırmalara görə, "Maydonoz Dönər" adlı dönər ticarəti şəbəkəsinin "Franchise" sistemi vasitəsilə FETÖ-yə maliyyə dəstəyi göstərdiyi məlum olub. "Franchise" sistemi vasitəsilə qeyri-rəsmi ortaqlıqlar qurulub və təşkilatla əlaqəsi olan şəxslərə ödəniş müqabilində imkanlar təqdim olunub.
Ciddi şübhə doğuran məqamlardan biri də odur ki, tərəfdaşlıqlar yalnız təşkilati etimada əsaslanaraq, heç bir rəsmi sənəd olmadan həyata keçirilib.
Filiallar FETÖ-yə bağlı şəxsləri işlə təmin etmək və onlardan ianələr toplamaq üçün istifadə edilib. Təşkilata bağlı biznesmenlər vasitəsilə əldə olunan gəlir qeyri-rəsmi yollarla terror şəbəkəsinə ötürülüb. Xaricdə yeni dilerliklər yaradılaraq, beynəlxalq maliyyə axınlarına şərait yaradılıb.
Qardaş Türkiyədə FETÖ və digər terror təşkilatlarının maliyyə mənbələrinə qarşı mübarizə qətiyyətlə davam etdirilir. Bu şəbəkəyə aid dönərçilərdən birinin Bakının Həsən Əliyev küçəsi 335, digərinin isə Zahid Xəlilov 23 (Elmlər Akademiyası) ünvanında olduğu təsbit edilib. Hazırda Bakıda fəaliyyət göstərən "Maydonoz Dönər" restoranlarının bu əməliyyata daxil olub-olmayacağı bəlli deyil.
Zahid Xəlilov 23 (Elmlər Akademiyası) ünvanında yerləşən "Maydonoz Dönər" şəbəkəsi ilə əlaqə saxladıq. Telefonu qaldıran xanım bildirdi ki, onlarda bununla bağlı heç bir məlumat yoxdur: "Biz indi adi iş günlərindən birini yasayırıq və Türkiyədəki "Maydonoz Dönər"lə bağlı əməliyyatdan da xəbərimiz yoxdur. İndi obyektdə rəhbərlikdən heç kim yoxdur. Əgər gün ərzində rəhbərlikdən kimsə tucarət səbəkəsinə yaxınlaşarsa, sizinlə əlaqə saxlamaları barədə onlara məlumat verərik".
Lakin bizimlə danışan xanım nə özünü təqdim etdi, nə də bizə rəhbərlikdən kiminsə əlaqə telefonunu verdi. Xanım bildirdi ki, buna onun icazəsi yoxdur.
Daxili İşlər Nazirliyinin (DİN) mətbuat xidmətinin rəhbəri Elşad Hacıyev isə bizimlə söhbətində bildirdi ki, DİN-də bununla bağlı heç bir məlumat yoxdur, gün ərzində yenilik olsa, bu barədə sizə informasiya verəcəyik.
Onu da qeyd edək ki, Türkiyədə eyni adlı dönər ticarət şəbəkəsində bu cür genişmiqyaslı əməliyyat keçirilirsə və Bakıda fəaliyyət göstərən "Maydonoz Dönər" ticarət səbəkəsi də Turkiyədə araşdırılan şəbəkənin törəmə şirkətidirsə, onda onlara qarşi da analoji axtarış-təhqiqat işi aparılmalıdır. Yox, əgər Türkiyədəki "Maydonoz Dönər" tucarət şəbəkəsinin Bakıdakı eyni adlı ticarət səbəkəsi ilə heç bir əlaqəsi yoxdursa, Azərbaycanın müvafiq hüquq-mühafizə orqanları bu barədə də ictimaiyyətə məlumat verməlidir. Hələ ki, DİN və digər hüquq-mühafizə orqanları bununla bağlı heç bir məlumat yaymayıb.
Akif NƏSİRLİ
