“Suriyalıların həqiqət və ədalət naminə” adlı təşkilatı sensasiya sayıla bilən hesabatla çıxış edib. Hesabatda Suriyanın Hmeymin hərbi bazasında yerli hökumətlə Rusiyanın birgə təşkilatçılığı ilə sentyabr, oktyabr və noyabr aylarında Suriyadan, Livandan, Cənubi Amerika və Kanadadan ayı 1000-2000 dollara muzdlu döyüşçülərin necə yığıldığını və Rusiya təyyarələri ilə Ermənistana necə daşındığını göstərirlər. Hesabata görə, onları əvvəlcə Liviyaya aparmaq adı ilə aldadaraq toplayıb Ermənistana gətiriblər. Maraqlıdır ki, muzdluların Homs, Deyr-əz-Zor əyalətlərində klan, tayfa, əşirət rəhbərlərinin vasitəçiliyi ilə toplandığı qeyd edilir.
Konkret tayfa başçılarının – Əl Həddar, Şeyx Bəni Halid, Əl-Fadas, Əl-Nassif, Əl-Fəyyad və digər bir sıra vasitəçilərin adları çəkilir.
Hesabat müəllifləri muzdlu döyüşçülərdən ibarət Rusiyanın əli ilə Suriya ordusu daxilində ayrıca 5-ci Legion yaradıldığını, həmin legionun dəfələrlə dəstə-dəstə Dəməşq və Beyrut aeroportlarından Ermənistana yola salındığını iddia edirlər. Hesabatçılar yazır ki, hər bir muzdlu ilə ayrıca müqavilə imzalanıb, onların itkin və ya girov düşdükləri halda axtarılmayacaqları, həlak olduqları halda isə maaşın bəlli yolla ailələrinə çatdırılması əks olunub.
Hesabatın müəyyən hissələrini təqdim edirik:
Ermənistanın II Qarabağ müharibəsində muzdlulardan istifadə etməsi ilə bağlı yeni faktlar əldə olunub. STJ təşkilatının (Həqiqət və Ədalət üçün Suriyalılar) əldə etdiyi məlumatlar nəticəsində məlum olub ki, yüzlərlə suriyalı Vətən müharibəsində hərbçilərimizə qarşı vuruşub.
Onların Qarabağda döyüşünü təşkil edən isə Rusiya olub. Belə ki, Rusiya Suriya hökümətinin yardımı ilə yüzlərlə suriyalını pul ilə şirnikləndirərək hiylə yolu ilə Qarabağda Ermənistan tərəfindən bizə qarşı döyüşünü reallaşdırıb.
Faktlara görə, bu ilin sentyabr və oktyabr aylarında Suriyanın Aralıq dənizi sahilində yerləşən Cəbləh şəhərindən yüzlərlə muzdlu Ermənistana göndərilib. Muzdlular əsasən 5-ci legionun üzvləri olublar. Onların çoxu Homs və Deyr-əz-Zor şəhərinin sakinləridir. Bu barədə məlumatlar döyüşdə iştirak edənlərin ifadəsi nəticəsində məlum olub.
Muzdluların Liviyaya gedəcəyi deyilsə də, bu bölgədəki münaqişənin zəifləməsindən istifadə edən ruslar onları Dağlıq Qarabağa yönləndirərək azərbaycanlılara qarşı döyüşdürüblər. Hətta ifadələrdən belə məlum olub ki, muzdlular planın dəyişdiyindən, onların Liviyaya deyil Ermənistana, oradan da Qarabağ ərazisinə göndərildiklərindən xəbərsiz olublar.
STJ-nin araşdırmalarına görə, suriyalı muzdlulardan ibarət azı 5 dəstəlik qrupdan cəmi 10 nəfərin meyiti ailələrinə təhvil verilib. 40 nəfər isə yaralanıb. Yaralılar Ermənistandan birbaşa Homs şəhərinə göndərilib və oradakı hospitallara yatırılıblar.
Həmçinin, muzdluların Dəməşq və Beyrut hava limanlarından İrəvana daşınması barədə də faktlar əldə olunub. Bu gizli əməliyyatların həyata keçirilməsində Suriyaya və Ermənistana Rusiyanın böyük köməyi dəyib. Onlar proseslərin asanlaşması, gizliliyinin qorunması və başqa bu kimi məsələlərdə təşkilatçılıq ediblər.
"Ermənistana göndərilən muzdlular baş verəcək proseslər barədə məlumatlandırılmayıblar. Onlar pul müqabilində Liviyada döyüşmək üçün sənəd imzalasalar da, buradakı gərginliyin zəifləməsindən istifadə edən şəxslər onları Ermənistana göndəriblər", - 5-ci legionun kapitanı ifadəsində deyib. O bildirib ki, muzdlulara 1000-2000 dollar maaş verilib. Onlar adi vətəndaşlar deyil, döyüş üçün xüsusi təlim keçmiş şəxslər olublar. Kapitanın dediyinə görə, döyüşdə yaralanan şəxslər üçün hər hansı kompensasiya nəzərdə tutulmayıb və onların itkin düşənləri axtarmasına icazə verilmir.
"Bizim pula ehtiyacımız var idi və oğlum bu səbəbdən Liviyada döyüşlərə qatılmaq istəyirdi. Sentyabr ayının 15-də onu çağırdılar və döyüşə hazır olmağını söylədilər. Onlar oğlumu təsir altına alıb, hiylə ilə başqa bölgəyə göndəriblər", - Qarabağa erməni hərbçisi kimi göndərilən muzdlunun anası deyib. O bildirib ki, oğlu hələ də Suriyaya gəlib çıxmayıb.
Bütün bunlar göstərir ki, Ermənistan Rusiyanın köməyilə müharibəyə əvvəlcədən hazırlaşıb və hər zamankı kimi hiyləyə əl atıb. Qarabağ döyüşlərinə yüzlərlə muzdlunu cəlb edən Ermənistan onların meyitlərini ölkələrinə göndərməməklə yanaşı, hətta əsgərlərinin belə hamısının cəsədlərini döyüş meydanından götürülməyib. Onlar saxta rəqəmlərlə erməni xalqının başını qatmaqda davam edirlər.
