Ekspert bankın plastik kart verilişini dayandırmasının səbəbini tapdı

Rəşad Həsənov: "Bank of Baku"nun plastik kartla kredit verilməsini dayandırması müvəqqətidir"
"Bank of Baku"da plastik kartla kreditlərin verilməsinin dayandırılması kreditin xarici valyutaya keçməsi ilə bağlıdır"
Məlumata görə, "Bank of Baku" plastik kart kreditlərinin verilməsini müvəqqəti olaraq dayandırıb. Bu haqda Banker.az saytında məlumat gedib. Qeyd edək ki, "Bank of Baku"nun plastik kartları sıravi vətəndaşlar arasında daha çox istifadə olunurdu.
Ötən il Azərbaycanda buraxılmış bütün kredit kartların 60 faizi "Bank of Baku"ya məxsusdur. Banka məxsus kredit kartların əksəriyyətini "Bolkart", loyal müştərilərə verilən "Dostlar Klubu" kartları, "Visa" və "MasterCard" kredit kartları, "Mybrands" və "İdeal" kobrend kredit kart növləri təşkil edir.
Adıçəkilən bankın plastik kart kreditlərinin verilməsini nə səbəbdən dayandırmasını aydınlaşdırmaq məqsədilə iqtisadçı-ekspert Rəşad Həsənova müraciət etdik. O bizimlə söhbətində bildirdi ki, "Bank of Baku"nun plastik kart kreditlərinin verilməsini dayandırması müvəqqətidir və müəyyən müddətdən sonra yenidən bərpa olunacaq. İqtisadçının sözlərinə görə, "Bank of Baku"nun belə bir addım atması kredit verilməsinin xarici valyutaya keçməsi ilə bağlıdır: "Əksər banklar, demək olar ki, yalnız manatla depoziti olan şəxslərə güzəşt edərək kredit verir. Ümumiyyətlə, bank sistemi krediti xarici valyutaya keçirməyi planlaşdırır. Artıq son həftələr ərzində kreditin manatla deyil, dollarla verilməsi müşahidə olunur. Çox güman ki, "Bank of Baku"da plastik kartla kreditlərin verilməsinin dayandırılması kreditin xarici valyutaya keçməsi ilə bağlıdır. Adıçəkilən bank krediti xarici valyuta ilə vermək mərhələsinə keçdiyi üçün plastik kartla kredit verilməsi dayandırılıb".
Həmsöhbətimiz onu da əlavə etdi ki, istifadə edilən plastik kartlar arasında "Bank of Baku"nun kartları digər banklara nisbətən çox idi və insanlar üçün sərfəli idi. Qeyd edək ki, ötən gün bazar günü olduğundan, məsələ ilə əlaqədar "Bank of Baku"nun özü ilə əlaqə saxlaya bilmədik.