Rəsul Cahangirli: “Həcc ziyarəti ilə bağlı belə qiymət artımı rəzalətdir”
Bu il Həcc ziyarətində qiymətdə artım, kvotada isə azalma var. Belə ki, bir nəfər üçün ziyarət paketinin qiyməti 5 min 950 dollar təşkil edir. Ziyarət vahid formada təşkil olunacaq və hava nəqliyyatı ilə həyata keçiriləcək.
Halbuki, ötən il bir nəfər üçün ziyarət paketinin qiyməti 5 min 850 dollar idi. Göründüyü kimi, ötən illə müqayisədə ziyarətin qiyməti 100 dollar artıb. Ümumiyyətlə, son altı ildə ziyarətin qiyməti 1 min 400 dollardan çox artıb. Üstəlik, keçən ilə nəzərən bu il kvota da az nəzərdə tutulub.
Burada paradoks doğuran məqam odur ki, son illər Azərbaycandan Həccə gedən zəvvarların sayı azalıb, ölkəyə ayrılan kvotanın da sayı azalır, ancaq buna rəğmən qiymətlər durmadan artır. Adətən tələbat böyük olanda qiymətlər artır. Bizdə isə əksinədir. Gedənlər azalır, qiymət isə 6 il ərzində 1400 dollar artıb. Yəni ziyarət edənlərin sayının azalmasına görə Həcc qiymətlərini qaldırıb itkilərini konpensasiya etmək istəyirlər. Bu isə faktiki olaraq biabırçılıqdır. Bu, açıq-aşkar göstərir ki, bəziləri Həccə qazanc mənbəyi kimi baxır.
“Hesab edirəm ki, bu sahədə illərdir mövcud olan inhisarçılıq ortadan qaldırılmalıdır”
Sözügedən məsələ ilə bağlı fikirlərini “Bakı-Xəbər”lə bölüşən ekspert Rəsul Cahangirli hesab edir ki, Həcc ziyarəti ilə bağlı belə qiymət artımı rəzalətdir: “Ən azından ona görə ki, müqəddəs məkana ziyarəti biznesə çevirmək nə Allaha, nə də bəndəyə xoş gedər. Mənəvi nöqteyi-nəzərdən bu kimi məsələlərə son dərəcə həssas yanaşmaq lazımdır. Əksinə, bütün vasitələrlə çalışmaq lazımdır ki, qiymətlər hamı üçün münasib olsun. O qədər mömin adamlar var ki, müqəddəs məkanı ziyarət etməyə imkanı yoxdur. Eləsi var ki, illərlə bunu arzulayır, amma hər il qiymətlər qalxdığı üçün ziyarət istəyini reallaşdıra bilmir. Eləsi də var ki, pulu çoxdur, 10 dəfə Həccə gedir. On dəfə Həccə getməkdənsə, 3 mömin kasıbı ziyarətə göndərmək, cəmiyyət üçün xeyriyyə məqsədli işlər görmək daha savabdır. Təəssüf doğuran digər məsələ isə onunla əlaqədardır ki, Həcc ziyarəti ilə yalnız Qafqaz Müsəlmanları İdarəsi məşğul olur. Sanki bu sahəni inhisara alıb. Halbuki, Həcc ziyarəti ilə bir sıra şirkətlər məşğul olsa, qiymət bu qədər yüksək olmaz. Bu da Azərbaycan vətəndaşlarına seçim imkanı yaradacaq. Bu baxımdan hesab edirəm ki, Həcc ziyarətində illərdir mövcud olan inhisarçılıq ortadan qaldırılmalıdır. Yoxsa qiymətləri qaldırmaqla daha çox pul qazanmaq qəbuledilməzdir”.
Vidadi ORDAHALLI
