“Qeyri-neft sənayemiz 11 faizdən çox artıb”. Bunu Prezident İlham Əliyev 2020-ci ilin yekunlarına həsr olunmuş videoformatda müşavirədə çıxışı zamanı deyib.
Prezident onu da qeyd edib ki, ötən il iqtisadiyyat 4 faizdən bir qədər çox azalsa da, qeyri-neft sənayemiz 11 faizdən çox artıb. Bundan əlavə, kənd təsərrüfatı, orta aylıq əməkhaqqı və pensiyalar da artıb, Neft Fondunun vəsaiti azalmayıb, əksinə, o da artıb. Bununla da Azərbaycan öz valyuta ehtiyatlarını qoruyub.
Azərbaycanın qeyri-neft sənayesində 11 faizdən çox artım nəyin hesabına baş verib?
“Tibbi maskaların istehsalı ilə bağlı atılan addımlar da, təbii ki, qeyri-neft sənayesinə öz müsbət təsirini göstərir”
Tanınmış iqtisadçı Rəşad Həsənov “Bakı-Xəbər”ə bildirdi ki, bu artım əsasən “SOCAR Polymer” zavodunun və sənaye məhəllələrinin fəaliyyətə başlaması ilə bağlıdır: “Bizim qeyri-neft sənayemiz kiçik bir sənayedir, iqtisadiyyatda 3-4 faiz payı olan bir sahədir. Burada baş verən artım prosesi dəstəkləyir və ciddi bir dinamikanı müşahidə edə bilirik. Bu artım əsasən “SOCAR Polymer” zavodunun fəaliyyəti nəticəsində istehsal və idxal imkanlarının artmasından qaynaqlanır. Eyni zamanda, sənaye məhəllələrində yaradılmış infrastrukturun, sahibkarlıq fəaliyyətlərinin artıq aktiv mərhələyə keçməsi, onların istehsalata başlaması kimi məsələlər qeyd edilən istiqamətdə dəstəkləyici faktor kimi çıxış edir. Yəni hazırda bu sahədə əlavə ciddi bir təsir istiqamətləri yoxdur. Bilirsiniz ki, 2020-ci ildə yüngül sənaye pandemiya ilə əlaqədar müəyyən problemlərlə üzləşdi, istehsalat gücü və bazara çıxış imkanları azaldı. Faktiki olaraq isə yeyinti sənayesində istehsalat artdı. Çünki məlum səbəblərdən idxal imkanlarının məhdudlaşması onun yerli bazarda rəqabət aparması şərtlərini asanlaşdırdı. Yeyinti sənayesində real artımlar müşahidə edildi. Burada, həmçinin, müəyyən tibbi vasitələrin istehsalının artımı da rol oynayıb. Tibbi maskaların istehsalı ilə bağlı atılan addımlar da, təbii ki, qeyri-neft sənayesinə öz müsbət təsirini göstərir. Keçən il də, bu il də maskaya tələbat davamlı olub və bu, əhəmiyyətli bir dövriyyənin yaradılmasına və istehsalın formalaşmasına gətirib çıxarıb”.
İradə SARIYEVA
