Diasporla İş üzrə Dövlət Komitəsi “Yaşat” marafonu ilə bağlı dünya azərbaycanlılarına müraciət edib. Komitənin yaydığı məlumatda bunlar qeyd olunur: “Ali Baş Komandanın rəhbərliyilə şanlı Azərbaycan Ordusunun 44 günlük Vətən müharibəsində qazandığı tarixi Zəfər hər birimizə sevinc və qürur hissi yaşatdı. 30 ilə yaxın işğal altında olan tarixi torpaqlarımızın 44 gün ərzində azad edilməsi doğma Vətənimizin qalib və qüdrətli dövlət olduğunu bir daha dünyaya sübut etdi.
Azərbaycan Prezidenti cənab İlham Əliyevin və Birinci vitse-prezident Mehriban xanım Əliyevanın da dəfələrlə öz çıxışlarında vurğuladığı kimi, məhz xaricdə yaşayan soydaşlarımızın birliyi, mütəşəkkilliyi sayəsində Azərbaycanın haqq səsi bütün dünyaya çatdırıldı. Ermənistanın işğalçılıq siyasətinin, harada yaşamasından asılı olmayaraq, bütün azərbaycanlıların, beynəlxalq hüquqa hörmətlə yanaşan hər bir kəsin problemi olduğu bəyan edildi.
Vətən müharibəsində şəhidlərimizin canı, qazilərimizin qanı bahasına başa gələn şanlı Qələbə hamımızı sevindirdi, lakin müharibə nəticəsində 2800 nəfərdən çox şəhidimiz, 100-lərlə qazimiz var. “Yaşat” xeyriyyə marafonu qələbəni bizə yaşadanları yaşatmaq, şəhid ailələrinin, qazilərimizin problemlərinin həllinə kömək etmək məsuliyyətindən irəli gələn zərurətdir. Mayın 25-dək marafonda 60-a yaxın ölkənin iştirakı dünya azərbaycanlılarının Vətənə sədaqətinin daha bir nümunəsi, diaspor-dövlət birliyinin sübutudur”.
Flora Qasımova: “Xaricdə yaşayan soydaşlarımızın qayğısı, diqqəti şəhid və qazilərimizə hörmətin ən bariz nümunəsidir”
Dünya azərbaycanlılarının "Yaşat" Fondunun ümummilli marafonuna verdikləri töhfə haqqında danışan keçmiş millət vəkili Flora Qasımova bildirdi ki, 44 günlük hərbi əməliyyatlar bizim üçün Vətən müharibəsi idi: “Həmin savaşda əsgər və zabitlərimiz xalqın dəstəyini hiss edərək, ölümü gözə aldılar və torpaqlarımızı azad etdilər. Biz müharibə dövründəki həmrəyliyimizi, birliyimizi indi də göstərməliyik. Bu, borcumuzdur. Əlimizdən gələni etmək, o cümlədən, xaricdə yaşayan soydaşlarımızın qayğısı, diqqəti şəhid və qazilərimizə hörmətin ən bariz nümunəsidir. İndi onların bizim dəstəyimizə ehtiyacları var”.
Fatimə Hacıbəyli: “Biz həm müharibə dövründə birlikdə olduq, bir yumruq olduq, indi də bir yerdəyik və gələcəkdə...”
“Vəfa” Sosial-İctimai Birliyinin sədri Fatimə Hacıbəyli qeyd etdi ki, “Yaşat” Fondunun bu işdə fəal iştirak etməsi olduqca önəmlidir: “Həm şəhid ailələri, həm qazilərimiz hamıdan yaxşı yaşayan insanlar qrupuna aid olmalıdırlar. Hər birimiz əlimizdən gələn köməkliyi göstərməliyik. Bu bizim birliyimizin nümayişidir. Bu birlik daim davam etdirilməlidir. Biz həm müharibə dövründə birlikdə olduq, bir yumruq olduq, indi də bir yerdəyik və gələcəkdə də birlik olub, birlikdə addım atacağıq”.
Günel CƏLİLOVA
