Bu ilin yanvar-mart aylarında Azərbaycanın sığorta bazarında sığorta haqlarının yığımları 20 faizə yaxın artıb. Belə ki, yanvar-mart aylarında ölkənin sığorta şirkətləri 240 milyon 764 min manat sığorta haqqı toplayıb, 77 milyon 064 min manat sığorta ödənişi ediblər. Ötən ilin eyni dövrü ilə müqayisədə sığorta yığımları 19,7 faiz, ödənişlər isə 66,7 faiz artıb.
Rəsmi statistikaya əsasən, koronavirusun təsirinin hiss olunduğu mart ayında sığorta yığımları yanvar-fevralla müqayisədə azalıb. Məlum olub ki, yanvarda 112 milyon manat, fevralda isə 78,7 milyon manat sığorta haqqı toplandığı halda, martda yığımlar 50 milyon manat təşkil edib. 2020-ci ildə mart ayının yığımları ötən ilin martı ilə müqayisədə 26,8 faiz azalıb.
Ancaq maraqlıdır ki, koronavirus səbəbindən karantin tədbirlərinin görülməsinə və hərəkətin məhdudlaşdırılmasına baxmayaraq, mart ayında sığorta hadisələri və ödənişləri kəskin artıb. Ötən ay sığorta ödənişləri 27,8 milyon manat təşkil edib, bu da ötən ilin mart ayı ilə müqayisədə 2,1 dəfə artıqdır.
Karantin dövründə aşağı iqtisadi fəallığın olması fonunda sığorta hadisələrinin və ödənişlərin belə kəskin artması nə ilə bağlı ola bilər?
“...mart ayında daha çox sığorta ödənişi...”
Sözügedən məsələyə aydınlıq gətirən sığorta sahəsi üzrə ekspert İlkin İbrahimov bunu bir sıra amillərlə əlaqələndirdi: “Mərkəsi Bank bu ilin son üç ayının statistikasını təhlil edib. Məlum olur ki, yığımlar və ödənişlər artıb. Sığorta yığımlarının artmasına səbəb ötən il daşınmaz əmlakın sığortası ilə bağlı yaşanan ajiotaj idi. Məsələ ondadır ki, baş verən yanğınlardan sonra vətəndaşlar kütləvi şəkildə sığorta şirkətlərinə müraciət etməyə başladılar. Ona görə də bu ilin yanvar ayında daha çox sığorta yığımı qeydə alındı. Belə ki, 112 milyon manat sığorta haqqı toplandı. Fevralda isə isə bu 78,7 milyon manata düşdü. Martda isə bu rəqəm 50 milyon manat oldu. Koronavirus pandemiyası üzündən hesab edirəm ki, yığımlar sonrakı aylarda daha da aşağı düşəcək. Çünki proseslərin gedişi bunu göstərir. Karantin dövründə sığorta hadisələrinin və ödənişlərinin artmasına gəldikdə isə, bu müəyyən səbəblərlə bağlıdır. Məsələ ondadır ki, müəyyən sığorta hadisələri var, onlar araşdırılır. Ya məhkəmə əsasında, ya da sığorta şirkətlərinin özü tərəfindən araşdırma aparılır. Hansısa sənədlərin çatışmaması üzündən ödənişlər növbəti aylara düşür. Bu səbəbdən mart ayında daha çox sığorta ödənişi həyata keçirilib. Statistikaya baxanda biz görürük ki, avtomobillərlə bağlı yığımlar artıb. Ancaq yığımların çoxu məhdudiyyətlərdən əvvəlki dövrə düşür. Ona görə də hesab edirəm ki, sığorta ödənişlərinin artması sözügedən səbəblərlə bağlıdır”.
Vidadi ORDAHALLI
