“Üç ayda Azərbaycanda qeyri-neft sənaye sahəsində artım 23 faizdir”. Bunu Prezident İlham Əliyev Abşeron rayonunun ərazisində Xızı rayonunun Ağdərə kəndindən Sumqayıt şəhərinə çəkilən magistral qaz kəmərinin açılışında deyib.
Ölkə başçısının sözlərinə görə, artım əsasən yeni müəssisələrin hesabınadır: “Polimer və karbamid zavodları həm daxili tələbatı tam ödəyəcək, eyni zamanda, böyük ixrac imkanları yaranıb. Bu ixracın əhəmiyyəti ondadır ki, bu, qeyri-neft ixracıdır. Bizim də əsas məqsədimiz qeyri-neft sənayesini inkişaf etdirmək və qeyri-neft ixracını artırmaqdır. Bildirməliyəm ki, indi dünyada böhranlı vəziyyətdir, demək olar, ölkələr arasındakı iqtisadi əlaqələr müəyyən dərəcədə zədələnib və iqtisadi fəallıq bütün dünyada aşağı düşüb. Buna baxmayaraq, üç ayda Azərbaycanda qeyri-neft sənaye sahəsində artım 23%-dir. Bunun böyük hissəsi yeni yaradılmış sənaye müəssisələrinin hesabınadır. Beləliklə, biz bu müəssisələri yaratmaqla həm daxili tələbatı ödəyirik, idxaldan asılılığı aradan götürürük, həm də vətəndaşları işlə təmin edirik. Artıq Sumqayıtda minlərlə yeni iş yeri yaradılıb. Son illər ərzində Sumqayıtda bütün sənaye və infrastruktur obyektlərinin açılışlarında mən şəxsən iştirak etmişəm”.
Göründüyü kimi, Azərbaycanda qeyri-neft sektorunun inkişafına xüsusi önəm verilir. Bunun nəticəsidir ki, müasir dövrün tələblərinə uyğun olaraq yeni sənaye müəssisələri inşa olunur.
Maraqlıdır, bəs ekspertlər bu tendensiyanı necə dəyərləndirirlər?
“Bunun nəticəsidir ki, qeyri-neft sənaye sahəsində qeydə alınan artımın böyük hissəsi yeni yaradılmış sənaye müəssisələrinin hesabınadır”
Məsələyə münasibət bildirən millət vəkili Aydın Hüseynovun sözlərinə görə, bu ilin üç ayında qeyri-neft sənaye sahəsində qeydə alınan artım ölkə iqtisadiyyatındakı müsbət tendensiyalardan xəbər verir: “Bu onu göstərir ki, Azərbaycanda aparılan iqtisadi islahatlar, qanunvericilik bazasının möhkəmləndirilməsi və atılan digər mütərəqqi addımlar öz müsbət bəhrəsini verir. Görülən işlər sahibkarlığın inkişafını, eləcə də birbaşa rəqabətqabiliyyətli məhsulların istehsalını stimullaşdırır. Bunun nəticəsidir ki, qeyri-neft sənaye sahəsində qeydə alınan artımın böyük hissəsi yeni yaradılmış sənaye müəssisələrinin hesabınadır. Ötən il ölkəmizin sosial-iqtisadi inkişafında əldə edilən nəticələr, cari ildə də bu müsbət meyllərin davam etməsi üçün əsaslı gözləntiləri formalaşdırıb. Görünən odur ki, makroiqtisadi göstəricilər ümumi inkişafın dinamikliyini səciyyələndirir. Ölkədə genişmiqyaslı islahatlar dayanmadan davam etdirilir. Qeyri-neft iqtisadiyyatının bütün sektorlarının inkişaf etdirilməsi və ixracın genişləndirilməsi qarşıya mühüm məsələ kimi qoyulub. Dünyada koronavirusla əlaqədar böhranın müşahidə olunmasına baxmayaraq, Azərbaycanın qeyri-neft sənayesində artım var. Bu istiqamətdə görülən işlər ölkədə həyata keçirilən iqtisadi siyasətin düzgün olmasını sübut edir. Eyni zamanda, bu, qarşıdakı illərdə ölkə iqtisadiyyatında qeyri-neft sektorunun artacağını göstərir”.
Vidadi ORDAHALLI
