Dövlət təhlükəsizliyimizin istintaq və əks-kəşfiyyat kimi iki önəmli strukturu rüşvət içində batırmış - iki generalın dövlət xəyanəti...

img

Keçmiş Milli Təhlükəsizlik Nazirliyinin (MTN) sərəncamında olan 2 general - nazirliyin İstintaq Baş İdarəsinin keçmiş rəisi Mövlan Şıxəliyev və Hərbi Əks-Kəşfiyyat Baş İdarəsinin keçmiş rəhbəri Nizami Şirinov Baş Prokurorluğun İstintaq İdarəsində araşdırılan cinayət işi üzrə məsuliyyətə cəlb olunub.

Generallar aprelin 5-də İstintaq İdarəsində dindiriləndən sonra barələrində həbs qərarı çıxarılması üçün Nəsimi Rayon Məhkəməsində aparılıblar. Hakim onların istintaq dövründə həbsdə saxlanması barədə prokurorun təqdimatını təmin edib. Hər 2 generalın barəsində həbs qətimkan tədbiri seçilib. Baş Prokurorluq bildirir ki, istintaq zamanı Mövlam Şıxəliyevin MTN-in İstintaq Baş İdarəsinin rəisi vəzifəsində işlədiyi dövrdə tabeliyində olan şəxslərlə birlikdə 9 halda cinayət işləri üzrə sübutları saxtalaşdırdığı müəyyən edilib. Bundan başqa, onun vəzifə səlahiyyətlərindən sui-istifadə edərək müxtəlif korrupsiya cinayətləri törətməklə külli miqdarda rüşvət tələb etməsinə və almasına, 4 halda isə ayrı-ayrı şəxslərin külli miqdarda əmlakını və pul vəsaitlərini hədə-qorxu ilə tələb edərək ələ keçirməsinə əsaslı şübhələr var.

Ləğv edilmiş nazirliyin Hərbi Əks-Kəşfiyyat İdarəsinin sabiq rəisi Nizami Şirinov isə bu vəzifədə işlədiyi müddətdə müxtəlif şəxslərdən MTN-in Akademiyasına qəbul etdirmək, xidmət yerini dəyişdirmək, habelə tabeliyində olan əməkdaşın işdən çıxarılması üçün müvafiq tədbirlərin görülməməsi, xidmət üzrə ümumi himayədarlıq edilməsi müqabilində 3 halda külli miqdarda rüşvət tələb edərək almasına, 3 halda isə ayrı-ayrı şəxslərin külli miqdarda əmlakını və pul vəsaitlərini hədə qorxu ilə tələb edərək ələ keçirməsinə, habelə vəzifə səlahiyyətlərindən sui-istifadə etməsinə əsaslı şübhələr müəyyən edilib.

Həm Şıxəliyev, həm də Şirinov keçmiş milli təhlükəsizlik naziri Eldar Mahmudova yaxın şəxslər sayılırdı. 2015-ci ilin oktyabrında MTN-dəki məlum əməliyyatdan - Mahmudovun nazir postundan uzaqlaşdırılmasından, nazirliyin 20-yə qədər vəzifəlisinin, o cümlədən 5 generalın həbsindən sonra Mövlan Şıxəliyev və Nizami Şirinov da vəzifədən çıxarılmışdı. MTN vəzifəliləri haqda cinayət işində özəlliklə Mövlan Şıxəliyevin adı çox hallanırdı. Zərərçəkmiş şəxslərin bir çoxu onunla bağlı ittiham xarakterli ifadələr veriblər. Bu səbəbdən Mövlan Şıxəliyev məhkəmədə şahid qismində də dindirilmişdi. Hətta məhkəmə 2017-ci ildə onunla bağlı araşdırma aparılması üçün xüsusi qərardad da çıxarmışdı. Maraqlıdır ki, uzun müddət keçsə də, həmin qərardadın taleyindən bir xəbər çıxmayıb.

Hər iki generalın məhz MTN işindən xeyli müddət keçəndən sonra həbs olunması bir çox suallar yaradıb. Bununla bağlı aparılan ictimai müzakirələrdə ekspert və siyasətçilər tərəfindən müəyyən versiyalar səslənməkdədir. Məlum olur ki, onlar general adına yaraşmayan hərəkətlər edərək, ayrı-ayrı şəxslərin külli miqdarda əmlakını və pul vəsaitlərini hədə qorxu ilə ələ keçiriblər. Bu hadisə keçmiş milli təhlükəsizlik naziri Eldar Mahmudovun da həbsinə yol aça bilər. Şıxəliyevin İstintaq İdarəsinin rəisi olduğu dövrdə MTN-in istintaq təcridxanasında bir sıra qanusuzluqlar etdiyi ilə bağlı kifayət qədər faktlar ictimailəşib. İddialara görə, Eldar Mahmudovun cəzasız qalması Şıxəliyevin də toxunulmazlığını təmin edirdi. İndi belə görünür ki, cinayətkarların immuniteti artıq tükənib. Digər versiyalarda isə bildirilir ki, generalların həbsinə orduda baş verən “Tərtər işi” ilə bağlı meydana çıxan dəhşətli faktların ictimailəşməsinin də rolu ola bilər. Doğrudur, “Tərtər işi” sözügedən generalların artıq vəzifədə olmadığı dönəmə təsadüf edir. Ancaq təhlükəsizlik məsələlərilə bağlı olan ekspertlər hesab edirlər ki, prosesin əvvəli Nizami Şirinovun orduya nəzarəti həyata keçirdiyi dönəmə təsadüf edib. Təbiidir ki, bütün bunlar səslənən versiyalardı və prosesə ən doğru cavabı istintaq və məhkəmə vermiş olacaq. Ancaq ortada olan rəsmi açıqlamanı əsas tutub onu deyə bilərik ki, dövlət təhlükəsizliyimizin ən önəmli strukturlarında təmsil olunan generallar rüşvət və korrupsiya içərisində batıblar. Belə şəxslərin geç də olsa həbsi bəzi şəxslərlə bağlı yaradılan cəzasızlıq və toxunulamzlıq sindromunu darmadağın edir və dövlətimizə olan inamı daha da möhkəmləndirir. Hətta hakimiyyətə müxalif olan şəxslər belə bu həbsləri təqdir edir və aparılan istintaqa öz dəstəklərini ifadə edirlər.

Məhəmmədəli QƏRİBLİ

Son xəbərlər