Qulamhüseyn Əlibəyli: “Bununla ABŞ-a göstərirlər ki, Rusiya məsələsində biz Trampla deyilik”
Avropa İttifaqının daimi nümayəndələri Rusiyaya qarşı 16-cı məhdudlaşdırıcı tədbirlər paketi barədə razılığa gəliblər.
Yeni məhdudlaşdırıcı tədbirlərə Aİ ölkələri tərəfindən Rusiya alüminium məhsullarının alınmasına tədricən qadağa daxildir. Rusiyadan neft ixracına da məhdudiyyətlər sərtləşdiriləcək. Sanksiyalar, həmçinin, Rusiyanın “kölgə donanması” adlanan və məhdudiyyətlərdən yayınaraq neft ticarəti üçün istifadə olunduğu güman edilən 73 tankeri hədəf alacaq. Həmçinin 13 bank “qara siyahı”da olacaq. 13 Rusiya bankı Aİ-nin 16-cı sanksiyalar paketi çərçivəsində SWIFT beynəlxalq ödəniş sistemindən kənarlaşdırılacaq. Bundan əvvəl “Uralsib” və “Toçka” da daxil olmaqla 15 Rusiya bankının sanksiyalara məruz qala biləcəyi bildirilirdi. Yeni sanksiyalar paketi, həmçinin, Rusiyanın daha səkkiz KİV-nin Avropada yayımının qadağan edilməsini əhatə edir. Üstəlik, G7 ölkələri Rusiyanın neft sənayesinə qarşı sanksiyaların sərtləşdirilməsi imkanlarını nəzərdən keçirir. Belə ki, Rusiya neftinin hazırda bir barel üçün 60 dollar səviyyəsində müəyyən edilən “qiymət tavanını” dəyişə bilərlər. Yəni aşağı salınacaq.
Ümumilikdə, Trampın Rusiya ilə danışıqları aktivləşdirdiyi bir vaxtda, Avroittifaqın növbəti sanksiyalar paketi qəbul etməsinin nə kimi mesajı var?
“Bütün bunlar uzun illərdir Aİ ilə ABŞ arasında olan birgə fəaliyyətə ciddi zərbə olacaq”
Sözügedən məsələyə aydınlıq gətirən sabiq millət vəkili, hüquqşünas Qulamhüseyn Əlibəyli “Bakı-Xəbər”ə açıqlamasında bununla bağlı bir sıra məqamlara toxundu: “Avroittifaqın Rusiyaya qarşı növbəti məhdudlaşdırıcı tədbirlər paketi bir tərəfdən əvvəlki sanksiyaların davamı kimi qiymətləndirilə bilər. İkinci tərəfdən isə, bütövlükdə Avropa İttifaqının Tramp administrasiyasına qarşı olan cavabı kimi də qiymətləndirmək olar. Məlum olduğu kimi, Tramp administrasiyası səlahiyyətlərini icra etməyə başlayandan sonra Rusiya ilə birtərəfli danışıqlara başladı. Ukrayna və Aİ-ni kənarda qoymaqla, birtərəfli formada ABŞ Rusiya ilə danışıqlar apardı. Eyni zamanda yaxın həftələrdə Trampla Putinin görüşü planlaşdırılır. Bununla yanaşı, Tramp və digər ABŞ rəsmiləri Aİ-ni kəskin tənqid tənqid etdilər. Vitse prezident Ceydi Vens Münhen Təhlükəsizlik Konfransında açıq-aşkar Aİ-ni tənqid etdi. Görünən odur ki, ABŞ-la Aİ-nin münasibətləri pisləşməkdədir. Məhz buna cavab olaraq Aİ Rusiyaya qarşı növbəti sanksiyalar paketi qəbul edib. Bununla ABŞ-a göstərirlər ki, Rusiya məsələsində biz Trampla deyilik. Məhz fevralın 24-nə bunun planlaşdırılması Trampa cavabdır. Çünki həmin gün Rusiyanın Ukraynaya hücum etməsinin 3 ili tamam olur. Aİ bununla ABŞ-a göstərir ki, Ukrayna məsələsində Trampı dəstəkləməyəcək. Tramp uzun illərdir ABŞ-la Aİ arasında mövcud olan geosiyasi sistemi faktiki olaraq dağıdır. Ona görə də Aİ bu cür sanksiyalar qəbul edərək Trampa mesaj verir. Bütün bunlar uzun illərdir Aİ ilə ABŞ arasında olan birgə fəaliyyətə ciddi zərbə olacaq. Ona görə də bu, Avroittifaqın bir cavab tədbiri kimi qiymətləndirilməlidir. Hesab edirəm tərəflər arasında gərginləşmə davam edəcək”.
Vidadi ORDAHALLI
