Elşad Musayev: “Bu gün faktiki olaraq Ukrayna qurban verilir”
Rusiya Ukrayna şəhərlərini qısa müddətdə məhv edə bilər, amma bunu istəmir. Bunu ABŞ prezidenti Donald Tramp Mar-a-Laqodakı malikanəsində jurnalistlərə açıqlamasında bildirib.
Daha sonra Tramp bunları qeyd edib: “Onlar Kiyevi bombalamadılar, çünki düşünürəm ki, ora çoxlu raket atmaq istəmirlər. Bu prosesi cəmi 20% həyata keçirdilər, 100% yox. Əgər onlar bunu 100% etmək istəsəydilər, yəqin ki, bu, çox tez bir şəkildə baş verərdi. Amma Ukraynada elə şəhərlər var ki, tamamilə dağıdılıb”.
Tramp Zelenskiyə də müraciət edərək, onun Ukraynanın danışıqlar masasına buraxılmaması ilə bağlı bəyanatını xatırladıb: “3 ildir bu işlə məşğulsan. Bunu 3 il əvvəl bitirməliydin, heç başlamamalıydın. Razılaşa bilərdin”. Onun fikrincə, bu razılaşma Ukrayna şəhərlərinin toxunulmaz qalmasına, insan itkilərinin baş verməməsinə və ölkənin, demək olar ki, bütün ərazilərini saxlamasına imkan verərdi.
Tramp məsulyətsizcəsinə Zelenskiyə deyir ki, müharibədən qaçmalıydın və buna imkan verməməliydin. Halbuki, Rusiya hələ Zelenskidən illər öncə Ukraynanın bir hissəsini işğal edib. O üzdən, Tramp Zelenskiyə bu mesajı verməklə haqlıdırmı? Digər tərəfdən, Rusiyanın Ukrayna şəhərlərini qısa müddətdə məhv edə bilər deməsi, əslində Trampın Ukrayna xalqını Rusiyanın qarşısında qorxutmaq və təslimçiliyə sövq etmək cəhdi deyilmi?
“Bu səbəbdən Tramp bu ölkəyə təzyiq göstərərək Zelenskini aşağılayır”
Sözügedən məsələyə aydınlıq gətirən Böyük Azərbaycan Partiyasının sədri, millət vəkili Elşad Musayev “Bakı-Xəbər”ə açıqlamasında bildirdi ki, illər əvvəl müharibənin dayandırılmasının daha çox Rusiya-ABŞ anlaşmasından keçdiyini deyib: “Ehtimal bu yöndə idi. Çünki müharibənin başlanmasında maraqlı olan, Rusiyanı bataqlığa sürüyən, Ukraynanı ölümün cənginə atan ABŞ olub. Əsas məqsəd də ondan ibarət idi ki, ABŞ-ın əsas rəqibi Çindir. Çini zəiflətmək üçün Rusiyanı ondan qoparmaq lazımdır. ABŞ Avropa İttifaqını bu prosesə qoşdu. Ukraynada hakimiyyət dəyişikliyində ABŞ-ın böyük rolu var idi. Zelenskini 2019-cu ildə prezident postuna gətirdilər. Nəticədə elə şərait yaratdılar ki, 2022-ci ilin 24 fevralında Rusiya Ukraynaya qarşı genişmiqyaslı əməliyyatlara başladı. İndi elə vəziyyət yaranıb ki, nə Ukrayna, nə də Rusiya müharibəni davam etdirmək iqtidarındadır. Bir-birini zəiflədiblər. Ona görə də ABŞ Rusiya ilə danışıqlara gedir və öz istəyinə uyğun siyasət həyata keçirməyə məcbur edir. Paralel olaraq bu gün faktiki Ukrayna qurban verilir. Bu səbəbdən Tramp Ukraynaya təzyiq göstərərək Zelenskini aşağılayır. Hər şey göz qabağındadır. Ukraynanın 500 milyard dolarlıq faydalı qazıntılarına yiyələnmək istəyi də bununla bağlıdır. Bütün bunlardan sonra ABŞ bütün vasitələrlə Ukraynanı Rusiya ilə barışığa sövq edəcək. Tramp açıq şəkildə Ukraynanı təslim olmağa çağırır. Ukraynanın 20 faiz ərazisi işğal altındadır. Belə görünür ki, həmin ərazilər Rusiyanın işğalı altında qalacaq. ABŞ öz istəyinə uyğun Rusiyanı qismən Çindən ayıracaq. Ən nəhayət, Ukrayna ilə Rusiya arasında sülh müqaviləsi imzalamağa çalışacaq. Daha sonra Tramp Zelenskini başqası ilə əvəzləməkdə qərarlı görünür. Təəssüf ki, Ukrayna dünyanın gözü qarşısında qurban verilir”.
Vidadi ORDAHALLI
