Tural İsmayılov: “Marko Rubio ABŞ dövlət katibi olana qədər qalmaqallı siyasi bəyanatları, açıqlamaları ilə yadda qalıb, onun haqqında...”
2022-ci ildə genişmiqyaslı Rusiya-Ukrayna müharibəsi başlayanda Marko Rubio Florida ştatından senator və Senatın Kəşfiyyat Komitəsinin sədr müavini idi.
Davamlı olaraq çox sərt bəyanatlar verən Rubio israrla qeyd edirdi ki, ABŞ Ukraynanı bütün gücü ilə dəstəkləməlidir. Vladimir Putini yalançı və hərbi cinayətkar adlandıran Marko Rubio onunla danışıqlara cəhd edənləri ələ salırdı. Üç il sonra Marko Rubio ABŞ Dövlət Katibi oldu və ritorikası, düşüncəsi dəyişdi.
Qeyd edək ki, 18 fevral 2025-ci il tarixində Marko Rubio Ər-Riyadda Rusiya ilə danışıqlarda Amerika nümayəndə heyətinə başçılıq edir. Danışıqlar qurtardıqdan sonra isə bəyan edir ki, istənilən münaqişəyə son qoymaq üçün bütün tərəflər güzəştə getməlidir. Əgər bu münaqişə məqbul şəkildə başa çatarsa, Rusiya ilə tərəfdaşlıq üçün inanılmaz imkanlar yaranar.
Maraqlıdır, Marko Rubionun fikir dəyişikliyinə səbəb nədir?
“Marko Rubionun bu gün Tramp tərəfindən Ukrayna-Rusiya danışıqlarında vasitəçi qismində iştirak etməsi ABŞ prezidentinin təlimatları ilə baş verir”
Siyasi şərhçi Tural İsmayılov “Bakı-Xəbər”ə açıqlamasında qeyd etdi ki, Marko Rubio hazırda Amerikada Donald Trampın dövlət katibi vəzifəsini daşıyır: “Onun Rusiya-Ukrayna müharibəsi ilə bağlı fikirlərinin 3 il ərzində dəyişdiyini düşünmürəm. Ancaq ABŞ-da elə siyasətçilər, konqresmenlər var ki, onların dünya siyasətinə yanaşması, hadisələrə qarşı mövqeyi daim qeyri-səmimi olur. Marko Rubio ABŞ dövlət katibi olana qədər qalmaqallı siyasi bəyanatları, açıqlamaları ilə yadda qalıb. Onun haqqında həmişə müxtəlif fikirlər, müzakirələr aparılıb. O da məlumdur ki, bir müddət əvvəl adıçəkilən şəxsin erməni lobbisi ilə əlaqəsi olub”.
Həmsöhbətimiz hesab edir ki, Marko Rubionun bu gün Tramp tərəfindən Ukrayna-Rusiya danışıqlarında vasitəçi qismində iştirak etməsi ABŞ prezidentinin təlimatları ilə baş verir. Rubio bir neçə il əvvəl fərqli mövqeləri bölüşsə də, bu gün Amerikanın vahid dövlət siyasətini həyata keçirir. Bu baxımdan da Marko Rubionun ortaya qoyduğu mövqe konfidensial və savaşın bitməsinə yönəlik Tramp siyasətinin icraedicisi qismindədir.
Günel CƏLİLOVA
