“İstisna olunmur ki, aprel, may, iyun aylarında tənəzzül müşahidə ediləcək”. Bunu Prezident İlham Əliyev Əmək və Əhalinin Sosial Müdafiəsi naziri Sahil Babayev və İqtisadiyyat naziri Mikayıl Cabbarovun iştirakı ilə videobağlantı formatında keçirdiyi iclasda deyib.
Ölkə başçısının sözlərinə görə, indi biz iqtisadi sahə ilə bağlı öz addımlarımızı elə atmalıyıq ki, hazırkı çətin şəraitdə iqtisadi fəallığı müəyyən mənada qoruyub saxlayaq: “Demək olar, bütün ölkələr indi pandemiya ilə əlaqədar öz sərhədlərini bağlayıblar, ancaq ticarət və yükdaşımalar sahəsində işlər davam edir. Düzdür, indi ticarət obyektləri bağlı olduğu üçün burada tənəzzül var. Yükdaşımalarda isə vəziyyət nisbətən normaldır. Əlbəttə ki, iqtisadi sahədə apardığımız siyasət və iqtisadi sabitlik pandemiyaya qarşı mübarizədə bizə əlavə imkanlar yaradır. Bu ilin 3 ayının yekunları haqqında biz üç gün bundan əvvəl danışdıq, təkrar etmək istəmirəm. Hələ ki, müsbət dinamika var. Ancaq istisna olunmur ki, aprel, may, iyun aylarında tənəzzül müşahidə ediləcək. Çünki biz iki ayın yekunlarını üç ayın yekunları ilə müqayisə edəndə görürük ki, həm ümumdaxili məhsulda azalma var, eyni zamanda, qeyri-neft sektorunda tənəzzül var”.
O da məlumdur ki, Azərbaycan bir sıra sosial-iqtisadi layihələr həyata keçirir. Maraqlıdır, 3 ay ərzində gözlənilən tənəzzül ölkədəki sosial-iqtisadi layihələrə əsaslı təsir edə bilərmi?
“Ancaq prioritet olmayan layihələrin həyata keçirilməsi təxirə salınacaq”
Sözügedən məsələyə aydınlıq gətirən iqtisadçı-ekspert Fuad İbrahimovun sözlərinə görə, tənəzzülün Azərbaycanın məlum layihələrinə əsaslı təsir edəcəyi gözlənilmir: “Əvvəla pandemiya bütün dünya iqtisadiyyatına mənfi təsirini göstərib və göstərəcək. Uzun müddət bunun mənfi izləri qalacaq. Yəni iqtisadi artımın bərpa olunması üçün vaxt lazımdır. Azərbaycana gəldikdə isə, vəziyyət bir qədər fərqlidir. Prezident İlham Əliyev çıxışında bəyan etdi ki, 2020-ci ildə bütün sosial layihələrin icrası təxirə salınmayacaq. Ancaq prioritet olmayan layihələrin həyata keçirilməsi təxirə salınacaq. Ancaq sosial layihələr təxirə salınmayacaq. Bütün bunlar, öz növbəsində, ona işarə edir ki, tənəzzül sosial əhəmiyyətli layihələrə təsir etməyəcək. Bununla bağlı nə nəzərdə tutulubsa, onların hamısı həyata keçiriləcək. Sosialyönümlü layihələrlə bağlı hökumətin siyasəti ondan ibarətdir ki, bu sahələrdə ixtisarlar aparılmasın. Allah eləsin ki, bu pandemiyanın ömrü uzanmasın”.
Vidadi ORDAHALLI
