Ermənistan parlamenti birinci oxunuşda pensiyaların nağdsız köçürülməsinə keçidi təklif edən dəyişiklikləri qəbul edib. Bu haqda məlumatı erməni mediası yayıb.
Erməni mediasının yaydığı məlumata görə, indi nağdsız ödənişlər arasındakı seçimi vətəndaşların özləri edəcəklər. Pensiyaçının sağlamlığında problem olduğu hallar istisna olmaqla, nağdsız ödənişlərə tamamilə keçmək təklif olunur.
Düzəliş İrəvan, Gümrü və Vanadzor şəhərlərində 1 iyul 2020-ci ildə qüvvəyə minəcək. Bundan sonra keçid tədricən digər yaşayış məntəqələrində tamamlanacaq və yalnız 2023-cü ilə qədər 1000 nəfərdən az adamın yaşadığı ərazilərdə fəaliyyət göstərəcək.
Populist çıxışlara görə tayı-bərabəri olmayan Nikol Paşinyan hələ də erməniləri, Ermənistan ictimaiyyətini vədlərlə aldadır. Blokada şəraitində olan, marginallaşmış bir dövlətin iqtisadi sıçrayışlar edəcəyini iddia etməyə erməni baş nazirindən başqa kimsədə üz ola bilməz. Sərhədlər açılmayınca, əlaqələr qurulmayınca, layihələr reallaşdırılmayınca, istehsal, emal olmayınca, hansı iqtisadi sıçrayışdan dəm vurduğunu Ermənistanın baş naziri heç özü də dərk etmir. Blokada şəraitində olan Ermənistanın iqtisadiyyatını irəli aparacaq nə qüvvə yoxdur, nə imkan, nə də potensial. İqtisadi inkişaf nağılları ilə ermənilərin başını aldadan Paşinyan hakimiyyəti hələ indi-indi pensiyaların nağdsız ödənişinə keçməyə hazırlaşır. Hansı ki, Azərbaycan neçə ildir pensiyaların nağdsız köçürülməsinə keçib.
“Monolit bir hökumət qura bilmədiyindən və ən əhəmiyyətlisi...”
Məsələyə münasibət bildirən siyasi şərhçi Ramil Hüseynovun sözlərinə görə, bu onu göstərir ki, Ermənistan iqtisadi baxımdan yerində sayır: “Azərbaycan pensiyaların nağdsız köçürülməsinə hardasa 16 il əvvəl keçib. Bu sahədə ötən illər ərzində digər mütərəqqi sistemlər tətbiq olunub. Ermənistan isə hələ indi buna keçir. Bu, onu göstərir ki, Paşinyanın vəd etdiyi islahat nağılları sözdən o tərəfə keçmir. Ermənistan Müstəqil Dövlətlər Birliyinə üzv olan dövlətlər arasında ən kasıb olan Qırğızıstan və Tacikistandan sonra 3-cü dövlətdir. Paşinyan hakimiyyətə gəldikdən sonra həyata keçirdiyi iqtisadi siyasətini dəyərləndirdikdə aydın olur ki, o, 3-cü yeri qoruyub saxlamaqda “israrlıdır”. Paşinyan hökuməti ölkənin qarşılaşdığı sosial-iqtisadi problemləri həll etmək iqtidarında deyil. O daha çox hakimiyyət uğrunda siyasi mübarizə ilə məğşul olur. Keçmiş hakimiyyət təmsilçilərini təqib edir. Monolit bir hökumət qura bilmədiyindən və ən əhəmiyyətlisi, ölkənin iqtisadi potensialı buna imkan vermədiyindən, gözlənilən nəticələri əldə edə bilmir”.
Vidadi ORDAHALLI
