Prezident İlham Əliyev Əfqanıstan Prezidenti Məhəmməd Əşrəf Qani və Türkmənistan Prezidenti Qurbanqulu Berdiməhəmmədov ilə keçirilən videokonfrans zamanı qarşılıqlı səmərəli əməkdaşlıq, “Şərq-Qərb”, “Şimal-Cənub” nəqliyyat dəhlizlərinin fəaliyyəti məsələlərinə toxunub.
Ölkə başçısının sözlərinə görə, Azərbaycanda nəqliyyat sektoruna qoyulmuş böyük investisiyalar sayəsində müasir nəqliyyat və logistika infrastrukturu yaradılıb. Prezident qeyd edib ki, 2017-ci ildə istismara verilən Bakı-Tbilisi-Qars dəmir yolu qitələri birləşdirir: “Azərbaycan Asiya və Avropa arasında yerləşən ölkə kimi Avrasiya məkanında nəqliyyat-logistika sahəsinə böyük töhfələr verir. Bakı-Tbilisi-Qars dəmir yolu ilə 2020-ci ilin ilk altı ayında daşınmış yüklərin həcmi 2019-cu ilin eyni dövrü ilə müqayisədə 3,7 dəfə çoxdur. Ölkə daxilində dəmir yolu infrastrukturu yenilənir. “Şərq-Qərb” nəqliyyat dəhlizi artıq tam şəkildə fəaliyyət göstərir. 2019-cu ildə bu dəhlizlə 8,7 milyon ton yük daşınıb. Bu ilin ilk dörd ayı ərzində bu rəqəm artıq 3 milyon tona çatıb. Azərbaycan, eyni zamanda, “Şimal-Cənub” nəqliyyat dəhlizinin fəal iştirakçısıdır. Dəhlizin Azərbaycan seqmentində bütün işlər başa çatdırılıb. Bu dəhliz vasitəsilə keçən il 2,1 milyon ton, bu ilin ilk dörd ayı ərzində isə 800 min ton yük daşınıb”.
Sözügedən dəhlizlər üzərindən yükdaşımaların artması həm də böyük gəlirlərin əldə edilməsi deməkdir. Özü də pandemiya dövründə yükdaşımalar artıb. Bütün bunlar bir daha Azərbaycanın strateji siyasət apardığını ortaya qoyur.
“Nəticədə ölkəyə kapital axını artacaq”
Məsələyə münasibət bildirən nəqliyyat sahəsi üzrə ekspert Azər Allahverənovun sözlərinə görə, Azərbaycan nəqliyyat xətlərinin şaxələndirilməsi ilə bağlı strateji siyasət həyata keçirir: “Pandemiya şəraitində beynəlxalq yükdaşımaların artması böyük göstəricidir və çox müsbət tendensiyadır. Ən azından ona görə ki, pandemiya iqtisadiyyatın müxtəlif sahələrinə böyük zərbələr vurub. Belə bir şəraitdə yükdaşımaların artması müsbət göstəricidir. Görünən odur ki, pandemiya beynəlxalq yükdaşımalara çox böyük təsir göstərə bilməyib. Digər tərəfdən, yükdaşımaların həcminin artması gəlirlərin əldə edilməsi baxımından çox yaxşı göstəricidir. Burada tək Azərbaycan yox, beynəlxalq yükdaşımalarda iştirak edən digər ölkələr də qazanır. Prezident İlham Əliyev çox doğru vurğuladı ki, “Şərq-Qərb” dəhlizinin imkanlarını artırmaq istiqamətində biz çox ciddi işlər görməliyik və səylərimizi birləşdirməliyk. Görünən odur ki, yükdaşımaların artacağı ilə bağlı gözləntilər daha böyükdür. Nəticədə ölkəyə kapital axını artacaq. Bu isə Azərbaycanın sözügedən istiqamətdə strateji siyasət yeritməsinin göstəricisidir”.
Bütün bunlar onu göstərir ki, Azərbaycanın tranzit ölkə olaraq rolu artır.
Vidadi ORDAHALLI
