2020-ci ilin dekabr ayında Azərbaycanda fəaliyyət göstərən 2 bank milli və xarici valyutada əhalidən cəlb edilən əmanətlər üzrə faiz dərəcələrinə yenidən baxıb. Belə ki, manatla qəbul olunan depozitlərin faiz dərəcələri aşağı salınıb. “Accessbank”da 9,50-10,00 %-dən 8,50-9,00 %-ə, "Yapı Kredi Bank"da isə 6,50 %-dən 5,50 %-ə salınıb.
Bütövlükdə, banklar milli valyutada olan əmanətləri 4,00-12,00 % diapozonunda qəbul edirlər.
Onu da qeyd edək ki, manatla qəbul edilən əmanətlərdə faiz dərəcəsinin aşağı salınması əksər bankda müşahidə olunur. Maraqlı məqam ondan ibarətdir ki, banklar milli valyuta ilə qəbul edilən depozitlərdə faiz dərəcəsini aşağı salırlar, ancaq dollarla qəbul edilən əmanətlərdə yüksək faiz tətbiq edilir.
“Bank əmanəti əhalidən və ya şirkətlərdən alır, kreditə çevirib yenidən əhaliyə və ya şirkətlərə verir”
Məsələ ilə bağlı fikir bildirən iqtisadçı-ekspert Kamran Məmmədli qeyd etdi ki, son zamanlar bank sektorunda faiz dərəcəsinin aşağı salınması ilə bağlı müxtəlif səpkidə təkliflər səslənir: “Məlumdur ki, bank sektorunda faiz dərəcələrinin yüksək olması səbəblərindən biri də manatla olan əmanətlərdə faiz dərəcəsinin yüksək olmasıdır. Bu ən çox təsir göstərən amildir.
Onu da qeyd edim ki, Azərbaycanda bank kreditlərinin faizlərinin aşağı salınması bu gün maliyyə sektoru üçün prioritet məsələlərdən biridir. Uzun müddətdir bank faizlərinin aşağı salınması və bu istiqamətdə təşviqedici metodlarla faizlərin tənzimlənməsi müzakirə olunur. Depozit faizlərinin buna uyğun olaraq müəyyənləşdirilməsi, xüsusən də sığortalanan depozit faizlərini müəyyənləşdirən zaman onların kreditlərə təsirinin müəyyən edilməsi çox önəmlidir”.
Həmsöhbətimiz onu da əlavə etdi ki, bizdə banklar əmanətlərdən kredit vermək üçün resurs kimi istifadə edirlər. Bank əmanəti əhalidən və ya şirkətlərdən alır, kreditə çevirib yenidən əhaliyə və ya şirkətlərə verir. Amma Rusiya və digər ölkələrdə uçot dərəcəsi əmanət faizlərinə təsir göstərə bilər. ABŞ-da və Avropa ölkələrində xüsusilə təsir göstərir. Çünki uçot dərəcələri aşağı salınan kimi bankın əmanətə marağı azalır. O aşağı salınanda əhali kreditlərə üz tutur. Əmanət faizi aşağı düşdükcə, bu, kredit faizinə də öz təsirini göstərir.
Günel CƏLİLOVA
