Prezident İlham Əliyevin tapşırığı ilə Mərkəzi Bank tərəfindən istehlak kreditləri olan vətəndaşlara, banklara, sığorta şirkətlərinə güzəştlərin tətbiq olunması ilə bağlı qərar qəbul edilib. Əsas məqsəd pandemiya dövründə maddi sıxıntı yaşayan və kreditlərini ödəməkdə çətinlik çəkən vətəndaşlarımıza dəstək verilməsidir.
Martın 1-dən sentyabrın 30-na qədər biznes və istehlak kreditini ödəyə bilməyən vətəndaşlara cərimə faizi və dəbbə pulu hesablanmayacaq. Yəni biznes və istehlak təyinatlı kreditlərin (əsas və ya faiz borcu) tam və ya qismən gecikdirilməsi halında 30 sentyabr 2020-ci ilədək borcludan cərimə faizi, dəbbə pulu və digər ödənişlər tutulmayacaq. Bu zaman borcalanların kredit tarixçəsi pisləşdirilməyəcək. Bununla belə, sözügedən müddət ərzində kredit təşkilatları tərəfindən əsas borc üzrə faizlərin hesablanması davam etdiriləcək və borcalanlar tərəfindən kredit təşkilatlarına ödənilməsi təmin edilməlidir.
Göründüyü kimi, hökumət pandemiyanın mənfi təsirlərini minimuma endirmək üçün bütün mümkün vasitələrdən kompleks şəkildə istifadə edir. Necə deyərlər, Azərbaycan dünyada ən yaxşı təcrübələri tətbiq edərək, pandemiya ilə mübarizə aparır. Bu baxımdan sentyabrın 30-na qədər biznes və istehlak kreditini ödəyə bilməyən vətəndaşlara cərimə faizi, dəbbə pulunun hesablanmayacağının əhəmiyyətini ekspertlər necə dəyərləndirirlər?
“Hesab edirəm ki, bu, kredit borcu olanların xeyrinə olacaq və onların öhdəliklərini yüngülləşdirəcək”
Məsələyə münasibət bildirən millət vəkili Vüqar Bayramov verilən qərara müsbət prizmadan yanaşdı. Onun fikrincə, burada söhbət kredit tarixçəsi qənaətbəxş olan borclulardan gedir: “Əsas məqamlardan biri kredit borcu olanlarla bağlıdır. Paketə görə, kredit öhdəliklərinin tam və ya qismən gecikdirilməsi halında borcludan əlavə cərimə faizi, dəbbə pulu və digər ödənişlərin tutulmaması banklara tövsiyə edilir. Yəni kredit tarixçəsi mənfi olmayan vətəndaşların ödəmələrində problem varsa, onlar bu imkandan istifadə edəcəklər. Bu o deməkdir ki, martın 1-dən sentyabrın 30-dək kreditinin ödənməsində yubanmalar olan vətəndaşların kredit tarixçəsi pisləşməyəcək. Bu zaman krediti olan vətəndaşların imkanı var ki, onlar sentyabr ayına qədər hissə-hissə ödənişlərini etsinlər. Hesab edirəm ki, bu, kredit borcu olanların xeyrinə olacaq və onların öhdəliklərini yüngülləşdirəcək. Sənədə əsasən, bu il martın 1-i vəziyyətinə keyfiyyəti qənaətbəxş olan və pandemiya ilə əlaqədar kredit borcunu gecikdirən borcalanlar üzrə neqativ məlumatlar 30 sentyabr 2020-ci ilədək kredit bürosuna xüsusi qeydlə təqdim olunacaq. Yəni vətəndaşımızın martın 1-dən sentyabrın 30-dək kredit yubanması olacaqsa, onun kredit tarixçəsinə yazılmayacaq və tarixçə pisləşməyəcək. Paket maliyyə bazarlarında digər sektorları da əhatə edir. Ümumilikdə, güzəşt paketi sistemlidir və pandemiyanın maliyyə bazarı iştirakçılarına təsirlərini minimumlaşdırmağa imkan verəcək”.
Vidadi ORDAHALLI
