11/08/2020 22:09
728 x 90

Bir böyük Avropa dövlətinin mediasından Qafqazın iki dövlətinə yer-göy fərqində baxış - Azərbaycan hara, Ermənistan hara…

Əli Mahmud: “Korrupsioner, rüşvətxor, işğalçı Paşinyan hökumətinin yeritdiyi çoxüzlü siyasətin dünya mediasında çıxan məqalələr vasitəsilə ifşa edilməsinin əhəmiyyəti böyükdür”

img

Ermənistanı “koronavirus cəhənnəmi” adlandıran Rusiya mətbuatından sonra dünyanın digər nüfuzlu mətbuat orqanları da pandemiya qarşısında aciz qalan Ermənistan və Paşinyan hökuməti haqqında tənqidi məqalələr dərc etməkdə davam edirlər.

Bu sıraya İtaliya mediası da qoşulub. Belə ki, İtaliyanın “European Affairs” onlayn jurnalında italyan jurnalist Culiano Bifolkinin “Paşinyanın rəhbərlik etdiyi Ermənistan daxili siyasi böhran, COVID-19 təhdidi və milli iqtisadiyyatın gələcəyinə şübhələr arasında” adlı məqaləsi dərc olunub.

Baki-xeber.com xəbər verir ki, məqalədə hazırda Ermənistanda dərin siyasi böhranın hökm sürdüyü, bu ölkədə COVID-19 pandemiyası səbəbindən ağır fövqəladə vəziyyətin hökm sürdüyü və bu göstəriciyə görə də Qafqazda ən acınacaqlı vəziyyətin məhz Ermənistanda olduğu, eləcə də ölkə iqtisadiyyatının hələ də digər dövlətlərin yardımlarından və diaspor ianələrindən asılı olduğu bildirilir.

Ermənistandan fərqli olaraq, Azərbaycan və Azərbaycan hökuməti haqqında xarici mediada müsbət fikirlər mövcuddur. Xüsusən də Azərbaycan dövlətinin pandemiya ilə mübarizə sahəsində əldə etdiyi uğurlu nəticələr, ölkəmizin beynəlxalq həmrəyliyə verdiyi dəstək və sair dünya mediasının gündəmindədir. Bu yaxınlarda İtaliya, Albaniya və digər ölkələrin mediasında Azərbaycanı təqdir edən, Ermənistanın Azərbaycan torpaqlarını işğalda saxlamasına dair maraqlı məqalələr çap olunub.

Dünya mediasının Cənubi Qafqazın iki ölkəsinə münasibəti fərqlidir. Azərbaycana müsbət, Ermənistana isə mənfi istiqamətdə yanaşılır.

  • ...dövlətimizin koronavirusla mübarizə praktikası bir nümunə olaraq təqdir edilir”

“Qarabağa aparan yol” qəzetinin baş redaktoru, tanınmış şair-jurnalist Əli Mahmud “Bakı-Xəbər”ə bildirdi ki, bu gün Ermənistandakı vəziyyət bütün mənalarda təhlükəlidir. Nikol Paşinyanın küçədən hakimiyyət kürsüsünə gəldiyini və bununla da Ermənistanın küçə estetikası, siyasətilə idarə olunduğunu deyən Ə.Mahmud hesab edir ki, işğalçı ölkəni yaxın gələcəkdə bundan da pis vəziyyət gözləyir. “Koronavirus pandemiyası dünya üçün bir sınaqdır. Bu gün təəssüf ki, ölkəmiz və xalqımız da bu acı sınaqla üzləşib. Müsbət haldır ki, Azərbaycan dövləti bu sınaq qarşısına tamamilə hazırlıqlı vəziyyətdə çıxdı və planlı, düşünülmüş şəkildə virusla mübarizə strategiyası ortaya qoydu. Bu gün Azərbaycan dövlətinin pandemiya ilə mübarizə üsulları bütün dünya tərəfindən təqdir edilir. Eyni zamanda, dövlətimizin ümumbəşəri həmrəylik aksiyasının önündə getməsi də ayrıca bir müzakirənin mövzusudur. Bu gün dünya mətbuatında Azərbaycan haqqında müsbət yönümlü məqalələr dərc edilir, dövlətimizin koronavirusla mübarizə praktikası bir nümunə olaraq təqdir edilir. Əlbəttə, pandemiya ilə mübarizə şəraitində Prezident İlham Əliyevin rəhbərliyilə həyata keçirilən uğurlu siyasətə ancaq müsbət yanaşılmalıdır. Azərbaycan dövlətinin siyasətinin əsasında vətəndaş amili dayanır. Ermənistana gəlincə, buradakı vəziyyət heç cür bizim ölkəmizdəki vəziyyətlə müqayisə edilə bilməz. Yalan üzərində qurulan Paşinyan hakimiyyətinin hədəfi dünya ölkələrindən ianə qoparmaq, varlanmaq, erməni xalqını isə zəlil günə salmaqdır. Hazırda Ermənistanda koronavirus pandemiyası o qədər geniş yayılıb ki, Paşinyan hökuməti onun qarşısını almaqda acizdir. Gündə onlarla insan pandemiyaya yoluxur, baxımsız, dava-dərmansız qalır və virusdan həyatını itirir. Əlbəttə, Ermənistan hökuməti artıq bu faktları ört-basdır edə bilmir. Dünyanın aparıcı media orqanları da, təbii ki, Ermənistanda baş verən bu olayların region və bəşəriyyət üçün bir təhlükəli hal aldığını görürlər. Paşinyan hökumətinin həyata keçirdiyi yarıtmaz siyasət Ermənistanı daha böyük təhlükələrə sürükləyir, artıq bu ölkə uçurum qarşısında dayanıb. Məlumatıma görə, hazırkı hesablamalar Ermənistan əhalisinin 30 faizinin pandemiya dövründə məhv olacağını proqnozlaşdırır. 2 milyon civarında əhalisi olan bir ölkə üçün bu böyük rəqəmdir. Paşinyan və onun ətrafı isə illərdir şou göstərməklə, xalqı aldatmaqla məşğul olur, eyni zamanda da bu ölkəyə ayrılan yardımları, ianələri, sədəqələri mənimsəyirlər”.

Ə.Mahmud qeyd etdi ki, Ermənistan Azərbaycan torpaqlarını işğalda saxlamaqla özünün əsl mahiyyətini ortaya qoyur. O hesab edir ki, dünya mediası Ermənistanın işğalçı dövlət olduğunu yaxşı bilir və son zamanlar bunu daha çox gündəmə gətirir. “Ermənistan işğalçı dövlətdir və o, işğalı davam etdirdikcə, bu ölkədə nə iqtisadiyyat dirçələcək, nə də siyasi, demoqrafik böhrana son qoyulacaq. Heç pandemiya ilə mübarizədən də bu ölkə qalib çıxa bilməyəcək. Korrupsioner, rüşvətxor, işğalçı Paşinyan hökumətinin yeritdiyi çoxüzlü siyasətin dünya mediasında çıxan məqalələr vasitəsilə ifşa edilməsinin əhəmiyyəti böyükdür. Hesab edirəm ki, Ermənistanla bağlı bu cür yazılara hələ çox rast gələcəyik” - deyə Ə.Mahmud vurğuladı.

İradə SARIYEVA

Son xəbərlər