Ermənistanın Baş naziri Nikol Paşinyanın yürütdüyü avantürist siyasət bu ölkəni xəyanətlər, fərarilik və xaos girdabına düçar edib. Bu gün Ermənistanda, sözün həqiqi mənasında, xaos, özbaşınalıq, qarmaqarışıqlıq hökm sürür, bütün bunların baiskarı isə anavtürist Paşinyandır. Təcavüzkar ölkənin işğalçı Baş naziri şirin yalan vədlərlə aldadaraq, bəzən də zorla, məcburi şəkildə erməniləri cəbhəyə aparır, lakin cəbhədə yaşanan davamlı məğlubiyyətlər Paşinyanın taleyini tükdən asılı vəziyyətə gətirib çıxarıb.
Məsələ bundadır ki, Paşinyan Azərbaycan Ordusu qarşısındakı ardıcıl məğlubiyyətlərini cəmiyyətə heç cür izah edə bilmir, illərdir erməni əhalisində güclü ordu barədə yaradılmış mif dağılır. Son 20 gündə artıq Ermənistan ordusunda 4 yüksək vəzifəli şəxs işdən qovulub. Oktyabrın 8-də Ermənistan Milli Təhlükəsizlik Xidmətinin rəisi Argişti Kərəmyan, oktyabrın 26-da Ermənistan Milli Təhlükəsizlik Xidmətinin Sərhəd Qoşunlarının komandanı Vaqinak Sarkisyan, oktyabrın 27-də Ermənistan Milli Təhlükəsizlik Xidmətinin Əks-kəşfiyyat İdarəsinin rəisi, general-mayor Ohannes Karumyan və eyni gündə Sərhəd Qoşunlarının qərargah rəisi Qagik Tevosyan vəzifəsindən uzaqlaşdırılıb. Onlar xəyanətdə ittiham edilir.
Eyni zamanda, Ermənistanda insanlar evlərindən silah gücünə hərbi komissarlıqlara, oradan isə birbaşa döyüşə aparılır. Hakimiyyətə qarşı kütləvi itaətsizlik, fərarilik o həddə çatıb ki, N.Paşinyan Ermənistanın ədliyyə nazirinin müavini Vahe Danielyanı oktyabın 28-də vəzifəsindən azad edərək, maaşını saxlamaqla cəhbəyə göndərdiyini açıqlayıb. Bu da fərarilik hallarının qarşısını almağa kömək etməyib. Görünür, bu adla V.Danielyanın vəzifəsindən uzaqlaşdırılması həm də fərarilərə qarşı ədliyyə orqanlarının tədbirlər görə bilməməsi ilə bağlıdır, bu yolla Paşinyan hakimiyyət nümayəndələrini cəzalandırmağa çalışır.
Ermənistanda, həmçinin, insanlar təkcə ordunun acı məğlubiyyəti, ölkədə hərc-mərclik, özbaşınalıqdan deyil, həm də günü-gündən ağırlaşan sosial-iqtisadi durumdan ciddi narazıdırlar. Hazırda Ermənistanda ərzaq da daxil olmaqla əksər məhsulun qiymətində artım müşahidə olunur ki, bu da onsuz da ciddi sıxıntılar içində olan sıravi insanların vəziyyətini daha da ağırlaşdırır.
Ermənistanda hakimiyyət içindəki qüvvələr, klanlar arasında qarşıdurma və ziddiyyətlər o qədər kəskinləşib ki, ölkədə tam xaos hökm sürür.
“Hətta Paşinyan istefa versə belə Ermənistan bu siyasi böhrandan çıxa bilməyəcək”
Paşinyanın üzündən Ermənistanda yaşananları şərh edən Qarabağ Azadlıq Təşkilatının (QAT) sədri Akif Nağı hesab edir ki, işğalçı dövlət hələ indən sonra daha da pis vəziyyətə düşəcək. Paşinyan hökumətinin işğalçılıqdan əl çəkməli və Azərbaycan torpaqlarından öz işğalçı hərbi birləşmələrini təcili surətdə çıxarmalı olduğunu deyən A.Nağının fikrincə, nə qədər ki, bunlar baş verməyib, düşmən ölkədə xaos daha da dərinləşəcək və bu da erməni xalqına müsbət heç nə vəd etmir. “Bu gün cəbhədə Ermənistanın işğalçı silahlı birləşmələri Azərbaycan Ordusu qarşısında heç nə edə bilmir, aciz vəziyyətə düşüblər. Ermənistan tamamilə gücsüzdür və onun bütün resursları tükənib, iflas edib. Ermənistanı indiyə qədər silahlandıran ölkələrdən də artıq silah gəlmir. Bu gün Ermənistanın nə silah, nə də insan ehtiyatları qalıb. Düşmən ölkədə həm siyasi, həm hərbi, həm də iqtisadi böhran o həddə çatıb ki, insanlar açıq şəkildə etiraz edirlər. Gənclər müharibədən müxtəlif yollarla yayınır, hər yerdən çarəsi kəsilən Paşinyan yaşlıları, qadınları və uşaqları zorla cəbhəyə göndərir, yenidən döyüş bölgəsinə muzdluları gətirmək üçün də vaxtları azdır, Ermənistan tamam iflas vəziyyətindədir. Bu da Azərbaycan Ordusunun qələbələri, gücü ilə bağlıdır, ordumuz düşmənin silahlı birləşmələrini darmadağın edib. Ermənistan ordusunun dağılması, hərbçilərin döyüşmək istəməməsi, düşmən ordusunda fərariliyin günü-gündən artması, aclıq-səfalət, ərzaq qıtlığı Ermənistanda ciddi xaos yaradıb. Düşmən ordusundakı fərarilik, paşıpozuqluq, nizamsızlıq bu ölkədə siyasi böhrana səbəb olub. Yəni hakimiyyət strukturları artıq işləmir, fəaliyyət göstərməkdən imtina edən qurum rəhbərləri vəzifədən kənarlaşdırılır, həbs edilir, bəziləri cəbhəyə göndərilir, onların yerinə isə başqaları təyin edilir. Yeni təyin edilənlər də onlara tapşırılan işlərin öhdəsindən gələ bilmirlər. Bu gün Ermənistanı tamamilə siyasi böhran bürüyüb və düşmən ölkədə hərc-mərclik, xaos günü-gündən dərinləşir. Ermənistanın bu böhrandan çıxması mümkün deyil.
Hətta Paşinyan istefa versə belə Ermənistan bu siyasi xaosdan, siyasi böhrandan çıxa bilməyəcək. Bunun hamısı da həm Azərbaycan Ordusunun qələbələri, uğurlu hərbi əməliyyatları, həm də artıq beynəlxalq aləmdə Azərbaycanın ədalətli mövqeyinin dəstəklənməsi, müdafiə olunması ilə bağlıdır. Ermənistan artıq beynəlxalq təşkilatlardan əvvəlki dəstəyi ala bilmir, ümid etdiyi dövlətlər də ondan üz çevirib, Kollektiv Təhlükəsizlik Müqaviləsi Təşkilatından da dəstəyi yoxdur, informasiya dəstəyi də iflasa uğrayıb. Paşinyan hökuməti müvəqqəti də olsa ömrünü uzatmaq üçün yalan danışmaqla məşğuldur. Qənaətimə görə, yalan danışmaqla Paşinyan ölkədən qaçıb getmək üçün özünə şərait hazırlayır ki, çıxıb getsin, canını xalqın mühakiməsindən qurtarsın, özünə haradasa sığınacaq tapıb gözləsin. Amma gizlənə bilməyəcək. Paşinyan Azərbaycan dövlətinin tələbilə qurulacaq haqq-ədalət məhkəməsindən canını qurtara bilməyəcək”.
A.Nağı hesab edir ki, qələbədən sonra Azərbaycan mütləq şəkildə Paşinyan və ondan əvvəlki Ermənistan rəhbərliyinin üzərində beynəlxalq məhkəmənin qurulmasına nail olmalıdır. A.Nağı qeyd etdi ki, bununla yanaşı, Paşinyan erməni xalqının qəzəbindən xilas ola bilməyəcək, hara qaçsa, xilas olmayacaq. “Ermənistanın bu şəkildə xaotik vəziyyətə gəlib çatması Paşinyanın çirkin əməllərinin göstəricisidir. Düşmən ölkədə siyasi böhran dərinləşdiyinə görə artıq dövlət strukturları işləmir, iqtisadiyyat çöküb, ərzaq çatışmazlığı var. Əvvəllər yenə də xaricdən ərzaq gəlirdi, amma indi o da kəsilib. Bunun nəticəsində də düşmən ölkədə ərzaq qıtlığı, bahalaşma, möhtəkirlik yaranıb. Yəni Ermənistan tamamilə iflas ərəfəsində yox, iflas içərisindədir. Ermənistan üçün də ən pisi odur ki, vəziyyəti düzgün qiymətləndirib doğru nəticə çıxara bilmirlər. Bu da ondan ibarətdir ki, Ermənistan ordusu nə qədər gec deyil Azərbaycan dövləti, Azərbaycan Ordusu qarşısında təslim aktını imzalamalıdır, ağ bayraq qaldırmalıdır. Ermənistan bu addımı atmazsa, daha dərin uçuruma düşəcək, daha ağır fəlakət içində çabalamalı olacaq” - deyə A.Nağı qeyd etdi.
İradə SARIYEVA
