Putin 7 rayon məsələsində İlham Əliyevlə tam üst-üstə düşən mövqe ortaya qoydu - Ermənistanı şoka salan reallıq…
Rusiya Prezidenti Vladimir Putin son açıqlamasında, demək olar ki, İlham Əliyevin səsləndirdiyi tezislərlə mühiyyətcə eynilik təşkil edən fikirlər söyləyib: “Azərbaycan nə deyir? Onu deyir ki, hər halda Azərbaycanın heç bir etnik münaqişəyə və Ermənistana aidiyyəti olmayan əzəli torpağı olan yeddi rayonu qaytarmaq və Dağlıq Qarabağla məsələni ayırd etmək hüququ var”.
O hər kəsin öz həqiqəti olduğunu bildirib: “Burda sadə həllər yoxdur. Çünki düyün çox mürəkkəb bağlanıb. Bizim mövqeyimiz tamamilə aydındır. Ermənistanla da qarşılıqlı əlaqəli şəkildə Dağlıq Qarabağın təhlükəsizliyinin təmin olunması üçün müəyyən rejim tətbiq olunması şərti ilə əvvəl 5, sonra 2 rayonun Azərbaycana qaytarılmasının mümkünlüyünü deyirik.
Münaqişənin uzunmüddətli həllinə nail olmaq üçün həm dəyişməz hörmətlə yanaşdığımız Azərbaycan xalqının, həm də erməni xalqının, Ermənistan dövlətinin maraqlar balansını tapmaq lazımdır ki, insanların özünü təhlükəsiz hiss edə bilməsi, eyni zamanda effektiv regional inkişaf üçün imkan yaradılsın. On illərlə davam edən münaqişə tərəflərin effektiv inkişafına imkan vermir”.
Rusiya prezidenti Vladimir Putin, həmçinin, Türkiyə də daxil olmaqla, bir çox ölkənin Qarabağla bağlı danışıqlarda iştirak etməsinin lazım olduğunu deyib: "Ermənistan və Azərbaycan arasındakı münaqişə Türkiyənin də olduğu Minsk Qrupu çərçivəsində danışıqlar yolu ilə həll olunmalıdır".
Göründüyü kimi, Putin, xüsusilə də Cenevrə görüşü ərəfəsində, demək olar ki, Azərbaycanın tələblərinə haqq qazandırıb. Reallığı əks etdirən, lakin erməniləri ciddi məyus edən bu mövqedən hansı nəticəni çıxarmaq olar?
Politoloq Əhəd Məmmədli “Bakı-Xəbər”ə açıqlamasında bildirdi ki, Putinin bu açıqlamasında bir sıra reallıqlar əks edilib: “Düzdür, Ermənistan Putindən belə açıqlama istəmir. Ancaq Putinin indiki məqamda hətta neytral açıqlama verməsi belə bizim üçün məqbuldur. Çünki hərbi əməliyyatların bizim üstünülüyümüzlə davam etdiyi dönəmdə Moskvanın belə mövqeyi bizi qane edir. Putinin bu açıqlamasında bizim üçün diqqət çəkən iki detal var. Birincisi, 7 rayonun tam olaraq bizə qaytarılmasının ciddi tələb olması və bunun onlar tərəfindən də dəstəklənməsi. İlham Əliyev də bu tələb yerinə yetiriləcəyi halda sülhə nail olmağın mümkünlüyünü bildirib. Cenevrə görüşü ərəfəsində Putinin belə mövqe sərgiləməsi, həm də Paşinyana bir mesajdır ki, danışıqlarda konstruktiv mövqe tutsun. Digər detal isə Türkiyənin münaqişənin həllində roluna verilən qiymətdir. Artıq Putin də açıq etiraf etdi ki, Türkiyəni masada görməyə etiraz etmir. Bu da, faktiki olaraq, bizim də dəstəklədiyimiz 2+2 formatına yandırılan yaşıl işıqdır. Bununla da Rusiya ilə Türkiyənin münaqişənin həllində rolu artmış olacaq. Bu, indiyə qədər səriştəsiz fəaliyyət göstərən Minsk Qrupunun rolunun zəifləməsi anlamına gəlir. Bu açıqlamadan ən gözəl dərsi Ermənistan çıxarmalıdır. Faktiki olaraq döyüş meydanında məğlub olan Ermənistan diplomatik cəbhədə də vəziyyətin yaxşı olmadığına bir daha nəzər salıb, işğaldan əl çəkmək yolunu tutmalıdır”.
Rusiyanın bu mövqeyi Azərbaycanın haqlı tələblərinə verilən dəstək kimi də yozula bilər.
Məhəmmədəli QƏRİBLİ
