“Amnesty International” insan haqları təşkilatı aprelin 7-də yeni hesabat açıqlayıb. Hesabatda bildirilir ki, Azərbaycan hakimiyyəti ötən il Ermənistanla müharibə və COVID-19 pandemiyasından narazılara təzyiqləri artırmaq üçün istifadə edib.
Qeyd olunur ki, onlarla müxalifət lideri, fəal qanunsuz olaraq saxlanıb, həbs edilib. Guya ictimai narazılıq artdıqca, sərbəst toplaşma və ifadə azadlıqları daha da məhdudlaşdırılıb. Bununla yanaşı, guya vəkillər təqib olunub, hökumətin tənqidçiləri saxlanan zaman işgəncələrə, pis rəftara məruz qaldıqlarını deyiblər.
Hesabatda 44 günlük müharibə zamanı mülki əhalinin hüquqlarının pozulduğu, münaqişə ilə bağlı zorakılığın ölümlə, xəsarətlə, evlərin dağılması ilə nəticələndiyi vurğulanır. Bununla belə, hesabatda qeyd edilir ki, guya Azərbaycan Qarabağ müharibəsində klastr bombalarından istifadə edib. Beynəlxalq hüquqla yasaqlanmış bu silahlar guya Xankəndinin bombalanması zamanı tətbiq edilib.
İnsan hüquqlarının qorunmasından danışan bəzi beynəlxalq təşkilatların Azərbaycanı pandemiya amilindən sui-istifadə etməkdə ittiham etməsi yeni deyil. Ancaq son hesabat göstərir ki, bəlli təşkilatlar, yeri gəldi-gəlmədi, bu məsələni gündəmdə saxlamağa çalışırlar. O baxımdan, deyilənlər nə məqsədi daşıyır?
“Hakimiyyət pandemiya amilindən heç vaxt sui-istifadə etməyib”
Sözügedən məsələ ilə bağlı fikirlərini “Bakı-Xəbər”lə bölüşən “İki Sahil” qəzetinin baş redaktoru Vüqar Rəhimzadənin fikrincə, “Amnesty International”ın məlum hesabatında əks olunan fikirlər Azərbaycana yönəlik növbəti qərəzli yanaşmanın göstəricisidir: “Bunlar davamlı olaraq Azərbaycanı qaralamaqla məşğuldurlar. Bir ildir ciddi əsasları olmadan bəyan edirlər ki, guya hakimiyyət pandemiya amilindən istifadə edərək insan hüquqlarını məhdudlaşdırır. Ancaq bunun nədən ibarət olduğunu faktlarla ortaya qoya bilmirlər. Sadəcə, əsası olmayan ümumi ittihamlarla çıxış edirlər. İnsan hüquqlarından danışan bir sıra təşkilatlar və o cümlədən, “Amnesty International” müəyyən ölkələrə təzyiq vasitəsi kimi yaradılıb. Ona görə də məlum təşkilatlar müəyyən beynəlxalq dairələrin əlində alət funksiyasını yerinə yetirirlər. Bir dəfə olmadı ki, bu təşkilatlar ədalətli, obyektiv mövqe sərgiləsinlər. Hər dəfə obyektivlikdən uzaq, müəyyən siyasi məqsədlərə hesablanmış hesabatlar dərc edilir. Azərbaycan pandemiya ilə uğurla mübarizə aparan ölkələrdən biridir. Bununla yanaşı, ölkəmiz bu məsələdə digər ölkələrə də yardım edir. Ancaq “Amnesty International” və digər bu kimi təşkilatlar bütün bunları görməzdən gəlirlər. Çünki bu təşkilatların qarşısına başqa ölkələri qaralamaq missiyası qoyulub. Məsələnin fundamental kökü bundan qaynaqlanır. Azərbaycanın müstəqil siyasət yeritməsi bəlli dairələri hər zaman narahat edib. Azərbaycanı öz yolundan döndərmək üçün davamlı olaraq subyektiv və ədalətsiz yanaşma sərgilənir. Ona görə də hesabat qərəzli və reallıqdan uzaq yanaşmanı özündə əks etdirir. Hakimiyyət pandemiya amilindən heç vaxt sui-istifadə etməyib. Əksinə, insanların sağlamlığının qayğısına qalıb”.
V.Rəhimzadə onu da qeyd etdi ki, Azərbaycan hər zaman öz milli, dövlət maraqlarını və ən başlıcası, vətəndaş amilini daim üstün tutaraq, cəmiyyətin maraqlarından çıxış edir.
Vidadi ORDAHALLI
