Koronavirus pandemiyasının təsir etdiyi sahələrdə fəaliyyət göstərən vergi ödəyiciləri üçün bəzi güzəştlər nəzərdə tutulur. Bu barədə İqtisadiyyat Nazirliyinin hazırladığı “Pandemiyadan zərərçəkmiş sahələrdə fəaliyyət göstərən sahibkarlıq subyektlərinə (o cümlədən, kiçik və orta sahibkarlığa) vergi güzəştləri və tətilləri mexanizmi”ndə deyilir.
Qeyd olunur ki, koronavirus pandemiyasının mənfi təsir etdiyi iqtisadi fəaliyyət sahələri üzrə bir sıra digər güzəştlər də verilə bilər.
Güzəşt ediləcək sahələrdən biri də daşınmaz əmlak sektorudur. Bildirilir ki, fiziki şəxslərdən daşınmaz əmlakın icarəsi üzrə ödəmə mənbəyində tutulan verginin dərəcəsi 14 faizdən 7 faizə endiriləcək.
Ekspertlər hesab edirlər ki, daşınmaz əmlak sahəsinə ediləcək güzəştlər mənzillərin satışına və icarə qiymətinə də təsir edəcək.
Vüqar Bayramov: “…həmin vergidən təklif olunan müddətdə sahibkarlar azad olunacaqlar”
Millət vəkili Vüqar Bayramov qeyd etdi ki, vergi sahəsində təklif olunan güzəştlər təkcə fərdi sahibkarları deyil, eyni zamanda, daha iri, orta və kiçik sahibkarları da əhatə edir: "Güzəştlərdən biri də əmlak və torpaq vergisi ilə bağlıdır. Həmin vergidən təklif olunan müddətdə sahibkarlar azad olunacaq. Bu da onunla bağlıdır ki, pandemiya dövründə sahibkar gəlir əldə edə bilmir. Ancaq onun əmlakı var. Sahibkar əmlak vergisi ödəyirsə, bu onun üçün əlavə bir xərcdir. Dövlətin güzəştlər tətbiq etməkdə də məqsədi ondan ibarətdir ki, sahibkarları həmin xərcdən azad etsin. Eyni zamanda, postpandemiya dövründə sahibkarların yenə də xərclərinin azaldılmasına nail olmaq məqsədi var ki, onlar qısa müddətdə fəaliyyətlərini bərpa edə bilsinlər. Eləcə də evini icarəyə verən, müəyyən ofis icarəyə götürən vətəndaşlarımız üçün də güzəştlər nəzərdə tutulub. Bildiyiniz kimi, həmin vətəndaşlarımız gəlir mənbəyindən 14 faiz vergi ödəyirlər. Bu vergi dərəcəsi də 14 faizdən 7 faizə endiriləcək. Bu da icarə müqavilələrinin rəsmiləşdirilməsi baxımından vacibdir. Bundan əlavə, icarədən gəlir əldə edən vətəndaşlarımızın xərclərinin azaldılmasına xidmət edir. Mikrosahibkarlar sadələşdirilmiş vergi subyektləri ödəyicisidirlərsə, onlar üçün vergi 2 faizdən 1 faizə endiriləcək. Bu da mikrosahibkarların xərclərinin azaldılması baxımından vacibdir”.
Ramil Qasımzadə: “Daşınmaz əmlak bazarında qiymətlərin düşmə ehtimalı var”
Əmlak üzrə ekspert Ramil Qasımzadə bildirdi ki, koronavirusla bağlı Azərbaycanda tətbiq olunan karantin rejimi, digər sahələrə olduğu kimi, daşınmaz əmlak bazarına da təsir göstərib. Pandemiyadan əlavə, paytaxt və bölgələrin əmlak bazarına təsir göstərən amillərdən biri də neftin qiyməti ilə bağlıdır. Təbii ki, ölkəyə gələn vəsaitin azalması, həmçinin, daşınmaz əmlaka olan marağı da azalda bilər. Buna görə də qiymətlərin düşmə ehtimalı var: “Neftin qiyməti aşağı səviyyədə qalsa, daşınmaz əmlak bazarında 20-25 faiz enmələr müşahidə olunacaq. Bundan əlavə, karantin müddəti may ayında başa çatsa və neftin qiymətində artım olarsa, büdcədə nəzərdə tutulan qiymətə qədər gələrsə, ilin sonuna kimi qiymətlərdə 5-10 faizə qədər artım baş verə bilər. Digər ehtimal isə neftin qiyməti aşağı olsa, tikintiyə dövlət dəstəyi olarsa, bazarda qiymətlər təxminən 10 faiz ətrafında düşə bilər”.
Həmsöhbətimiz hesab edir ki, bu vəziyyət kirayə mənzil bazarına da təsir edə bilər. Onun sözlərinə görə, kirayə mənzil bazarında da qiymətlər 10-15 faizə qədər düşüb: “Əgər yay aylarında ali məktəblər fəaliyyət göstərsə, kirayə mənzillərin qiyməti nisbətən aşağı düşəcək. Bəzi mənzil və obyekt sahibləri vəziyyətlə əlaqədar qiymətləri endiriblər. Koronavirus daşınmaz əmlak bazarında böhrana səbəb oldu. Pandemiya baş verməsəydi, qiymətlər artıma doğru gedərdi”.
Günel CƏLİLOVA
