“Tapşırıq verirəm ki, 600 min insan aprel-may aylarında, iki ay ərzində ayda 190 manat dövlətdən alsın. Bu vəsaiti alacaq vətəndaşlardan xahiş edirəm ki, onlar ikinci ödənişi almaq üçün bank hesabları açsınlar".
Bu sözləri Azərbaycan Prezidenti İlham Əliyev Əmək və Əhalinin Sosial Müdafiəsi naziri Sahil Babayev və İqtisadiyyat naziri Mikayıl Cabbarovun iştirakı ilə videobağlantı formatında keçirdiyi iclasda çıxışı zamanı deyib: “Birinci ödəniş bu ay veriləcək. Ona görə, bəzi insanların bank hesabı açmağa imkanları olmayacaq. Ancaq ikinci ödəniş may ayında veriləcək. O vaxta qədər insanlar, 600 min insan, hər biri bank hesabı açsın və ikinci ödənişi bank köçürmə yolu ilə alsın. Bu, bizim xahişimizdir, bu, bizim tələbimizdir".
Prezident əhalinin rahat şəkildə birdəfəlik ödənişi alması üçün banklara göstəriş verdi ki, bank hesabı açılarkən onlara şərait yaradılsın.
“...insanların hesab açmaları gələcəkdə banklara fərqli yanaşmanı ortaya qoyacaq”
Məsələ ilə bağlı fikir bildirən iqtisadçı-ekspert Pərviz Heydərov qeyd etdi ki, koronavirus pandemiyası bank-vətəndaş münasibətlərini yeni mərhələyə keçirdi: “Dövlətin vətəndaşlar üçün təyin etdiyi birdəfəlik ödənişləri onların banklardan alması və insanların hesab açmaları gələcəkdə banklara fərqli yanaşmanı ortaya qoyacaq. Koronavirus pandemiyası istər sosial, istərsə də iqtisadi sahədə bir çox həqiqəti üzə çıxardı. Xüsusilə bu gün üzə çıxdı ki, əmək müqaviləsi olmadan, qeyri-formal işləyənlərin sayı həddən artıq çoxdur. İlk növbədə, bu sahədə şəffaflaşma lazımdır: yəni sahibkarların vergidən yayınmasına, işçinin isə sosial müdafiəsiz buraxılması kimi pis ənənəyə son qoyulmalıdır. Eyni zamanda, cənab Prezident birdəfəlik ödəniş alan vətəndaşlara bir daha tövsiyə etdi ki, bank hesabları açsınlar. Bu qərar da çox vacibdir. Çünki bu gün təəssüf ki, vətəndaşlar banklara daha çox kreditlə bağlı müraciət edirlər. Prezidentin bu qərarından sonra vətəndaşların özləri üçün şəxsi hesab açmasının geniş vüsət alacağını düşünürəm”.
Günel CƏLİLOVA
