Dövlət Təhlükəsizlik Xidmətinin antikorrupsiya tədbirləri çərçivəsində növbəti əməliyyatı Xarici İşlər Nazirliyində həyata keçirməsinə erməni KİV-nin absurd reaksiyası müşahidə olunur. Onlar iddia edirlər ki, güya bu tədbirlər nazir Elmar Məmmədyarovun diplomatik cəbhədəki uğursuzluqları ilə bağlı həyata keçirilir. Bu xüsusda qeyd edirlər ki, Azərbaycan XİN rəhbərinin əsas uğursuzluğu erməni nazir Mnatsakanyanla keçirdiyi son videogörüşdə müşahidə olunub:
“Azərbaycan bütün dünyanı münaqişənin hərbi yolla mümkünlüyünə inandırmağa çalışırdı, ancaq həmsədrlər görüşdən sonra açıq bəyan etdilər ki, hərbi yol mümkün deyil, xalqları sülhə hazırlamaq lazımdır”.
Təbiidir ki, bütün bunlar absurd bir yanaşmadır və əsl erməni xislətinə uyğundur. Məlumdur ki, Azərbaycanın Dağlıq Qarabağ və digər məsələlərlə bağlı xarici siyasət kursunu Məmmədyarov yox, ölkə Prezidenti müəyyənləşdirir. Belə olan halda, ermənilərin bu informasiya təxribatı hansı məqsədə hesablana bilər?
“Bir daha sübut olunur ki, ermənilərin ən qorxduğu məsələ məhz hərbi əməliyyatların bərpasıdır”
Politoloq Rəşad Bayramov “Bakı-Xəbər”ə açıqlamasında bildirdi ki, ermənilərin bu addımlarına o qədər də təəccüblə yanaşmaq lazım deyil:“Onlar bizimlə bütün istiqamətlər üzrə müharibə aparırlar. Bu məlumat da informasiya müharibəsinin tərkib komponentidir. Bilirsiniz ki, DTX bir çox qurumlarda antikorrupsiya tədbirləri həyata keçirib. Prosesin davamı olaraq həmin tədbirlər XİN-i də əhatə edib, sabah başqa bir qurumda da ola bilər. Ermənilərin bu məsələni öz diplomatik uğurları kimi interpretasiya etməsi daha çox daxili auditoriyalarına yönəlib. Çünki Ermənistanın daxilində acınacaqlı vəziyyət hökm sürür. Xüsusilə də koronavirusla bağlı vəziyyət ölkəni tam dilənçi halına salıb. Belə olan təqdirdə, xalqın başını nə iləsə qatmaq lazımdır. Məhz bu tip məlumatların mediaya ötürülməsi həmin məqsədlərə xidmət edir. Dağlıq Qarabağla bağlı məsələdə Azərbaycanın yürütdüyü siyasətdə heç bir dəyişiklik müşahidə olunmur. Biz yenə də öz mövqeyimizdə qalırıq. Hər zaman bəyan etmişik ki, sülh danışıqları fayda verməsə, öz ərazi bütövlüyümüzü ordumuzun gücü ilə təmin edəcəyik. Həmsədrlərin son bəyantı isə Azərbaycanda birmənalı olaraq ermənipərəst yanaşma kimi qarşılandı. Bu baxımdan da erməni KİV-nin xəbərini təxribat adlandırardım. Azərbaycanda hansısa naziri dəyişmək ölkə başçısı üçün elə də çətin deyil ki, bunun üçün dolayı zəmin hazırlasın. Hansısa nazirin işi onu qane etmirsə, bir imza ilə məsələni həll edə bilər. Elə qurumlar var ki, orda da antikorrupsiya addımalrı atılıb, ancaq rəhbərlik öz içini davam etdirir. Bir daha sübut olunur ki, ermənilərin ən qorxduğu məsələ məhz hərbi əməliyyatların bərpasıdır. Azərbaycan hər zaman bu haqqı özündə saxlayır”.
Ermənilərin bu cəhdinin də uğursuz piar olduğu üzə çıxır. Bununla onlar yalnız öz daxili ictimai rəylərini çaşdıra bilərlər, bizi yox.
Məhəmmədəli QƏRİBLİ
