“Kollektiv Təhlükəsizlik Müqaviləsi Təşkilatının (KTMT) qapıları bütün ölkələr, o cümlədən, Azərbaycan üçün açıq olmalıdır”. Bunu Rusiya xarici işlər nazirinin müavini Andrey Rudenko jurnalistlərə bildirib.
O, Azərbaycanın üzv olmasına mane ola biləcək məqama toxunaraq bunları deyib: “Azərbaycanın KTMT-yə qoşulmasına mane ola biləcək yeganə məqam təşkilatın nizamnaməsinin bəzi bəndləridir. Həmin bəndlər təşkilat üzvü olan ölkələr arasında diplomatik münasibətləri ehtiva edir. Azərbaycanla Ermənistan arasında isə hazırda belə münasibətlər yoxdur. Həmin münasibətlər yaranan kimi - bunun gec və ya tez baş verəcəyinə ümid edirik - məsələni praktiki səviyyəyə qaldırmaq olar”.
O da məlumdur ki, zaman-zaman Azərbaycanın KTMT-yə üzv olması qabardılır. Ancaq Ermənistanın işğal amili bu məsələdə başlıca maneə olub. Lakin uğurlu Vətən müharibəsindən sonra, praktiki olaraq, sözügedən faktor ortadan qalxıb. Buna baxmayaraq, Azərbaycan və Ermənistan arasında yekun sülh sazişi imzalanmayıb. Ermənistan veto hüququnu özündə saxlayır. Belə olan halda, maraqlıdır, bu istəyin indi – Qarabağda razılaşmaların tam icra edilmədiyi və sərhədlə bağlı məsələnin davam etdiyi vaxtda gündəmə gətirilməsi nə deməkdir?
“Bu kimi məsələlər Rudenkonun arzusu ilə həll olunmur”
Məsələyə münasibət bildirən Böyük Azərbaycan Partiyasının sədri Elşad Musayevin sözlərinə görə, məqsəd Qarabağ kartından istifadə etməklə Azərbaycanı Rusiyanın təsir dairəsində saxlamaqdır: “Ona görə məhz indi məsələ qabardılır. Rusiya MDB məkanına daxil olan ölkələri, o cümlədən, Azərbaycanı öz təsir dairəsində saxlamaq istəyir. KTMT-yə üzv olan ölkələr üzərlərinə müəyyən öhdəliklər götürürlər. Onlardan biri ondan ibarətdir ki, üzv ölkələrin ərazisində digər ölkələrin hərbi bazası olmur. Rusiya, bir tərəfdən, NATO-nun genişlənməsindən ehtiyat edir, digər tərəfdən, MDB ölkələrini təsir dairəsindən buraxmaq istəmir. O üzdən, bütün vasitələrlə çalışır ki, Azərbaycanı öz təsir dairəsində saxlasın. Bu gün Azərbaycanla Ermənistan arasında diplomatik münasibətlər, sülh sazişi yoxdur. Ortada ciddi mübahisəli məsələlər var və s. Belə olan halda, niyə bu məsələ gündəmə gətirilir? Həm də ona görə ki, Kreml sanki tələsir. Ancaq bu kimi məsələlər Rudenkonun arzusu ilə həll olunmur. Azərbaycanın KTMT-yə daxil olması məqsədəuyğun deyil. Çünki bu təşkilatın perspektivi yoxdur. ABŞ Azərbaycana hərbi yardım edir, amma analoji yardım Ermənistana edilmir. Çünki Ermənistan KTMT-də təmsil olunur. Digər tərəfdən, Azərbaycan Qoşulmama Hərəkatında fəal təmsil olunur. O üzdən, buna ehtiyac yoxdur. Azərbaycanın belə bir ehtiyacı olarsa, o zaman Türkiyə hərbi bazaları ölkəmizdə olmalıdır”.
Partiya sədrinin fikrincə, Rusiyanın çox istəyi ola bilər, amma bu o demək deyil ki, biz onların hər istəyini yerinə yetirməliyik.
Vidadi ORDAHALLI
