24/11/2020 13:19
728 x 90

Kəlbəcərdə ermənilərin özlərinə saxta tarix quraşdırmaq üçün istehsal sexi düzəltdikləri aşkarlanıb - FOTO

Təvəkkül Əliyev: “Biz gecikmədən beynəlxalq təşkilatların, xüsusən də UNESCO-nun diqqətinə ermənilərin saxta, qondarma tarix oyununu çatdırmalıyıq”

img

Azərbaycan ərazilərinin Ermənistanın işğalı altında olduğu dövrdə ermənilər burada saysız-hesabsız saxtalaşdırma cinayəti həyata keçiriblər. Özlərinin bu torpaqların “qədim sakinləri” olduqlarını dünyaya “sübut etmək” üçün müxtəlif cinayətkarlıq üsullarından istifadə ediblər.

Kulis.az-ın yaydığı məlumata görə, Kəlbəcərdə ermənilərin “tarix” istehsal edən emalatxanaları aşkarlanıb. Həmin emalatxanada ermənilər özlərinə tarix qondarmaq fəaliyyəti ilə məşğul olublar.

Erməni daş ustaları qədim qəbir daşları formasında hazırlanan abidələrin üzərinə əski hərflər, işarələr, xaç əlavə edərək, daşları bir müddət uksus və xüsusi hazırlanmış məhlulda saxlayıblar. Bu müddətdə daşlar eroziyaya və rəng dəyişikliyinə uğrayıb. Sonradan bu daşlar Kəlbəcər və digər Azərbaycan rayonlarında basdırılırmış.

  • “...Qərbi Azərbaycanda da daşları yonaraq üzərinə “xaçqar”lar, “qədim erməni yazıları” həkk edərək torpağın altına basdırıblar”

Məsələyə münasibət bildirən Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutunun aparıcı elmi işçisi, tarix üzrə fəlsəfə doktoru Təvəkkül Əliyev “Bakı-Xəbər”ə şərhində qeyd etdi ki, ermənilər bu cinayətkar əməllərə son 28-30 ildə deyil, hələ Sovet dövründən başlayıblar. Ermənistanın bir çox aliminin iştirakı ilə saxta tarix yaradılması prosesinə başlandığını deyən T.Əliyevin sözlərinə görə, onlar Sovet dövründə də “tarix” qondarma emalatxanaları, sexləri açıblar. “Ermənilər bu cinayətləri hər zaman işlədib, saxtalaşdırma siyasəti yürüdüblər. Təkcə Qarabağda, Kəlbəcərdə və başqa ərazilərimizdə deyil, tarixi torpağımız olan Qərbi Azərbaycanda da daşları yonaraq üzərinə “xaçqar”lar, “qədim erməni yazıları” həkk edərək torpağın altına basdırıblar. Təkcə qondarma yazılı daşları basdırmaqla kifayətlənməyiblər, həm də o daşları basdırdıqları yerlərin xəritələrini hazırlayıb çap ediblər ki, gələcəkdə “davamçıları” bu daşları axtaranda çətinlik çəkməsinlər. Onlar indiyə qədər minlərlə, onminlərlə belə qondarma daşlar hazırlayaraq Azərbaycanın tarixi ərazilərində basdırıblar”.

Ermənilərin saxta tarix quraşdırmaqda mahir olduğunu vurğulayan T.Əliyevin sözlərinə görə, onlar bu saxtakarlıq cinayətini işləyir, sonra da onları kitab halına salıb “mənbə”yə çevirirlər, bununla kifayətlənməyib həmin o kitabları və çap etdikləri saxta xəritələri xarici ölkələrdə, beynəlxalq aləmdə təbliğ edirlər. “Erməni yazıçılarından biri iddia edərək yazıb ki, guya VII Bizans ordusu Qarabağ bölgəsindən keçəndə “Tiqranakert” deyilən bir yerdə məskən salıb və sonradan Sasani qoşunları onları mühasirəyə alıb və sair. Sonrakı dövrlərdə onun yazdıqları üzərində erməni alimləri “araşdırmalar aparıblar”. Halbuki, VIII əsrdən XIII əsrə qədər onlarla ərəb müəllifi, ərəbdilli qaynaqlar var ki, bu bölgədə baş verən hadisələri tam incəliklərinə qədər qələmə alıblar, bütün toponimlərin – kəndlərin, şəhərlərin, çayların,dağların və sair hamısının adlarını əks etdiriblər. Necə ola bilər ki, bu qədim mənbələrdə ermənilərin iddia etdiyi “50 minlik əhalisi olan Tiqranakert” haqqında bir dənə də olsun xatırlatma yoxdur. Baxın, bütün bunlar onların həyata keçirdikləri saxtakarlıq siyasətinin göstəricisidir. Mən onları Sovet dövründən tanıyıram. Bir dəfə İrəvan yaxınlığında arxeoloji qazıntı aparan bir erməni alimi mənə dedi ki, bu gün bu yazdıqlarım heç kəsə lazım deyil, amma yüz ildən, min ildən sonra bunlar “mənbə” olacaq, bunlar oxunacaq, araşdırılacaq, ona görə bunları nəşr edirik ki, gələcək nəsillər bundan istifadə etsinlər. İnanıram ki, Qarabağ ərazisi tamamilə təmizlənəndən sonra biz o ərazilərdə arxeoloji qazıntı işlərini davam etdirəcəyik. Onların “xaçqar”lar adı ilə hazırlayıb torpağa basdırdıqları o saxtakarlıq nümunələrini silib atacağıq. Əslində, bu “xaçqar” deyil, haça daşlar deməkdir. Bizim ana dilimizdə olan haça sözündən əmələ gəlib. Ermənilər və digər bizimlə qonşuluqda yaşayan xalqların bəziləri “h” səsini işlədə bilmirlər, ona görə də onu “x”ya çeviriblər. Haça sözü “xaça” kimi düzəldilib. İki daşı, yaxud iki ağacı çarpaz şəkildə qoyanda haça əmələ gəlir. Ermənilər haça daşları “xaçqar” adı ilə xüsusi emalatxanalarda düzəldib bizim torpaqlarımıza basdırırlar. Biz bunun qarşısını almaq üçün böyük tədbirlər görməyə başlamalıyıq. Çünki sabah ermənilər dünyaya car çəkəcəklər ki, azərbaycanlılar bizim “xaçqar”ları “dağıdırlar”, “məhv edirlər”. Biz bu gün beynəlxalq təşkilatların, xüsusən də UNESCO-nun diqqətinə ermənilərin saxta, qondarma tarix oyununu çatdırmalıyıq. Bu istiqamətdə hərtərəfli təbliğat aparmalıyıq. Ermənilərin 20-30, 40-50 və daha çox ildir bu cür qondarma tarix quraşdırdıqlarını dünyaya çatdırmalıyıq. Bu gün onlar Kəlbəcərdən, Ağdamdan və digər ərazilərimizdən köçüb gedirlər, amma gedərkən torpağa bu cür qondarma yazılı daşlar basdırırlar ki, sabah beynəlxalq komissiya yaradılsa və bu məsələni araşdırsa, bu daşları “üzə çıxara” bilsinlər və özlərinin bu ərazinin “qədim sakinləri olduğunu” “sübut etsinlər”. Odur ki, biz tədbirlər görməliyik. Bu saxtakarlığı təsdiqləyən bütün faktları toplayıb beynəlxalq qurumlara çatdırmalıyıq” - deyə T.Əliyev vurğuladı.

İradə SARIYEVA

Son xəbərlər