Zərdüşt Əlizadə: "...hökumət Gürcüstanın ərazisini işğal edən Rusiya ilə eyni masa arxasında oturub müzakirə etməklə gürcu xalqına xəyanət edir"
Gürcüstan parlamentinin vitse-spikeri Giya Volski gələcəkdə Gürcüstanın “3+3” məsləhətçi regional platforma formatının işində iştirakının mümkünlüyünü istisna etməyib.
"Gələcəkdə bu tamamilə mümkündür, lakin indiki mərhələdə bu məsələ gündəmdə deyil, Gürcüstanın bu formatda marağı, iqtisadi və siyasi iştiraka hazır olması üçün heç bir ilkin şərt yoxdur", - Volski jurnalistlərə bildirib.
Əvvəllər Gürcüstan bu formatdan imtina edirdi. Amma indi münasibət dəyişib. Bunu Trampın Ukrayna müharibəsi ilə bağlı Rusiyaya təzyiqlərini azaltmasının nəticəsi saymaq olarmı? Çünki Rusiya da bir qədər əvvəl Gürcüstana mesaj vermişdi ki, "3+3" formatını aktivləşdirmək lazımdır. Bir də ki, Gürcüstanın bu razılığı nəyi dəyişə bilər?
Baki-xeber.com saytına açıqlamasında politoloq Zərdüşt Əlizadə bildirdi ki, Gürcüstanın mövqeinin bu şəkildə dəyişməsinin Rusiya ilə Amerika arasındakı münasibətlərlə heç bir bağlılığı yoxdur: "Gürcüstan hakimiyyətinin mövqeini dəyişən daxili amillərdir. Birincisi, "3+3" formatı o qədər də həlledici danışıq platforması deyil, məşvərətçi statusa malikdir. Bu formatda indiyə qədər cəmi 3 görüş baş tutub. Bu məşvərət formatının əsas təşəbbüskarı Rusiya və İran olub. Yəni bu formatda 3 Cənubi Qafqaz ölkəsi - Azərbaycan, Ermənistan və Gürcüstan - üstəgəl, regiona qonşu olan Rusiya, İran və Türkiyə ildə bir dəfə toplanıb məşvərət edir. Bu format güclənərək regiona kənar aktorların buraxılmaması məqsədi güdür.
Əvvəllər Gürcüstan daxilində hökumətlə prezident arasında bir cəkişmə var idi, hökumət prezidentə müxalif idi. Ona görə də "Gürcü Arzusu" "3+3" formatından imtina edirdi ki, prezidentin tərəfdarları bundan hökumətə qarşı kompromat kimi istifadə edə bilməsin. "Gürcü arzusu" partiyasının təmsilçisi olan hökumət "3+3" formatında keçirilan danışıqlarda iştirak qərarı versəydi, dərhal prezidentin tərəfdarları xalqı etiraza səsləyəcəydi ki, ay aman, qoymayın, hökumət Gürcüstanın ərazisini işğal edən Rusiya ilə eyni masa arxasında oturub müzakirə etməklə gürcu xalqına xəyanət edir. Bu isə hakimiyyəti tam şəkildə ələ almağı hədəfləyən "Gürcu arzusu" partiyası üçün arzuolunan deyildi.
İndi isə, artıq "Gürcu arzusu" partiyası parlament seçkilərini saxtalaşdıraraq qalib gəlib, prezident seçkilərini də udub, müxalifəti sındıraraq, seçkiləri təftiş etməkdən kənarlaşdırıb. Artıq "Gürcü arzusu" öz arzularıni həyata keçirməyə başlayib: Avropaya və ABŞ-yə çıxmaq üçün qapını göstərir, Rusiya ilə münasibət qurur. Belə bir şəraitdə artıq Gürcüstan hökumətini "3+3" formatında təmsil olunmaq ücün heç bir təhlükə gözlənir. Bu səbəbdən də Gürcüstan parlamentinin vitse-spikeri belə cəsarətli bəyanat verir.
Gürcüstanın bu formatda keçirilən məşvərətlərdə iştirakı heç nəyə zərər vermir, əksinə, region problemlərinin həllinə müəyyən töhfələr verə bilər".
Dəniz NƏSİRLİ
