Azərbaycan Ordusunun zəfərləri davam edir. Bir aydan artıq zamanı arxada qoyduğumuz müharibə dönəmində Azərbaycan işğal altındakı bir neçə rayonu, sayı 100-lərlə olan kəndləri düşməndən azad edib.
Bir sıra analitiklər Azərbaycanın müharibəni öz kulminasiya nöqtəsinə çatdırdığına dair iddialar ortaya qoyurlar. Artıq Azərbaycan Ordusunun strateji nöqtələr sayılan, Ermənistanla Dağlıq Qarabağı birləşdirən “Laçın dəhlizi”nə nəzarət etdiyi və Şuşanın astanasında olduğu bildirilir. Hətta düşmən tərəfin özü də bu faktları təkzib etmir. Qarabağ separatçılarının başçısı Araik Arutyunyan Azərbaycan Ordusunun Şuşaya hücum etdiyini bildirib. A.Arutyunyan deyib: "Onlar təkcə cəbhə boyu hədələmirlər, həm də Şuşa istiqamətində ciddi hərbi səylər göstərir, nəyin bahasına olursa-olsun, bu şəhərə yiyələnmək istəyirlər". Qarabağ separatçılarının başçısı bütün erməniləri birləşməyə və Şuşanı müdafiə etməyə çağırıb:
"Azərbaycan Ordusu buradan cəmi bir neçə kilometr məsafədədir. Maksimum beş".
Göründüyü kimi, separatçıların lideri Azərbaycan əsgərinin artıq Şuşaya yetişdiyini deyir. Maraqlıdır, hərbi strateji önəminə görə adıçəkilən ərazilərdən hansına sahib olmağımız müharibənin taleyini tam həll edə bilər və niyə?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Qarabağda gedən hərbi əməliyyatların əsas strateji məqsədi Şuşa, Xocalı və Xankəndi istiqamətindəki hərbi birləşmələri darmadağın edib, həmin əraziləri işğaldan azad etməkdir: “Düşmənin əsas güc mərkəzi ora sayılır. Bu səbəbdən də, ermənilər Şuşa, Xankəndi və Əsgəran istiqamətlərinin müdafiəsini təşkil etmək üçün Xocavənd-Ağdərə-Kəlbəcər-Ağdam istiqamətini bufer zona kimi istifadə edir. Son məlumatlara görə, Azərbaycan silahlı qüvvələri həm Xocavənddə, həm də Ağdərədə uğurlu hərbi əməliyyatlarını davam etdirir. Ötən gün gecə yayılan məlumata görə, Azərbaycan Ordusu Xocavənd rayonu istiqamətindən Şuşa şəhərinə yönəlib. Bu, əlbəttə ki, Azərbaycan Ordusunun əməliyyatlarının uğurla yekunlaşacağına bir işarədir. Çünki həmin istiqamətdə olduqca strateji əhəmiyyətə malik olan Laçın var. Oranın strateji əhəmiyyəti ondan ibarətdir ki, “Laçın dəhlizi” və Şimaldan Vardenis-Kəlbəcər, həmçinin Laçından birbaşa Şuşaya gedən yol həmin ərazidədir. Azərbaycan Ordusu həmin istiqamətdəki mövqelərini möhkəmləndirməklə, “Laçın dəlizinə” tam nəzarəti ələ keçirsə, Ermənistanın beli tamamilə qırılacaq. Bundan sonra, Ermənistandan Qarabağa heç bir hərbi yük keçə bilməyəcək. Ən vacib istiqmaətlərdən biri budur. Laçın Şimalında olan digər yolun da nəzarət altında olması ermənilərin təminat məsələsini tam sıfıra salacaq. Bununla da Azərbaycan Ordusu Xocavənd-Xocalı, Xocavənd - Kirs dağı-Şuşa istiqmaətində və Laçından Şuşaya istiqamətlənə biləcək. Həmin istiqamətdə olan erməni hərbi birləşmələri asanlıqla məhv ediləcək. ümumiyyətlə, Laçın rayonuna sahib olmağımız Ermənistan ordusunun hərbi təminat və təchizat məsələsinin qarşısını almaqla yanaşı, həm də onların tam məğlub olmasına şərait yaradacaq. Ermənistan ordusunun mənəvi-psixoloji vəziyyəti də çox ağırdır. Kütləvi şəkildə fərarilik halları var. Bir qədər də deyilən istiqamətlərdə uğurlarımız artarsa, ermənilər könüllü olaraq vuruşmaqdan imtina edəcəklər. Biz artıq məqsədə çatmaq üzrəyik. Çünki Qarabağın mərkəzinə doğru irəliləməyi bacarmışıq. Tez bir zamanda müzəffər ordumuz bu məsələnin öhdəsindən bacarıqla gələcək”.
Müsahibimizin sözlərinə görə, Ermənistanın keçmiş səhra komandirlərindən bir neçəsinin sosial şəbəkələrdə videoları yayılıb. Onlar deyir ki, silah təminatı cəhətdən ciddi problemləri var. Hətta Paşinyanı hədələyirlər ki, lazımi kömək gəlməsə, silahlı şəkildə Ermənistana hücum edəcəklər.
Məhəmmədəli QƏRİBLİ
