15/08/2020 15:14
728 x 90

Ərdoğan sosial şəbəkələrdə əndazəni aşan söyüş kampaniyasının qarşısını almaq yolunu tapdı, bəs Azərbaycan...

Azər Həsrət: “Bundan bir çıxış yolu mütləq tapılmalıdır”

img

Türkiyə Prezidenti Rəcəb Tayyib Ərdoğan Xəzinə və Maliyyə naziri Berat Albayrak və ailəsi ilə bağlı sosial şəbəkədə təhqiramiz ifadələr işlədənləri sərt tənqid edib. Türkiyə mediasının verdiyi məlumata görə, Ərdoğan bundan sonra sosial şəbəkələrlə bağlı hüquqi tənzimlənmənin hazırlanacağını və tətbiq olunacağını bildirib:

“Nə üçün YouTube, Tvitter, Netflix kimi sosial şəbəkələrə qarşı olduğumuzu başa düşürsünüz? Bu cür əxlaqsızlığı aradan qaldırmaq üçün. Yalanın, böhtanın, insan haqlarına hücumun baş alıb getdiyi bu kanalların tənzimlənməsi şərtdir. Türkiyəyə, bu millətə belə kanallar yaraşmır. Ona görə bu cür şəbəkələrin yığışdırılmasını, onlara nəzarət olunmasını istəyirik. 83 milyonluq Türkiyə vətəndaşlarının sosial şəbəkə terroru qarşısında əli-qolu bağlı qalmasını qəbul edə bilmərik.

Bununla bağlı hərtərəfli hüquqi tənzimləmə üzərində çalışırıq. Hüquqi və maliyyə sanksiyaları da daxil olmaqla hər cür üsulu tətbiq edəcəyik”.

Ərdoğanın bu açıqlamasından sonra İYİ partiyasının rəhbəri Meral Akşenerlə CHP lideri Kamal Kılıçdaroğlu sosial şəbəkə hesablarında paylaşım edərək buna qarşı olduqlarını bildiriblər. Ərdoğan Tvitter hesabından onlara ismarıc göndərərək, “Onlar filmlərini izləsinlər, biz xidmət edib tarix yazmağa davam edəcəyik” yazıb.

MHP lideri Dövlət Baxçalı Albayraka və ailəsinə edilən təhqirləri pisləyərək “Sosial şəbəkə dibsiz quyuya, insaf nədir bilməyən minalı platformaya çevrilib” deyib. O, bundan sonra bütün sosial şəbəkə hesablarını donduracağını açıqlayıb. Söhbət, demək olar ki, sosial şəbəkələrin məhdudlaşdırılması və ya başlanmasından gedir. Türkiyə belə bir qanun qəbul etsə, nə baş verər?

Media eksperti Azər Həsrət “Bakı-Xəbər”ə açıqlamasında bildirdi ki, azad medianın hər hansı bir ölkədə boğulmasını heç kim istəməz: “Xüsusilə də Türkiyə ilə bağlı belə bir qərarın verilməsini heç istəməzdik. Çünki adıçəkilən platformaların üzərindən biz qardaş ölkənin insanları ilə bu və a digər formada fikir mübadiləsi aparırıq. Sosial medianın faydalı tərəflərindən yararlanırıq. Amma Ərdoğan doğru buyurur ki, 83 milyonluq Türkiyə  kiminsə tərəfindən yaradılan və adına “azad” deyilən sosial platformalar üzərindən hər gün təhqirlər oxumalı deyil. Buna bir “dur” deyən olmalıdır. Vəziyyət gəlib bu yerə çatıbsa, mütləq tənzimlənməlidir. Düşünürəm ki, sosial media sahibləri vəziyyətdən çıxış üçün həll yolları təklif etməlidirlər. “Biz bir azad platforma yaratdıq, siz gedin özünüzü necə istəyirsiniz idarə edin” prinsipi ilə məsələyə yanaşmaq olmaz. Bizim ictimai rəyimiz, tanınmış adamlarımız da belə problemdən əziyyət çəkir. Hər gün təhqir, açıq küçə söyüşləri eşitməyə məhkumuq. Bunu da bizim ailəmizdəki xanımlar, övladlarmız oxuyur. Yəni hansısa bir əxlaqsızın yazdığını biz məcburan oxumalı oluruq. İstəməsək belə, paylaşımda qarşımıza çıxa bilir. Sosial media xaosu aradan qaldırılmalıdır. Hər şey əxlaq müstəvisi üzərində həllini tapmalıdır. Sosial mediaların sahibləri bunu edə biləcəksə, hər şey öz yoluna düşəcək. İnsanların özünə buraxılmaqla bu məsələlər həllini tapa bilməyəcək. Dünyanın hər yerində belədir. Ciddi nəzarət hiss edilməyən yerdə insanlar özünü tam olaraq buraxır. Elə söyüş söyənlər olub ki, bizimlə üz-üzə gələndə qaçıb gizləniblər. Elə olub ki, adama demişik gəl üzümüzə söy, qorxusundan gəlməyib. Nəzarətsiz sosial medianın belə bir aurası var ki, insanlar özlərini orda qəhrəman kimi hiss edirlər. Ərdoğanın narahatlığını bölüşürəm. Bizim də ölkənin simvolları daima təhqir edilir. Düşünürəm ki, bundan bir çıxış yolu mütləq tapılmalıdır”.

Günümüzün reallıqları göstərir ki, nəzarətsiz olan sosial şəbəkələr doğrudan da  ölkələr üçün ciddi problemə çevrilib. Bu məsələdə nəzarətin güclənməsi tələbinə isə heç də söz azadlığına təzyiq kontekstindən baxmaq olmaz.

Məhəmmədəli QƏRİBLİ

Son xəbərlər