Əli Orucov: "Trampın o fikri ilə razıyam ki, Co Bayden Birləşmiş Ştatların ən uğursuz prezidenti kimi tarixə düşdü"
Mühafizəkarların Siyasi Fəaliyyət Konfransında çıxış edən Donald Tramp Kamala Harris üzərində qələbəsinə və Co Baydenin prezidentlik yarışından kənarlaşdırılmasına işarə edərək, “mən yeganə şəxsəm ki, iki adama qalib gəlməli oldum” deyib. Bir neçə dəqiqə sonra Tramp Baydeni ABŞ tarixinin “ən pis” prezidenti adlandırıb.
Donald Tramp bu fikirlərində nə dərəcədə haqlıdır? O, doğrudanmı Kamala Harris və Co Baydenə qarşi mübarizə aparıb? Doğrudanmı Co Bayden ABŞ-nin ən pis prezidentidir?
Baki-xeber.com saytıniň suallarını cavablandıran politoloq Əli Orucov bildirdi ki, Tramp tarixdə ilk dəfə iki namizədə qalib gəlməsi barədə deyərkən bir qədər şişirtməyə yol verib: "Demokratların namizədi Co Bayden səhhəti ilə bağlı marafonu vitse-prezident Kamala Harrisə ötürmək məcburiyyətində qaldı. Əgər əvvəldən Harrisin namizədliyi irəli sürülsəydi, bəlkə də nəticələr fərqli ola bilərdi. Demokratlar vacib olan vaxtı itirdilər. Bu da Trampın qalib gəlməsinə səbəb olan şərtlərdən biri oldu. Trampın o fikri ilə razıyam ki, Co Bayden Birləşmiş Ştatların ən uğursuz prezidenti kimi tarixə düşdü. Onun hakimiyyəti dövründə Birləşmiş Ştatların beynəlxalq arenada nüfuzuna xeyli ziyan gəldi. Astagəlliyi və qətiyyətsizliyi ucbatından Ukrayna bugünkü ağır duruma salınıb. Vaxtında Kiyevə vəd olunanlar yerinə yetirilsəydi təcavüzkar çoxdan kaputilyasiyaya gedərdi. Qərb də, postsovet məkanı da Kremlin təhdidlərindən qurtarardı. Bayden həm də çox bərbad siyasi və iqtisadi miras qoydu özündən sonra. Haqlı olaraq cənab prezident İ.Əliyev müsahibələrinin birində Baydenin prezidentlik dönəmini itirilmiş 4 il kimi xarakterizə etdi. Onun dönəmində Azərbaycanla Birləşmiş Ştatlar arasında münasibətlər pisləşdi, haqsız və ədalətsiz, qərəzli mövqeyi ucbatından Vaşinqtonun etimadına ciddi xələl gətirdi. Cənubi Qafqazda sülh prosesi ləngidildi. Çünki Bayden və ətrafı, komandasının ən yaxın üzvlərinin bir çoxu erməni lobbisinin təsirindən çıxa bilmədi. Nəticədə Ermənistan hakimiyyəti cürətlənərək müxtəlif bəhanələrlə sülh müqaviləsi imzalamaqdan yayınırdı. Ümid edək ki, Tramp iqtidarı praqmatik yanaşaraq Baydendən qalma dağıdıcı mirası aradan qaldıracaq və Azərbaycanla ABŞ arasında münasibətlər normal və qarşılıqlı maraqlara uyğun tənzimlənəcək".
Dəniz NƏSİRLİ
