Amerika Birləşmiş Ştatlarının prezidenti Cozef R.Baydendən Azərbaycan Prezidenti İlham Əliyevə təbrik məktubu gəlib. Məktubda deyilir:
“Hörmətli cənab Prezident. Amerika xalqı adından Sizə və Azərbaycan xalqına 28 May – Respublika Günü münasibətilə səmimi salamlarımı və təbriklərimi çatdırıram. Bu il Azərbaycanın müstəqilliyinin 1991-ci ildə bərpa edilməsindən 30 il keçir. Bu müddət ərzində Amerika Birləşmiş Ştatları və Azərbaycan Respublikası xalqlarımız arasında əlaqələri gücləndirərək təhlükəsizlik, enerji və demokratik idarəetmə məsələlərində birlikdə çalışıb.
Amerika Birləşmiş Ştatları ötən il Cənub Qaz Dəhlizinin işə salınması ilə Azərbaycanın Avropanın enerji şaxələndirilməsinə verdiyi töhfələri və bu il Xəzərdəki yatağın Türkmənistanla birgə kəşfiyyatına və işlənməsinə dair imzaladığı Anlaşma Memorandumunu qətiyyətlə dəstəkləyir. Biz Azərbaycana NATO-nun Əfqanıstandakı missiyasına və terrorla mübarizə səylərinə verdiyi 20 illik dəstəyə görə minnətdarıq. ATƏT-in Minsk Qrupunun həmsədri olaraq münaqişənin uzunmüddətli siyasi həllinə dair danışıqlarda kömək etməyə sadiq qalırıq…”
Göründüyü kimi, ABŞ prezidenti Qarabağ münaqişəsinin hələ də mövcudluğuna işarə etməklə, həmsədr ölkə kimi bu yöndə fəallıqlarını artıracaqlarına söz verir. Mövcud reallıqlar isə göstərir ki, Qarabağ münaqişəsi artıq yoxdur və məsələ öz həllini tapıb. ABŞ-ın bu təzadlı mövqeyini nə ilə izah etmək olar?
Politoloq Qabil Hüseynli “Bakı-Xəbər”ə açıqlamasında bildirdi ki, Baydendən gözləntilər çox idi: “Ancaq biz tam fərqli mənzərənin şahidi oluruq. Görünən budur ki, Bayden çox yaşlıdır və bir neçə xəstəlikdən əziyyət çəkir. ABŞ-ın vitse-prezidenti Kamala Harris faktiki olaraq onu istədiyi istiqamətə yönəldə bilir. Gələndə böyük hay-küylə gəldi ki, yeni dünya dizaynı quracaq. Onun belə bir ifadə işlətməsi Azərbaycanın reallaşdırdığı gerçəkliyi qavramaması deməkdir. Qavrasa da, həmin gerçəkliklə barışmaq istəməmək istəyindən doğur. Nə olsun ki, o böyük ölkənin başçısıdır. Bütün dünya düzəninə cavabdeh olan o deyil axı. Bizim torpaqlarımız 30 il işğal altında qalıb. Xalqımıza qarşı soyqırım həyata keçirilib. Beynəlxalq hüquq normalarına uyğun şəkildə Ermənistan cəzalandırılmayıb. Ermənistan 35 minə yaxın azərbaycanlını öldürüb. Azərbaycana qarşı su soyqırımı tətbiq edib. Bu amil Avropa Şurasının qətnamələrində də öz əksini tapıb. Bizim suvarılan torpaqlarımız susuz qalıb. Bayden münaqişənin mövcudluğu ilə bağlı fikri ortaya atmaqla bölgədəki sabitliyə ziyan vurur. ABŞ həmin vaxt bu fəallığı niyə göstərmirdi? Belə görünür ki, Bayden bölgədə yenə qarşıdurmanın olmasını, ermənilərin meydan sulamasını istəyir. ABŞ prezident bilir ki, yeni reallıqlar pozitivdir. Azərbaycan öz gücünə torpaqlarını azad edib. Onsuz da Bayden öz reytiniqinin elə bir həddinə çatıb ki, ona çox az adam qulaq asır. Azərbaycan rəhbərliyi dəfələrlə bəyan edib ki, Qarabağ münaqişəsi artıq yoxdur və tarixin arxivinə göndərilib. ABŞ bu mövqeyilə Qarabağ ermənilərinə status almağı planlayır”.
Məhəmmədəli QƏRİBLİ
