Mətin Məmmədli: “Azərbaycan-Türkiyə-Pakistan hərbi-müdafiə ittifaqı yaradılması üçün kifayət qədər münbit bir zəmin formalaşıb”
Pakistanın Baş naziri Məhəmməd Şahbaz Şərif Azərbaycanda səfərdədir. Bu, Pakistan-Azərbaycan münasibətləri üçün nə deməkdir və iki ölkənin perspektiv münasibətlərində nə kimi imkanlar var?
Azərbaycanın Pakistan üçün nə önəmi var? Gələcəkdə Azərbaycan-Pakistan-Türkiyə hərbi-müdafiə ittifaq sazişinin imzalanması mümkündürmü?
“Gələcəkdə üç ölkə arasında hərbi-müdafiə ittifaqı sazişi imzalanması mümkündür”
Beynəlxalq Münasibətlərin Təhlili Mərkəzinin eksperti, siyasi elmlər üzrə fəlsəfə doktoru Mətin Məmmədli "Bakı-Xəbər"ə şərhində ilk növbədə onu qeyd etdi ki, Azərbaycanın xarici siyasətində Pakistan xüsusi yer tutur, bu da səbəbsiz deyil. “Pakistan Azərbaycanın dövlət müstəqilliyini tanıyan ilk dövlətlərdən biridir. Biz dövlət müstəqilliyimizi bərpa etdikdən sonra Pakistanla müxtəlif sahələrdə ən yüksək səviyyədə münasibətlər formalaşdırmışıq və Pakistan Azərbaycanın ərazi bütövlüyünü tanıyan, Ermənistanı işğalçı kimi qəbul edən çox azsaylı dövlətlərdən biri olub, hər zaman Azərbaycanın haqlı mövqeyini dəstəkləyib. Yəni Ermənistanla münaqişədə Azərbaycanın haqlı mövqeyini müdafiə edib. Bununla yanaşı, Pakistanı bizim üçün cəlbedici edən digər məsələlər də var. Nəzərə almaq lazımdır ki, Pakistan böyük dövlətdir, regional dövlətdir, güclü orduya, güclü hərbi potensiala sahibdir. Yəni müsəlman dünyasının ən böyük dövlətlərindən biridir, islam aləmində nüvə silahına malik yeganə ölkədir. Belə bir dövlətlə əlaqələri inkişaf etdirmək, tərəfdaşlıq, hətta müttəfiqlik səviyyəsinə yüksəltmək müəyyən mənada Azərbaycanın geosiyasi maraqlarına da cavab verir”.
M.Məmmədlinin sözlərinə görə, həmçinin Azərbaycan da Pakistanın xarici siyasətində mühüm yer tutur. M.Məmmədlinin bildirdiyinə görə, biz Pakistanın xarici siyasətinə nəzər salarkən aydın görə bilərik ki, Pakistan, rəsmi İslamabad hər zaman müsəlman dövlətləri ilə əlaqələrin inkişaf etdirilməsi strategiyasını həyata keçirir. “Xüsusilə Türkiyə və Azərbaycan başda olmaqla türk dövlətləri ilə münasibətlərə xüsusi önəm verir. Bu gün baxsaq görərik ki, Pakistanla Türkiyə arasındakı münasibətlər kifayət qədər yüksək səviyyədədir, hər zaman belə olub. Eyni zamanda da Azərbaycanla münasibətləri bu cürdür. Biz dövlət müstəqilliyimizi bərpa etdikdən sonra Pakistan bizə xüsusi yanaşıb. Qeyd etdiyim kimi, Pakistan sıradan bir dövlət deyil, regional dövlətdir. Eyni zamanda Azərbaycan Cənubi Qafqazın lider dövlətidir və belə bir ölkə ilə münasibət qurmaq həm də Pakistanın geosiyasi maraqlarına cavab verir. Eyni zamanda iqtisadi sahədə, enerji sahəsində əlaqələrin inkişaf etdirilməsi də rəsmi İslamabadın geoiqtisadi, geosiyası maraqlarına uyğundur. Bu istiqamətdə, bu kontektdə də hesab edirəm ki, Pakistan Azərbaycanla münasibətləri inkişaf etdirməkdə maraqlıdır. Əlbəttə, gələcəkdə üç ölkə arasında hərbi-müdafiə ittifaqı sazişi imzalanması mümkündür. Onsuz da bu üç ölkə arasında ən yüksək səviyyədə görüşlər, hərbi təlimlər keçirilib. Yəni Azərbaycan-Türkiyə-Pakistan hərbi-müdafiə ittifaqı yaradılması üçün kifayət qədər münbit bir zəmin formalaşıb. Biz bunu gələcəkdə mümkün ehtimallardan biri kimi qəbul edə bilərik”-deyə M.Məmmədli vurğuladı.
İradə SARIYEVA
