Koronavirus pandemiyasından zərər çəkmiş sahələrdə fəaliyyət göstərən sahibkarlıq subyektlərinə nəzərdə tutulmuş vergi güzəştləri paketinin ümumi dəyəri 114 milyon manata yaxındır. Bunu Vergilər nazirinin birinci müavini Sahir Məmmədxanov Milli Məclisin İqtisadi siyasət, sənaye və sahibkarlıq komitəsinin iclasında deyib.
S.Məmmədxanov bildirib ki, bununla bağlı Vergi Məcəlləsinə “Koronavirus pandemiyasının yayılması nəticəsində iqtisadi şəraitin əhəmiyyətli şəkildə dəyişməsi ilə əlaqədar tətbiq edilən müvəqqəti vergi rejimi” adlı yeni on səkkizinci fəsil əlavə edilir.
Dəyişikliyə görə, pandemiyanın bilavasitə təsir etdiyi, sənəddə nəzərdə tutulan fəaliyyət sahələri üzrə vergi ödəyicilərinə əmlak və torpaq vergiləri üzrə tam məbləğdə, əldə edilən mənfəətin (gəlirin) 75 faizi miqdarında vergi güzəştlərinin verilməsi təklif olunur.
Bundan başqa, sadələşdirilmiş verginin ödəyicisi olan ictimai iaşə fəaliyyəti və sərnişin daşımaları fəaliyyəti həyata keçirən vergi ödəyicilərinə yuxarıda qeyd edilən əmlak və torpaq vergiləri üzrə güzəştlərlə yanaşı, sadələşdirilmiş vergi məbləği üzrə 50 faiz güzəştin verilməsi nəzərdə tutulur.
Bütövlükdə, 114 milyon manat vergi güzəşti indiki dövrdə sahibkarlar üçün nə deməkdir?
“Vergi güzəştləri, əslində, dövlətin dolayı maliyyə dəstəyini ifadə edir”
Sözügedən məsələni dəyərləndirən millət vəkili Vüqar Bayramovun fikrincə, sözügedən güzəştlər sahibkarlar üçün böyük dəstəkdir: “Yeni vergi güzəştlərinin tətbiqi iqtisadiyyatın leqallaşdırılması, daha liberal iqtisadiyyatın formalaşması və bu kontekstdən postpandemiya dövründə yeni iqtisadi modelin tətbiq edilməsindən xəbər verir. Azərbaycan hökuməti tərəfindən təsis edilən iqtisadi paket həm pandemiya, həm də postpandemiya dövründə sahibkarların dəstəklənməsini nəzərdə tutur. Bu baxımdan vergi güzəştləri sahibkarların həm xərclərini minimallaşdırmaq, həm də iqtisadi aktivliyi daha qısa zamanda bərpa etmək imkanı verəcək. Güzəştlər mikromüəssisələr daxil olmaqla, praktik olaraq bütün sahibkarlıq subyektlərini əhatə edir. Sadələşdirilmiş vergi subyektləri üzrə faiz dərəcələrinin iki dəfə azaldılması həyata keçirilir. Həm də sahibkarlar üçün mənfəət və gəlir vergisindən 75 faizlik güzəşt tətbiq edilir. Digər tərəfdən, torpaq və əmlak vergisində olan güzəştləri qeyd etməliyik. Güzəştlərin strukturuna və miqyasına nəzər yetirən zaman əyani şəkildə qeyd etmək olar ki, bu güzəştlər sahibkarların öz fəaliyyətlərini daha qısa zamanda postpandemiya dövründə bərpa etməsinə imkan verəcək. Məqsəd iqtisadi aktivliyin az müddətdə əldə edilməsinə nail olmaqdan ibarətdir. Vergi güzəştləri, əslində, dövlətin dolayı maliyyə dəstəyini ifadə edir. Çünki bu zaman sahibkar hesabladığı vergini büdcəyə ödəmir və özünün sərəncamında saxlayır. Bu da, təbii ki, onun fəaliyyətinin genişləndirilməsinə imkan yaradır”.
Vidadi ORDAHALLI
