Azər Həsrət: “SSRİ-nin Dövlət Təhlükəsizlik Komitəsi o vaxt millətlərarası münaqişəni alovlandırırdı”
Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və digər çoxsaylı cinayətlər törətməkdə təqsirləndirilən Ermənistan Respublikasının vətəndaşları barəsində olan cinayəti işləri üzrə məhkəmə prosesi davam edir.
Məhkəmə prosesi zamanı təqsirləndirilən şəxslərdən Arayik Harutyunyan bildirib ki, son 34 il ərzində Qarabağda hansı proseslərin baş verməsindən xəbərdardır: “Təəssüf edirəm. Münaqişə Sovet İttifaqının xüsusi xidmət orqanları tərəfindən təhrik edilib. Ona görə də biz özümüzü qurban hesab edirik”.
Harutyunyanın Sovet İttifaqının xüsusi xidmət orqanları ilə bağlı fikri nə dərəcədə əsaslıdır?
“Ermənilərin azərbaycanlılara qarşı bu cür hərəkətlərinin arxasında xüsusi xidmət orqanları dayanıb”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, SSRİ-nin Dövlət Təhlükəsizlik Komitəsi o vaxt millətlərarası münaqişəni alovlandırırdı: “Xatırladım ki, 1988-ci ilin fevral ayında Sumqayıt şəhərində ermənilərə qarşı hücumlar təşkil edildi. Həmin hücumu dünyaya azərbaycanlıların etməsi kimi təqdim etdilər. Sonrakı mərhələdə aşkar edildi ki, hücumun başında duran Qriqoryan adlı erməni imiş. Həmin Qriqoryanın Dövlət Təhlükəsizliyi Komitəsi tərəfindən ortaya atıldığı öz təsdiqini tapdı. Ümumiyyətlə, ermənilərin azərbaycanlılara qarşı bu cür hərəkətlərinin arxasında qeyd edilən komitə dayanıb. Ancaq onlar məsuluyyəti öz üzərindən ata bilməz. Çünki Dövlət Təhlükəsizliyi Komitəsini buna sövq edən məhz onların özləri olub. Məlumat üçün deyim ki, Aqambekyan Parisdə Qarabağa azadlıq tələb edəndə hələ hadisələr bizim coğrafiyamızda cərəyan etmirdi. Ona görə də DTK-nı rüşvətlə, tanışlıqla ələ almışdılar. DTK da məlum məsələləri bu cür alovlandırırdı və ermənilər də bundan ruhlanırdı. Nəticədə ermənilər Azərbaycan torpaqlarını işğal etdi, Xocalı faciəsi kimi dəhşəti bizə yaşatdılar. Onu da deyim ki, 1992-ci ilin 26 fevral tarixində Xocalıda törədilən hadisələrdə sadəcə ermənilər deyil, ruslar da iştirak edib. Bu səbəbdən də məsuliyyəti ermənilərlə yanaşı, ruslar da daşıyır”.
Günel CƏLİLOVA
