Ağdamda mürəkkəb erməni istehkamları qansız alınmasaydı - İlham Əliyev diplomatik yolla nə qədər qan-qırğının qabağını aldı...

img

Azərbaycan Prezidenti, Rusiya Prezidenti və Ermənistan Baş nazirinin noyabrın 10-da imzaladığı birgə bəyanata uyğun olaraq Ermənistan tərəfindən ərazilərin boşaldılması qrafik üzrə həyata keçirilir. Bəyanatda nəzərdə tutulduğu kimi, Ağdam rayonu noyabrın 20-nə Ermənistan ordusu tərəfindən tam boşaldılıb və Azərbaycan ordu hissələri əraziyə daxil olub. Ağdam rayonunun ərazisi üzrə keçmiş təmas xətti boyunca Ermənistan ordusu tərəfindən yaradılmış müdafiə istehkamları mürəkkəbliyi ilə seçilib. Bir neçə müdafiə xəttindən ibarət bu istehkamlar müasir standartlar tətbiq edilməklə hazırlanıb. Bu səddin keçilməsi ciddi texnika və insan itkisi olmadan faktiki mümkün deyildi. Ancaq Azərbaycan Prezidentinin diplomatik məharəti, prinsipiallığı və dəmir iradəsi ilə Azərbaycan Ordusunun zəfər yürüşü nəticəsində ərazilərmizin işğaldan azad edilməsi Ermənistanı kapitulyasiyaya və əraziləri boşaltmağa məcbur etdi. Azərbaycan Ordusu heç bir itki, şəhid vermədən, qan tökülmədən Ağdam rayonuna daxil oldu. Bundan sonrakı qısa zaman kəsiyində Kəlbəcər və Laçın rayonlarının boşaldılması və Azərbaycana təhvil verilməsi prosesi də uğurla başa çatacaq.

Göründüyü kimi, Prezident İlham Əliyevin həyata keçirdiyi qətiyyətli siyasət mürəkkəb müdafiə sisteminə malik ərazilərin heç bir itki vermədən, döyüşsüz azad edilməsinə şərait yaratdı. Bunun hərbi nöqteyi-nəzərdən əhəmiyyətini necə qiymətləndirə bilərik?

  • “Hərbi-siyasi təzyiqin nəticəsində əldə olunan bu uğuru da böyük müharibə zəfəri sayıram”

Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, hərbi əməliyyatların başladığı ilk gündən Prezident prosesin bir neçə mərhələdən ibarət olduğunu deyib: “Yəni Prezident bu məsələdə sülhə, təmsilçilik sənədinə imza atmağa məcbur etməni nəzərdə tuturdu. Biz bu mərhələni də Ermənistanın kapitulyasiyaya imza atması ilə gördük. Elə rayonlar var ki, onların hərbi yolla yox, dinc üsulla işğaldan azad edilməsi olduqca müsbət haldır. Ordumuzun yüksək hazırlığı, ruh yüksəkliyi istənilən ərazinin hərbi yolla da azad olunmasına imkan verirdi.  Proseslər bizim istədiyimiz kimi davam etdi. Çox qısa zamanda Azərbaycan Ermənistanı təslim olmağa vadar etdi. Şuşanın işğaldan azad edilməsi bu prosesi daha da sürətləndirdi. Bəziləri Ağdamın Azərbaycana qaytarıldığını ifadə edirlər. Xeyr, bunu belə təqdim etmək lazımdır: Ağdam da işğaldan azad olundu! Çünki ermənilər həmin torpaqları özxoşuna tərk etmirlər. Təbiidir ki, bu üç rayonun  hərbi yolla azad edilməsi itkisiz olmayacaqdı. Etiraf edək ki, itkisiz döyüş olmur. Bu baxımdan çox böyük ərazilərə malik, ermənilərin ciddi müdafiə səddi qurduğu ərazilərimizin güllə atmadan, itki vermədən azad edilməsi ciddi uğurdur. Hərbi-siyasi təzyiqin nəticəsində əldə olunan bu uğuru da böyük müharibə zəfəri sayıram”.

Ekspertin sözlərinə görə, Ağdam rayonu böyük strateji əhəmiyyətə malikdir və onun qaytarılması ilə, demək olar ki, Qarabağdakı bütün yollara nəzarət imkanı bizə keçmiş oldu.

Məhəmmədəli QƏRİBLİ

 

Son xəbərlər