“Qarabağ klanı”nın Rusiya tərəfindən dəstək alması və Ermənistanda mövcud hakimiyyətə qarşı bu dəstəkdən yararlanmaq niyyətində olması heç kimə sirr deyil. Amma belə görünür ki, digər siyasi qüvvələr də Paşinyana qarşı Kreml amilindən istifadə etməyə can atır. Məsələn, “Çiçəklənən Ermənistan” partiyasının rəhbəri, iş adamı Qaqik Tsarukyan artıq bu barədə konkret mesajlar verir:"Birmənalı şəkildə bəyan edirəm ki, Ermənistanda ən böyük müxalifətçi siyasi qüvvənin – “Çiçəklənən Ermənistan” partiyasının lideri, bir vətəndaş olaraq ölkəmizdə anti-Rusiya düşüncələrini formalaşdırmağa yönəlmiş təxribatların qarşısını almaq üçün əlimdən gələni edəcəyəm”.
O qeyd edib ki, son zamanlar Ermənistanda anti-Rusiya və antidövlət qüvvələrinin fəal səyləri ilə ölkədə anti-Rusiya əhval-ruhiyyəsinin süni şəkildə kəskinləşməsi baş verir:“Bu qüvvələrin son məqsədi xalqlarımız arasındakı dostluq əlaqələrini pozmaqdır. Nümunə olaraq qeyd etmək lazımdır ki, 102-ci hərbi bazanın ölkəmizdən çıxarılmasına səbəb olacaq Rusiya ilə hərbi müqaviləyə yenidən baxılmasının zəruriliyi barədə tezis erməni cəmiyyətinə bilərəkdən təqdim olunur. Düşünürəm ki, bu təkcə Türkiyənin və Azərbaycanın arzusu deyil, eyni zamanda bütün bölgədə onsuz da kövrək bir vəziyyətin alovlanmasına münbit zəmin yaradan amildir. Əminəm ki, Ermənistanın inkişafı, ölkəmizin təhlükəsizliyini, müstəqilliyini möhkəmləndirmək üçün Rusiya ilə münasibətlərimizi həm ikitərəfli, həm də MDB, Avrasiya İqtisadi İttifaqı, KTMT çərçivəsində gücləndirməliyik".
“Erməni Qartalları: Vahid Ermənistan” partiyasının sədri Xaçik Asryan da Rusiya faktorunu xüsusi qabardır:“Ermənistan və Rusiyanın dürüst, sadiq dostluğunun alternativi yoxdur”. O qeyd edib ki, Ermənistanın bugünkü Amerikayönümlü hakimiyyəti Kollektiv Təhlükəsizlik Müqaviləsi Təşkilatının və Avrasiya İqtisadi Birliyinin üzvü olan Ermənistanı antirus planının üzvü edib:“Paşinyan Nikol və onun Sorosyönümlü hakimiyyəti Ermənistanın normal inkişaf gedişatını məhv edir”. Erməni mediası da bu xüsusda həyəcan təbili çalaraq yazır ki, Ermənistanda antirus baxımından baş verənlər, demarş addımları anlaşılmaz və məntiqsizdir. “Politik.am” nəşri yazır ki, Rusiyadakı Konstitusiya dəyişiklikləri ilə bağlı hesabatda erməni iqtidarı, nədənsə, Aleksey Navalnının mövqeyinə xüsusi diqqət yetirib ona rəğbətini göstərir: “Ancaq bu şəxsən Putin və ya Kremlə qarşı atılan demarş addımı olsa belə, bunun nə qədər düzgün hesablandığı və ya əsaslandırıldığını gəlin dərk edək. Belə təəssürat yaranır ki, Paşinyan ya anlamır, ya da başa düşmək istəmir, ya da sadəcə hakimiyyət ortaqları onu fırladır. Paşinyanın xarici siyasətdə və ya beynəlxalq münasibətlərdə həmişə çox zəif olduğu onun deputat olduğu dönəmindən məlumdur. Yalnız geosiyasət və ya regional siyasi inkişaf baxımından uzaqgörən olmaması (burnunun ucundan o yanı görməməsi) onu, demək olar ki, sıfır “arsenalı” ilə daim bölgədə güc sahibi olmuş və olacaq, bu mərkəzlə toqquşmağın baha başa gələ biləcəyi qlobal bir güc mərkəzi ilə üzləşməsinə gətirib çıxaracaq. Məsələn, sabah Qarabağda eskalasiya yaşanarsa, əlbəttə ki, Aleksey Navalnı azərbaycanlılara qarşı xəndəklərdə döyüşə gəlməyəcək, çünki ümumiyyətlə ermənilər Navalnı üçün sadəcə “xaçik”lərdir. Navalnı, həmçinin, Ermənistana silah verməyəcək və Ermənistanın təhlükəsizliyinin qarantı olaraq Türkiyə-Azərbaycan tandeminə qarşı çıxmayacaq. Paşinyan Avropaya, yoxsa ABŞ-a, kimə güvənir? Ümumiyyətlə, Avropanın təhlükəsizlik məsələlərini həll etmək üçün hərbi gücü yoxdur, ABŞ üçün isə Paşinyan sadəcə “boş yer”dir, əks halda o, heç olmasa bir dəfə dövlət katibi səviyyəsində qəbul olunardı. Bundan əlavə, ABŞ əlbəttə ki, təhlükəsizlik məsələlərində Ermənistana kömək etməyəcək, çünki Ukrayna baş ağrısına çevrilib, indiki gərgin dövdə yeni bir baş ağrısına heç zərurət yoxdur. Əlbəttə, Paşinyanın qanadı ona görə pərvazlanır ki, hər biri əsas cinayət işinə çevrilə biləcək siyasi addımları Brüsseldə və ya Vaşinqtonda səssizliklə qəbul olunur. Ancaq o qədər uzaqgörən deyil ki, siyasi baxımdan belə bir “göz bağlayıcının” qiymətinin ümumiyyətlə dövlət tərəfindən verilən güzəştlər şəklində çox baha başa gəldiyini başa düşmür? Yeri gəlmişkən, Rusiya mətbuatında tütün, qızıl və ya brilyant qaçaqmalçılığı ilə bağlı yeni açıqlamalar və ya mətbuatda hər hansı yeni nəşrin peyda olması ilə bağlı digər hallar baş verərsə, bu heç də təəccüblü olmamalıdır. Çünki daş atdığınız və daş yığdığınız bir vaxt var. Bir daş atdığınız zaman, sizin də istiqamətə qəbul etməli olduğunuz çox böyük bir daş atılacağına hazır olmalısınız”. Məqalədə qeyd olunur ki, Rusiya Ermənistanı himayə etməsə, İrəvan dövlətçiliyin itirilməsinə belə hazır olmalıdır.
Təhlükəsizlik və müdafiə sahələri üzrə rusiyalı ekspert Qriqori Trofimçuk isə bildirir ki, əslində, Ermənistan hakimiyyəti özü Rusiyanı uzaqlaşdırır:“Bu istiqamətdə son iki ildə müxtəlif addımlar atılıb. İndi telekanallar problemi yaradılır. Ermənistanın hazırkı hakimiyyəti Ermənistan ərazisində rus telekanallarını pullu etmək mövzusunu dövriyyəyə qoymaqla hələ vəziyyəti yoxlayır”. Onun sözlərinə görə, Nikol Paşinyan və onun tərəfdarları sevimli üslublarında fəaliyyət göstərirlər, Moskvanın reaksiyasını gözləyərək heç vaxt mətni sona çatdırmırlar:“Rus telekanallarının yayımını erməni paketində pullu etməyin siyasi səbəbi var, kanallar yoxdursa, bu, inteqrasiyanın zəif olması deməkdir”. Trofimçuk bildirib ki, bu halda uduzan Ermənistan olacaq və bu ölkə Azərbaycan, Türkiyə kimi güclü dövlətlərlə hansı münasibətdə olduğunu da yaddan çıxarmamalıdır.
Nahid SALAYEV
