Avropa Parlamenti Qarabağdakı hadisələrə görə Azərbaycana qarşı sanksiyalar tətbiq etməyə çağıran qətnamə qəbul edib. Qətnamədə AP Qarabağda “etnik təmizləməni” pisləyir, erməni əhalisinin beynəlxalq təminat altında öz vətənlərinə qayıtmaq hüququnu vurğulayır.
Qeyd edək ki, Avropa Parlamentinin xarici siyasət məsələləri ilə bağlı qətnamələri hüquqi qüvvəyə malik deyil, lakin digər Avropa qurumları Avropa Parlamentinin deputatlarının rəylərini dinləməlidir.
Səsvermənin nəticəsinə fikir verək:
491 deputat qətnamənin lehinə, 9-u əleyhinə səs verib, 37-si isə bitərəf qalıb.
Avropanın qərəzi öz yerində, həm də belə çıxır ki, biz haqq işimizə dəstək verə bilən cəmi 9 dost qazanmışıq?
Bəllidir ki, parlamentdə təmsil olunan bəzi ingilisdilli deputatlar Avropa Şurası nümayəndə heyətində təmsil olunur. Onlar eyni zamanda Avropa Parlamenti iıə də sıx işləməlidirlər. Səsvermədə əldə olunan nəticə həm də həmin deputat korpusunun fəaliyyətinin qənaətbəxş olmadığına dair mənzərə yaradırmı?
Avropa qurumları ilə sıx təmasda olan politoloq Elşən Mustafayev “Bakı-Xəbər”ə açıqlamasında bildirdi ki, Avropa Parlamentinin belə bir müzakirəni edəcəyi qabaqcadan ən azı mənə məlum idisə, deməli, bundan çox adamın məlumatı olub: “Hətta belə bir qərarın qəbul ediləcəyini də təxmin etmək çətin deyildi. Avropa Parlamenti ilə əlaqəsi olan bir şəxs olaraq düşünürdüm ki, ən azından bizim Avropa institutları ilə işləyən parlamentarilərimiz hansısa qabaqlayıcı addımlar atacaqlar. Həmin sənəd Avropa ölkələrində ratifikasiya olunmayacaq. Bizi narahat edən səsvermədəki nəticədir. Cəmi 9 nəfər əleyhinə səs verib. Bu, artıq bizə ciddi siqnallar verir ki, bu məsələyə cavabdeh olan və xüsusilə də Avropa Parlamenti ilə işləyən şəxslər və millət vəkilləri lazım səviyyədə iş ortaya qoya bilməyib. Biz Avropa Parlamentində keçirdiyimiz görüşlərdə görürük ki, orada təmsil olunan bir çox deputatlar bizim haqlı mövqeyimizi dəstəkləyir. Nədənsə, bu nəticəni biz səsvermədə görmədik. Bir çox deputatlar açıq şəkildə bildirdilər ki, Azərbaycanın öz ərazi bütövlüyünü təmin etməsinə hər cür dəstək verməyə hazır olduqlarını ifadə ediblər. Sonradan gördük ki, həmin adamlar açıq iclaslarda bu yöndə çıxışları etməkdən qorxurlar. Çünki arxalarında dayaq hiss etmirlər. Orada müxtəlif fraksiyalar var. Bizim bəzi deputatlarımız məhz bu istiqamətdə də onlarla yaxşı əlaqə qura bilərlər. Çünki Avropaya göndərilən deputatlarımız müxtəlif partiyaları təmsil edir. Avropa İttifaqında Azərbaycanın səfiri var. Onlar da lazımi şəkildə iş qura bilməyiblər ki, belə nəticə alınıb. Bəlkə də bizim əleyhimizə səs verənlərin bir çoxu bizim haqlı olduğumuzu bilir, sadəcə, diqqət görmədiyi, gələcəkdə müdafiə olunacağına əminliyi olmadığı üçün belə addım atır. Azərbaycan çox ciddi imtahan qarşısındadır. Artıq dövlət başçıları səviyyəsində açıq təhdid olunuruq. Almaniya kimi ölkə də Fransaya qoşularaq bizi təhdid edir. Ən azından, Prezidentdən örnək götürsünlər. Lokomotiv kimi çalışdı. Sanki tək işlədi. Hamı öz səyini ortaya qoymalıdır. Avropa Parlamenti ilə işləmək çətin deyil. Sadəcə, ürəkli fəaliyyət ortaya qoyulmalıdır. Onlarla işləyən digər qurumlar da bu biabırçı səsvermə nəticəsindən dərs götürməlidir”.
Məhəmmədəli QƏRİBLİ
