Xəbər verildiyi kimi, ticarət və iaşə obyektlərində ödənişlər zamanı tutulan əlavə dəyər vergisini (ƏDV) geri almaq mümkün olacaq. Qeyd edək ki, qanunun bu tələbinin həyata keçirilməsi üçün proses tamamlanıb. Məlumat üçün bildirək ki, müştəri ƏDV-ni geri ala bilmək üçün ilk öncə edvgerial.az saytından qeydiyyatdan keçməlidir.
ƏDV-dən geri ödənilən vəsaitlərin nə zaman qaytarılması barədə fikir bildirən İqtisadiyyat Nazirliyi yanında Dövlət Vergi Xidmətinin baş idarə rəisi Elçin Məmmədov deyib ki, bu sahədə görülən işlər çərçivəsində texniki və hüquqi məsələlərin həlli tamamlanmaq üzrədir. Artıq müvafiq dövlət qurumları ilə razılaşdırılmaqla ƏDV-nin müəyyən hissəsinin qaytarılması ilə bağlı prosesə cəlb ediləcək müvəkkil bank müəyyən edilib - bu, “Kapital Bank”dır: “Həmçinin, alınmış mallara görə ödənilmiş ƏDV-nin qaytarılması üçün istehlakçıların müraciətlərinin qeydiyyata alındığı informasiya sistemi olan xüsusi portalın (www.edvgerial.az) hazırlanması ilə bağlı işlər başa çatdırılıb və ƏDV-nin müəyyən hissəsinin qaytarılma mexanizmi müəyyən edilib. Qaydalara əsasən, ƏDV-nin müəyyən hissəsinin qaytarılması zamanı 3 məqama diqqət yetirilməlidir. İlk növbədə, istehlakçı, yəni alış-veriş edən və ya xidmətdən yararlanan tərəf fiziki şəxs olmalıdır. İkincisi, satıcı və ya xidmət göstərən tərəf mütləq ƏDV ödəyicisi olmalıdır. Digər məqam isə satıcının yeni nəsil kassa aparatlarından istifadə etməsidir. ƏDV-in bir hissəsinin qaytarılması yalnız yeni nəsil kassa aparatlarının tətbiq edildiyi obyektlərdə mümkündür”.
Elnur Sadıqov: “ƏDV-nin geri qaytarılması vətəndaşlara həmin pullardan istifadəyə imkan yaradır ”
ƏDV-nin qaytarılmasının əhəmiyyəti barəsində danışan Azərbaycan Dövlət İqtisad Universitetinin (UNEC) Maliyyə və maliyyə institutları kafedrasının professoru Elnur Sadıqov bildirdi ki, ƏDV ilə bağlı görülən tədbirlərdə bir sıra önəmli məqamlar var: “Bu bir tərəfdən dövriyyədə olan artıq pul kütləsinin yenidən dövlətə qayıtması deməkdir. Digər tərəfdən, həmin vəsaitlərin yığılması o qədər də əhəmiyyətli hesab edilmir. Bu, vətəndaşlara həmin pullardan istifadəyə imkan yaradır və nəticə etibarilə, bu, dövlətin vətəndaşlara növbəti maliyyə yardımı kimi qiymətləndirilə bilər. Dünya ölkələrində də belə bir təcrübə var, ancaq bu addımlar daimi xarakter daşımır”.
Natiq Cəfərli: “ƏDV qaytarılma qaydaları ancaq iri marketlər şəbəkəsinin maraqlarına uyğundur”
İqtisadçı-ekspert Natiq Cəfərli qeyd etdi ki, ƏDV qaytarılma qaydaları ancaq iri marketlər şəbəkəsinin maraqlarına uyğundur: “Bu qaydaların indiki şəkildə tətbiqi kiçik-orta dükanların tamam sıradan çıxmasına səbəb olacaq. Hər bir halda, kiçik-orta marketlər üçün də hökumət tərəfindən təşviq addımları mütləq atılmalıdır. Qeyd edim ki, bu sahədə müəyyən boşluqlar var. Məsələn, mən bir ƏDV ödəyicisi olan iri mağazadan 1180 manata palto alıram, nağd ödəniş edirəm, çeki öz kabinetimə daxil edib 18 manatı geri alıram. Paltonu asıram evdən, 1 həftədən sonra bir daha yeni gözlə mala baxıram və bəyənmirəm, çeki və malı götürüb gedirəm dükana, qanuna görə, 14 gün ərzində malı qaytarma hüququm var – paltonu qaytarıb 1180 manatımı geri alıram. Bəs, o zaman mexanizm necə çalışacaq?! Qaydalarda bu məsələ yoxdur, boşluq var”.
Günel CƏLİLOVA
