Erməni mediasında Rusiya telekanallarının yayılmasına qarşı kampaniya güclənir. Qeyd olunur ki, rusiyalılar istəyirlər ki, Ermənistan onların şəxsi mülki olsun və onu ürəkləri istədikləri kimi idarə etsinlər: “Ermənistanda Rusiya televiziyalarının yayımının davam etdirilməsinə heç bir səbəb yoxdur. Niyə Rusiyanın Ukrayna, Gürcüstan və ABŞ-a qarşı təbliğatı Ermənistanda yayımlanmalıdır? Qoy onlar öz təbliğatlarını ölkələrində etsinlər. Siz Ukraynaya qarşı bu proqramların hər gün müxtəlif kanallarda 4 saat yayımlandığını bilirsinizmi? Niyə Ermənistan vətəndaşı bu çirkabı hər gün dinləməlidir?”.
Ermənistanın “Past” qəzeti isə yazır ki,Rusiya Ermənistanda anti-Rusiya əhval-ruhiyyəsinin artmasından narahatdır. Moskvanı bu əhval-ruhiyyənin hakimiyyətyönlü dairələr, hökumət nümayəndələri və deputatlar tərəfindən yaradılması narahat edir.
Məlumata görə, Rusiya rəsmiləri bu barədə Ermənistanın hakim dairələrinə irad bildiriblər, hakimiyyət isə bunun Ermənistanın daxili siyasi problemi olduğunu söyləyib: “Rusiyanın Ermənistandakı səfirliyi Moskvaya artıq bir neçə analitik material göndərib. Yaxın zamanlarda yeni anti-Rusiya kampaniyasının başlayacağına dair söhbətlər dolaşır”.
Görünən odur ki, erməni mediasında məqsədyönlü şəkildə anti-Rusiya kampaniyası aparılır.
“Bu qərar Rusiyada ciddi şəkildə mənfi qarşılanacaq və İrəvana qarşı ölçü götürüləcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Rusiya telekanallarının Ermənistanda analoq yayımının dayandırılması istiqamətində ölkə qanunverici sistemində dəyişiklik edilməsi gözlənir: “Baş nazir Nikol Paşinyanın əsas strateji planı ölkəsində Rusiyanın ideoloji bazası olan telekanallarının yayımının qarşısını almaqdır. Bu qərar Moskvada hiddətlə qarşılanır və forpost ölkənin öz ağasına qarşı olduğunun göstəricisidir. Həqiqətən də Rusiya telekanalları Kremlin informasiya siyasətini təbliğ edən əsas bazadır. Ona görə də Putinin Ermənistanda müxalifətə verdiyi dəstək əvəzində Paşinyan preventiv addımlar atır. Hesab edirəm ki, bu qərar Rusiyada ciddi şəkildə mənfi qarşılanacaq və İrəvana qarşı ölçü götürüləcək. Qeyd edim ki, Ermənistana qazın qiymətində güzəşt edilməməsi, “Metsamor” AES-in yenidən qurulması üçün maliyyəni ayırmaması bu ölkəyə təzyiqlərin yeni mərhələsidir. Hesab edirəm ki, Paşinyanla Kreml arasında münasibətlər kəskinləşəcək və hətta Nikol faşist təxəyyüllü şəxs kimi xarakterizə ediləcək. Moskva siyasi elitasında Paşinyana hücumlar başlayır və onun rəsmi səfəri reallaşmaya bilər. Görünür, Putin artıq onunla danışıqların mənasız olduğunun fərqindədir. Həqiqətən də Paşinyan ölkəsində Rusiya isterikası formalaşdırıb və bu proses genişlənir”.
Baş verənlər onu göstərir ki, telekanallar məsələsi iki ölkə münasibətlərini bir qədər də pisləşdirəcək.
Vidadi ORDAHALLI
