Şakir Ağayev: “Əslində, Köçəryanın dilini-dodağını qurudan da Şuşanı işğaldan azad edən oğullarımızın gücü, iradəsi, vətənpərvərliyi, daxili inamı, torpağımızı düşməndən azad etmək uğrundakı qüsursuz mübarizəsidir”
Ermənistanın keçmiş və indiki hərbi-siyasi rəhbərliyi şokdadır. Azərbaycan Ordusunun Şuşada keçirdiyi hərbi əməliyyat və bunun nəticəsində də böyük qəhrəmanlıqla Şuşanı işğaldan azad etməsi dünyanı heyrətə salıb, düşmənin yuxusunu ərşə çəkib.
Azərbaycan Ordusu həqiqətən Şuşada necə bir əməliyyat aparıbsa, ermənilər baş çıxara bilmirlər. Azərbaycana hər zaman düşmənçilik münasibəti göstərən, keçən əsrin 90-cı illərinin əvvəllərində torpaqlarımızın işğal edilməsində “xüsusi rol oynayan” Ermənistanın sabiq prezidenti Robert Köçəryan Azərbaycan Ordusunun həyata keçirdiyi Şuşanın azadedilmə əməliyyatından şok keçirdiyini etiraf edir. O, erməni mətbuatına müsahibəsində bunun necə baş verdiyinin bəlli olmadığını deyir. Ordumuzun birdən-birə, gözlənilmədən Şuşanın içinə daxil olması və erməni hərbçilərini məhv etməsi, ağır yaralaması elə anidən baş verib ki, düşmən çaş-baş qalıb. Bu gün də hansı vəziyyətdə olduqlarını Köçəryan etiraf edir.
Ermənistanın keçmiş prezidenti “Hələ də başa düsə bilmirik ki, Azərbaycan ordusu Şuşanı topsuz - tüfəngsiz necə ələ keçirdi? Cəbrayıldan piyada daxil olub Hadrutdan çıxdılar, oradan Füzuliyə keçdilər, Füzulidən bütün Əsgəranın alt bölgəsini və ətraf kəndləri ələ keçirdilər. Bir an belə dayanmadılar və heç yerdə müqavimət göstərə bilmədik. Şuşaya daxil olmaları isə möcüzə kimidir. Nə biz, nə də hərbi ekspertlərimiz bunun necə baş verdiyini hələ də anlaya bilmirlər” - deyə bildirib.
- “...Ermənistanı diz çökdürən bu əməliyyatın şokunu uzun illər yaşayacaqlar”
“Novoye vremya” qəzetinin baş redaktoru Şakir Ağayev baki-xeber.com-a bildirdi ki, Şuşada aparlan döyüşdə, Şuşa uğrunda mübarizədə seçilən taktika dünya hərb tarixinə yazılası bir taktikadır: “Bilirsiniz, Şuşa elə bir coğrafi mövqedə yerləşir ki, ora asanlıqla daxil olmaq çətindir. Çünki Şuşanın əsas yolu olan Laçın yolu hələ o zaman düşmən tapdağında idi. Şuşa kimi alınmaz qalaya qalxıb bu şəhəri düşməndən almaq, təbii ki, bu, hərb tarixində bir yenilikdir. Bunu təkcə biz demirik, dostlarımız da, düşmənlərimiz də deyirlər. Köçəryan da ordumuzun keçirdiyi Şuşanı azadetmə əməliyyatından dili-dodağı əsə-əsə danışır, heyrətini gizlədə bilmir. Köçəryan da, onun kimiləri də müharibənin taleyini həll edən və Ermənistanı diz çökdürən bu əməliyyatın şokunu uzun illər yaşayacaqlar.
Köçəryan kimdir? Bu əməliyyat haqqında müasir dünyanın hərb tarixində böyük rolu olan generallar, NATO, Pentaqon generalları danışırlar, bunu hərb tarixinin uğuru olaraq qəbul edirlər ki, Azərbaycan hərbçiləri Şuşanı hansı taktika ilə alıblar. O biri ərazilərimizin artilleriya ilə, dronlarla və digər silahlardan istifadə edərək azad olunması hərbçilərimizin işini bəlkə də asanlaşdırırdı. Amma Şuşa əməliyyatında bunların heç birindən istifadə edilmədi. Hamı bilirdi ki, ermənilərin əsas hərbi qüvvəsi Şuşadadır və çox az itki ilə, kiçik bir qüvvə ilə 6-7 min erməni hərbçisini tərksilah etmək, təbii ki, hərb tarixinə düşəsi hadisədir. Biz tarix kitabından Suvorovun Alp dağlarını alması səhnəsini oxuyanda bu bizə möcüzə kimi gəlirdi. Amma Şuşanın alınması onu göstərdi ki, Azərbaycan Ordusu bunu bacarır, ordumuz sıldırım qayaları keçərək vətən torpağını azad edib. Bu, əlbəttə, ilk növbədə, hərbçilərimizin peşəkarlığından, Şuşa əməliyyatına başçılıq edən hərbi rəhbərliyin yüksək döyüş taktikası seçməsindən və hər şeyin başında isə vətənpərvərlik hissi dayandığından xəbər verir. Şuşaya hücum edərək onu düşmən əsarətindən qurtaran oğullar bilirdilər ki, doğma torpaq uğrunda, müqəddəs iş üçün vuruşurlar. Əslində, Köçəryanın dilini-dodağını qurudan da Şuşanı işğaldan azad edən oğullarımızın gücü, iradəsi, vətənpərvərliyi, daxili inamı, torpağımızı düşməndən azad etmək uğrundakı qüsursuz mübarizəsidir. Azərbaycan əsgəri Şuşanı öz ürəyinin təpəri, içindəki böyük vətən sevgisinin işığı ilə düşməndən aldı, kökləndiyi güclü mənəvi-ruhi əhvalı ilə düşmənə qələbə çaldı” - deyə Ş.Ağayev qeyd etdi.
İradə SARIYEVA
