Uzun illərdir ki, Avropa Parlamentinin (AP) Azərbaycana qarşı qərəzi səngimək bilmir, əksinə, daha da alovlanır. Antiazərbaycan mövqeli şəxslərin toplandığı təşkilat 30 ildir ki, Azərbaycanı şərləməklə məşğuldur. Oktyabrın 5-də çıxardığı üzdəniraq qərar da bu kampaniyasının davamıdır.
AP-ın çıxardığı “Azərbaycanın hücumundan sonra “Dağlıq Qarabağda vəziyyət və Azərbaycanın Ermənistana davam edən təhdidləri” adlı məcburi xarakter daşımayan qətnamə onun məsuliyyətsizliyinin, ermənipərəstliyinin təzahürüdür. Ənənəvi olaraq beynəlxalq hüquq və prinsiplərinə zidd, qərəz və ikili standartlar əsasında qərar qəbul etməkdə pərgar olan təşkilat bu bədnam addımı Ermənistanın “böyük bacısı” Fransanın təşəbbüsü ilə atıb və Azərbaycana qarşı qərəz və ikili standartlardan irəli gələn sənəd qəbul edib. Elə Azərbaycanofob, ermənipərəstliyi özündə ehtiva edən qətnamə ilə də 30 il davam edən riyakar siyasətə sadiq qalmış oldular. Təşkilatın Qarabağda mövcud vəziyyətlə bağlı qəbul edilən qətnaməsində iddia olunub ki, bölgədə beynəlxalq hüquq və normalar pozulub. Heç bir fakt və rəqəm ortaya qoyulmadan Fransanın təşəbbüsü ilə qəbul edilən qətnamə başdan-ayağa qərəz və ikili standartlardan irəli gələn qərar kimi qiymətləndirilməlidir.
Hətta bundan əvvəl Qarabağa səfər edən BMT missiyasının yekun rəyi belə nəzərə alınmayıb. Bu da onu deməyə əsas verir ki, təşkilat üçün orada mövcud vəziyyət, hansı proseslərin yaşanmasının heç bir əhəmiyyəti yoxdur. İnsanların ərazidən könüllü şəkildə çıxmasını “etnik təmizləmə” adlandırmaq isə həyasızlığın və riyakarlığın pik həddidir. 30 il bundan əvvəl Azərbaycanın beynəlxalq hüquqla təsbit olunmuş torpaqlarından yüz minlərlə insanın qovulması, didərgin salınmasına göz yuman Avropa Parlamenti bu qərarı ilə bölgədə sülh və əminamanlığı deyil, müharibəni dəstəklədiyini ortaya qoymuş olub.
Avropa parlamenti Azərbaycanın əleyhinə qətnamə qəbul edib və ermənilərin burdan köçüb getməsini "etnik təmizləmə" kimi qələmə verir, sırf Ermənistanın dili ilə danışır. Maraqlıdır, AP bu antiazərbaycan qətnaməni qəbul edərkən hətta bir neçə gün əvvəl Qarabağda olmuş və vəziyyətə obyektiv qiymət vermiş BMT-nin xüsusi missiyasının hesabını da nəzərə almayıb. Çünki BMT-nin hesabatında deyilirdi ki, biz burada ermənilərin etnik təmizləməyə, zorakılığa məruz qalması ilə bağlı bir dənə də əlamət görmədik. AP isə üzdəniraq qətnamədə tamamilə bunun əksini iddia edib. Avroparlament Fransanın təsiri altında nə qədər sifətini itirib ki, hətta BMT-nin hesabatını da nəzərə almadan antiazərbaycan qətnaməsini qəbul edib.
“Bu da ondan xəbər verir ki, AP bu qətnaməni qəbul etməklə konkret olaraq Fransanın və müəyyən ermənipərəst dairələrin Avropadakı siyasi maraqlarını təmin edib”
Bədnam qətnamə ilə bağlı şərhində siyasi elmlər üzrə fəlsəfə doktoru, Beynəlxalq Münasibətlərin Təhlili Mərkəzinin aparıcı məsləhətçisi Mətin Məmmədli “Bakı-Xəbər”ə “Avropa Parlamentinin qəbul etdiyi qətnamə tamamilə qərəzli və heç bir fakta əsaslanmayan bir “sənəddir”. Fransanın və Avropadakı müəyyən ermənipərəst dairənin təsiri ilə hazırlanmış, qəbul edilmiş qeyri-obyektiv bir qətnamədir. Təsəvvür edin ki, həmin qətnamədə Azərbaycan əsassız olaraq “etnik təmizləmədə” ittiham olunur. Bildiyimiz kimi, bu günlərdə BMT-nin missiyası Qarabağda olub. Hər hansı bir etnik təmizləmənin olmadığını və Azərbaycanın keçirdiyi lokal antiterror tədbirləri zamanı heç bir mülki obyektə, infrastruktura zərər vurulmadığını BMT-nin missiyası öz yekun nəticələrində açıqlayıb. BMT-nin nətəcələrini nəzərə almadan, bu sənədə əsaslanmadan AP belə bir qərəzli qətnamə qəbul edib. Bu da ondan xəbər verir ki, AP bu qətnaməni qəbul etməklə konkret olaraq Fransanın və müəyyən ermənipərəst dairələrin Avropadakı siyasi maraqlarını təmin edib. Bu birmənalı olaraq təzyiq xarakteri daşıyıb”-deyə bildirdi.
Təbii ki, belə bir qərəzli sənədin qəbul edilməsinin xoşagələn hal olmadığını deyən M.Məmmədlinin sözlərinə görə, bu, Avropa İttifaqı ilə Azərbaycanın arasındakı münasibətlərə də mənfi təsir edir. M.Məmmədlinin fikrincə, ancaq Avropa İttifaqı Parlamentinin qəbul etdiyi bu qətnamə hüquqi qüvvəsi olmayan sənəddir və tövsiyə xarakteri daşıyır. “Fikrimcə, bu qətnaməyə görə çox da dərinə gedib hesab etmək olmaz ki, Avropa İttifaqı Azərbaycana qarşı sanksiyalar tətbiq edir, Avropa İttifaqı ilə Azərbaycan arasında münasibətlər tamamilə korlanıb. Xeyr”-deyə M.Məmmədli bildirdi. M.Məmmədli Aİ ilə Azərbaycanın gələcək münasibətlərinə pessimist yanaşmasa da, hesab edir ki, bu müəyyən qədər münasibətlərə təsir edəcək, çünki bu qətnamə tamamilə ədalətsiz və qeyri-obtektivdir.
İradə SARIYEVA
