“Azərbaycan peyvəndlərin paylanmasında ədalətliliyi dəstəkləyərək BMT-nin İnsan Hüquqları Şurasında “Koronavirus pandemiyası ilə mübarizədə bütün ölkələrin peyvəndlərə bərabər, məqbul qiymətə, vaxtında və universal əlçatanlığının təmin edilməsi” adlı qətnamə layihəsi irəli sürüb. Qətnamə bu il martın 23-də konsensus əsasında qəbul edilib.
Azərbaycan, həmçinin, COVAX təşəbbüsünə qoşulan və onu dəstəkləyən ilk ölkələrdən biri olub. Biz və bütün beynəlxalq ictimaiyyət bu təşəbbüsün pandemiya ilə mübarizədə əməkdaşlıq və həmrəylik modeli olmağını gözləyir.
Biz pandemiyanın öhdəsindən yalnız birlikdə gələcək və normal həyata qayıdacağıq”.
Bu barədə aprelin 6-da Ümumdünya Səhiyyə Təşkilatının İsveçrənin Cenevrə şəhərində yerləşən mənzil-qərargahında təşkilatın baş direktoru Tedros Adhanom Qebreyesusun təşəbbüsü ilə Azərbaycan Respublikasının Prezidenti İlham Əliyevin videomüraciətində deyilib.
Azərbaycan Prezidenti bu videomüraciətində pandemiya ilə qlobal mübarizəyə Azərbaycanın veridiyi böyük töhfələri yenidən aktuallaşdırdı və ölkəmizin bu sahədə oynadığı mühüm rolu bir daha vurğuladı, ifadə etdi.
“Dünyada pandemiyanı üstələmək, ona qalib gəlmək üçün yeganə doğru yol cənab Prezidentin sərgilədiyi yoldur”
Tanınmış tibb mütəxəssisi, professor Nəsib Quliyev “Bakı-Xəbər”ə bildirdi ki, birincisi, dünyada 200-dən artıq dövlət var, amma o dövlətlərin heç də hamısı pandemiya ilə qlobal mübarizədə fəal deyil, bu vacib işə öz töhfəsini verə bilmir: “Birincisi, bizim üçün ən qürurverici, müsbət hal ondan ibarətdir ki, pandemiyanın başlandığı ilk dövrlərdən etibarən Ümumdünya Səhiyyə Təşkilatı (ÜST) ilə Azərbaycan dövlətinin mövqeyi arasında çox böyük səmimilik və yaxınlıq özünü göstərib. Bilirsiniz ki, dünyada 200-dən artıq dövlət mövcuddur, amma onların içində öndə olmaq, ÜST-lə belə yüksək əməkdaşlığı təmin etmək hər dövlətə nəsib olmur. Bu da, təbii ki, ilk növbədə, o dövlətin tutduğu mövqedən asılıdır. Azərbaycan həmişə dünyada dostluğun, humanistliyin, insanpərvərliyin tərəfdarı olub. Azərbaycan bu hadisələrə qədər artıq çoxdan dünyada multikulturalizm mərkəzinə çevrilib, başqa xalqlarla, dinlərlə, mədəniyyətlərlə bağlı bizim heç bir problemimiz olmayıb. Bircə bədnam qonşularımızdan başqa, bu da onların öz günahıdır. Heç bir xalqla, dövlətlə dostluqdan başqa münasibətimiz olmayıb. Bu, ilk növbədə, ölkə Prezidentinin yüksək dərəcədə humanist mövqedə olduğunu göstərir. İkincisi, Azərbaycan dünyada müstəqil siyasət yürüdür və vacib, lazım bildiyi sözləri, fikirləri də həmişə səsləndirir, ifadə edir. Bayaq qeyd etdiyim kimi, bu gün dünyada ölkələr çoxdur, amma bu ölkələrin çoxu da öz fikrini, mövqeyini sərbəst ifadə edə bilmir”.
N.Quliyevin fikrincə, dünyada humanistlikdən, haqq-ədalətdən vacib heç nə yoxdur. Bu baxımdan, Azərbaycan Prezidentinin də haqq-ədaləti, bərabərliyi dəstəklədiyini deyən N.Quliyevin sözlərinə görə, ölkə başçısı bütün insanların sağlam olmasının tərəfdarı olduğunu sərgiləyir. “Ona görə də dünyada belə mövqe sərgiləmək çox vacibdir, Azərbaycanın bu mövqeyi bizi çox sevindirir, o cümlədən də bir həkim olaraq bunun sevincini yaşayırıq. Dünyada pandemiyanı üstələmək, ona qalib gəlmək üçün yeganə doğru yol cənab Prezidentin sərgilədiyi yoldur. Azərbaycan Prezidenti Qoşulmama Hərəkatının rəhbəri olaraq da, Türk Şurasının üzvü olaraq da belə bir mövqe sərgilədi. Pandemiya ilə qlobal mübarizəyə böyük töhfələr verən Azərbaycan dövləti ÜST-ün ən yaxın silahdaşına çevrilib. Bu hər şeydən əvvəl Prezidentimizin nə qədər uzaqgörən, müdrik siyasət yeritdiyinin növbəti ifadəsidir, biz bunun bir daha şahidi oluruq” - deyə N.Quliyev vurğuladı.
İradə SARIYEVA
