Azər Həsrət: “...Neqativ məsələlər var, onu heç kim dana bilməz”
Donald Trampın göstərişi ilə ABŞ-nın Beynəlxalq İnkişaf Agentliyinin (USAİD) fəaliyyətinin geniş şəkildə araşdırılmasına başlanılıb. Son həftələr USAİD-in bir çox çirkin kampaniyaları maliyyələşdirdiyi, terror təşkilatlarına vəsait ayırdığı, dünyanın nüfuzlu media orqanlarını pulla ələ aldığı barədə təkzibolunmaz faktlar üzə çıxır.
Məlum olub ki, USAİD 707 media, 6 min 200 jurnalist və 279 jurnalistika sahəsində çalışan QHT-ni maliyyələşdirib. Bu təşkilat ABŞ-ın nüfuzlu media qurumlarına belə sıza bilib, onlara maliyyə ayırıb, fəaliyyətlərini öz maraqlarına uyğun idarə edib.
Hazırda Tramp administrasiyası USAİD-lə bağlılığı olan media qurumlarına ciddi təpki göstərir. "The Washington Post"un (WP) ABŞ Dövlət Departamentinin daxili sərəncamına istinadən yaydığı məlumata görə, Dövlət Departamenti Birləşmiş Ştatların bütün diplomatik missiyalarını xəbər agentliklərinə və nəşrlərə abunəliyi ləğv etməyə çağırıb.
Məlumata görə, Dövlət Departamenti yüzlərlə ABŞ səfirliyi və konsulluğundan "The Economist", "The New York Times", "Politico", "Bloomberg", "Associated Press" və "Reuter" kimi agentliklərdən ödəniş müqabilində xəbər almağı dayandırmağı tələb edib.
Diplomatik missiya əməkdaşları abunəliyin saxlanılması üçün vəsatət qaldıra bilərlər. İstisna hal kimi, bu icazənin verilməsi üçün həmin səfirlik və ya konsulluq nəşrə abunəliyin saxlanılmasının diplomatik missiyanın təhlükəsiz fəaliyyəti üçün son dərəcə vacib olduğunu “bir cümlə ilə” əsaslandırmalıdır.
Ekspertlər bildirir ki, USAİD-in maliyyələşdirdiyi bütün KİV-lər bu qurumun çirkin məqsədlərini icra edib və elə ABŞ-ın özündə də onlar dövlətin maraqlarını deyil, adıçəkilən təşkilatın maraqlarını müdafiə edib. Ekspertlər bildirir ki, Dövlət Departamentinin bu sərəncamının verilməsi təsadüfi deyil və onlar ABŞ dövlət büdcəsindən də maliyyə almaqla başqa dövlətlərə qarşı təxribatla məşğul olublar, qərəzli informasiya yayıblar.
“...Trampın bu qeyri-adi gedişləri bütün dünyanı təəccübləndirməkdə davam edir”
Siyasi şərhçi Azər Həsrət “Bakı-Xəbər”ə şərhində “ABŞ prezidenti Donald Trampın bu qeyri-adi gedişləri bütün dünyanı təəccübləndirməkdə davam edir. Hələ prezidentiyə başlamamışdan əvvəl verdiyi anonslarla gündəm yaratmışdı. Bu gündəmi də yanvarın 20-də vəzifəsinə başladıqdan sonra daha şiddətli bir şəkildə davam etdirir. İstər USAİD-in ətrafında baş verənlər, USAİD-dən qaynaqlanan media ilə bağlı açıqlamalar, ortaya çıxan faktlar, eyni zamanda bu abunəlik məsələsi bütün dünyanın diqqət mərkəzində oldu. Yəni faktiki olaraq, Donald Tramp təkcə ABŞ-da deyil, dünyada bir rüzgar əsdirir. ABŞ-da tarix boyu hələ belə radikal yanaşma müşahidə edilməyib”-deyə bildirdi.
A.Həsrətin sözlərinə görə, istər daxili siyasətdə, daxili məsələlərdə, istərsə də xarici məsələdə belə yanaşma olmayıb. “Bir tərəfdən media ilə, abunəliklərlə bağlı məsələlər gündəmdədir, digər tərəfdən, qonşu dövlətlərin torpağına iddiası gündəmdədir. Üçüncü tərəfdən də, ən əsas məsələ Ukraynada baş verənlərə Donald Trampın münasibətidir. Yəni dünən faktiki olaraq açıqlama yaymaqla Ukrayna prezidenti Volodimir Zelenskini diktator, qeyri-legitim prezident adlandırması həqiqətən də dünyada çox böyük təəccüb hissi ilə qəbul edilir. Yəni ABŞ ənənəvi kursundan sapıb çox fərqli davranış nümayiş etdirir və bu davranışlar da birbaşa prezident Donald Trampın adı ilə bağlıdır. Bilmirəm, bu gedişlə Donald Tramp dörd illik müddətin sonuna qədər prezident kürsüsündə qala biləcəkmi? Hər halda, bunu qəti əminliklə deyə bilmərik. Çünki inanmıram ki, ABŞ-da da, elə dünyanın başqa yerlərində də qlobal güclər bütün bunlara sonadək dözsün. Yəni adamın prezidentliyinin cəmi bir ayı arxada qalıb və görün ortaya nələr çıxıb. O cümlədən, media ilə bağlı yanaşmaları. Düzdür, ABŞ-da indi neqativ məsələlər var, onu heç kim dana bilməz. Zatən biz də danmırıq. Amma ABŞ-ın bir oturuşmuş dövlət siyasəti var. Onu birdən-birə belə silkələmək, inanmıram ki, Donald Trampa havayı başa gəlsin”-deyə A.Həsrət vurğuladı.
İradə SARIYEVA
