“Kənd təsərrüfatı 2 faiz artıbdır və daha da çox artacaq. Çünki mən göstəriş vermişəm, azad edilmiş torpaqlarda indi payızlıq əkini aparılır”.
Bunu Prezident İlham Əliyev 2020-ci ilin yekunlarına həsr olunmuş müşavirədə deyib. Ölkə başçısının sözlərinə görə, azad edilmiş torpaqlarda böyük əkin sahələri var:
“Mən Kənd Təsərrüfatı Nazirliyinə və Prezident Administrasiyasına göstəriş verdim ki, vaxt itirmədən keçən il və bu il müəyyən dərəcədə payızlıq əkini aparılsın. Azad edilmiş torpaqlarda kənd təsərrüfatının inkişafı sistemli xarakter almalıdır və hökumət, Kənd Təsərrüfatı Nazirliyi, İqtisadiyyat Nazirliyi bəri başdan prioritetlər seçməlidir. Azad edilmiş torpaqların həm bitkiçilik, həm də heyvandarlıq sahəsində çox böyük potensialı var. Kəlbəcər, Laçın rayonlarında çox böyük örüş sahələri, otlaq sahələri vardır. Azad edilmiş torpaqlarda sovet dövründə taxılçılıq, pambıqçılıq, üzümçülük, tütünçülük, baramaçılıq, bağçılıq, heyvandarlıq çox geniş vüsət almışdı. Nəzərə almalıyıq ki, indi bizim yeni texnologiyalarımız var”.
Prezident onu da vurğulayıb ki, azad edilmiş torpaqlarda bu işlər planlı şəkildə görülməlidir: “Birincisi, ərzaq təhlükəsizliyi üçün. İkincisi, ixrac potensialının artırılması üçün. Biz burada da ixrac potensialımızı şaxələndirməliyik”.
Görünən odur ki, azad edilən rayonların potensialı böyük olduğu üçün ölkədə aqrar məhsulların istehsalı daha da artacaq.
Maraqlıdır, bəs ekspertlər bununla bağlı gözləntiləri necə dəyərləndirir?
“Bütün bunların sayəsində kənd təsərrüfatı məhsullarının istehsalı xeyli artacaq”
Məsələyə münasibət bildirən iqtisadçı alim Əli Əlirzayevin sözlərinə görə, həqiqətən də bu il kənd təsərrüfatında daha çox artımın olacağı gözlənilir: “Pandemiya ilə əlaqədar əhalinin əksəriyyəti istehsal baxımından kənd təsərrüfatına yönələcək. Aqrar məhsulların istehsalı həm daxili tələbatı ödəmək üçün artacaq, həm də ixracat məqsədi üçün. Nəzərə alsaq ki, azad olunmuş torpaqlarda aqrar potensial böyükdür, o zaman sahibkarlar oralara çalışacaqlar daha çox sərmayə qoysunlar. Əmək qabiliyyətli əhalinin işlə təmin olunmasında da həmin ərazilər vacib rol oynaya bilər. Həm əkin sahələri artacaq, həm də heyvandarlıq inkişaf edəcək. Nəzərə almaq lazımdır ki, 20 faiz ərazimiz işğal altında idi. İndi onların dövriyyəyə cəlb olunması çox mühüm əhəmiyyət kəsb edir. Dövlət vəsaiti, yaradılan fondların və sahibkarların hesabına ora sərmayələr yönələcək. Bütün bunların sayəsində kənd təsərrüfatı məhsullarının istehsalı xeyli artacaq. Bütün bunlar həm də əhalinin rifahına müsbət təsir edəcək. Məsələn, Ağdam, Füzuli rayonları hesabına pambıq istehsalı artacaq. Füzuli, Cəbrayıl, Zəngilan rayonları hesabına üzüm istehsalı artacaq. Qubadlı, Laçın, Kəlbəcər rayonları hesabına heyvandarlıq məhsullarının istehsalında artım gözlənilir”.
İqtisadçı alim hesab edir ki, azad edilən ərazilər münbit olduğuna görə, kənd təsərrüfatı məhsullarının istehsalında artım üçün yaxşı perspektivlər vəd edir.
Vidadi ORDAHALLI
