“Ölkəmizdə 440 meqavat gücündə - biri külək, biri günəş olmaqla, 2 stansiya tikiləcəkdir, sırf xarici investorların hesabına”. Bunu Prezident İlham Əliyev "Azərenerji" ASC-nin Baş idarəetmə kompleksinin açılışında çıxış edərkən deyib.
Dövlət başçısının sözlərinə görə, bütün müsbət dinamika və eyni zamanda, sabitlik ona gətirib çıxardı ki, xarici investorlar Azərbaycana pul qoymaq qərarına gəliblər: “Bu ilin yanvar ayında ilkin razılaşma əldə edildi və bərpa olunan enerji sahəsində böyük təcrübəyə malik 2 böyük şirkət Azərbaycanla ilkin sazişləri də imzaladı. Bu sazişlər əsasında ölkəmizdə 440 meqavat gücündə - biri külək, biri günəş olmaqla, 2 stansiya tikiləcəkdir, sırf xarici investorların hesabına. Onu da bildirməliyəm ki, bu layihələri icra etmək, yəni investisiya qoymaq istəyən şirkətlərin sayı 7 idi. Mən ad çəkmək istəmirəm, onların arasında dünyanın ən böyük enerji şirkətləri də vardı. Ancaq müsabiqə onu göstərdi ki, 2 şirkət daha gözəl şərtlər verib və onlar artıq bu işləri başlamalıdırlar”.
Maraqlıdır, Azərbaycanda külək və günəş enerjisi əsasında elektrik stansiyası tikmək istəyən 7 xarici şirkətdən yalnız 2-sinin seçilməsi nə deməkdir? Ümumilikdə, bizim enerji sektorumuza xarici investorların böyük marağı nə ilə bağlıdır?
“Belə vəziyyət Azərbaycana öz maraqlarına uyğun daha uğurlu seçim etməyə şərait yaradır”
Sözügedən məsələyə aydınlıq gətirən ekspert Rəsul Cahangirli bunu bir sıra amillərlə əlaqələndirdi: “Məsələ ondadır ki, Azərbaycanda mövcud olan sabitlik, islahatlar nəticəsində yaradılan əlverişli biznes mühiti xarici investorları cəlb edir. Enerji infrastrukturunun yaxşı səviyyədə olması və bu sahədə son illər görülən bir sıra işlər də sözügedən məsələdə müsbət rol oynayır. Bununla belə, Azərbaycan xarici investorlardan asılı deyil. Ancaq elə ölkə var ki, bu məsələdə xarici amillərdən asılıdır. Bizdə isə situasiya fərqlidir. Xarici sərmayədarlar Azərbaycana sərmayə yatırmağın perspektivli olduğunu düşündükləri üçün ölkəmizə daha çox maraq göstərirlər. Belə olan halda, seçim etmək imkanı artır. Yəni hansı şirkət daha sərfəli sərmayə şərtlərini təklif edirsə, həmin xarici şirkətlə müqavilə bağlanır. O baxımdan, 7 şirkətdən yalnız 2-sinin seçilməsi məhz bu faktorla bağlıdır. Belə vəziyyət Azərbaycana öz maraqlarına uyğun daha uğurlu seçim etməyə şərait yaradır. Ona görə də bu bizim uğurumuz sayılmalıdır. Yaranan belə vəziyyət Azərbaycanda alternativ enerji mənbələrinə daha çox xarici sərmayənin yönəldiləcəyindən xəbər verir. Bu da olduqca perspektivlidir. Məsələ ondadır ki, get-gedə inkişaf etmiş ölkələr alternativ enerji resurslarından istifadəyə daha çox önəm verirlər”.
Vidadi ORDAHALLI
